JDB ເຊັນສັນຍາໂຄງການກູ້ເງິນເພື່ອການສຶກສາ

ຂ່າວ: ຄໍາຕົ້ນ ວໍລະຈັກ

   ໃນວັນທີ 17 ມີນາ 2021 ທີ່ວິທະຍາໄລຄູດົງຄໍາຊ້າງໄດ້ມີພິທີເຊັນສັນຍາວ່າດ້ວຍການປະຕິບັດໂຄງການເງິນກູ້ເພື່ອການສຶກສາ ແລະ ອອກບັດ ATMHealthy life ຄຸ້ມຄອງອຸບັດເຫດລະຫ່ວາງທະນາຄານຮ່ວມພັດທະນາ ແລະວິທະຍາໄລຄູດົງຄໍາຊ້າງຝ່າຍທະນາຄານຮ່ວມພັດທະນາຮ່ວມລົງນາມໂດຍ ທ່ານ ວິໄລ ສີພະພອນ ຜູ້ອໍານວຍໃຫຍ່ທະນາຄານຮ່ວມພັດທະນາຝ່າຍວິທະຍາໄລຄູດົງຄໍາຊ້າງຮ່ວມລົງນາມໂດຍທ່ານ ນາງ ວິລາ ແສງສະຫວ່າງ ຜູ້ອໍານວຍການໃຫຍ່ວິທະຍາໄລຄູດົງຄໍາຊ້າງ, ໂດຍຊ້ອງໜ້າຄະນະອຳນວຍການ, ຄູ-ອາຈານ ແລະນັກສຶກສາ, ວິຊາການທີ່ກ່ຽວຂ້ອງທັງສອງຝ່າຍກໍ່ໄດ້ເຂົ້າຮ່ວມຢ່າງພ້ອມພຽງ.

  ຈຸດປະສົງຂອງໂຄງການແມ່ນເພື່ອອຳນວຍຄວາມສະດວກໃຫ້ນັກສຶກສາຜູ້ທີ່ຍັງຂາດທຶນຮອນທີ່ຢາກສຶກສາຮໍ່າຮຽນໃນວິທະຍາໄລຄູດົງຄໍາຊ້າງ, ເພື່ອສະໜັບສະໜູນເງິນກູ້ຢືມໃຫ້ແກ່ພະນັກງານຄູ-ອາຈານໃນວິທະຍາໄລຄູດົງຄໍາຊ້າງສາມາດກູ້ຢືມທຶນເພື່ອການສຶກສາດ້ວຍອັດຕາດອກເບ້ຍຕໍ່າສ້າງຄວາມສະດວກສະບາຍໃນການສຶກສາຮໍ່າຮຽນແລະ ເພື່ອໃຫ້ ນັກສຶກສາໄດ້ເຂົ້າເຖິງການບໍລິການທີ່ທັນສະໄໝ, ວ່ອງໄວສະດວກສະບາຍໃນການເຮັດທຸລະກຳທາງດ້ານການເງິນ, ອອກບັດATM Healthy life ຊຶ່ງໃນບັດດັ່ງກ່າວສາມາດນໍາໃຊ້ໃນການຖອນເງິນຈາກຕູ້ ATM ເປັນບັດປະກັນໄພອຸບັດເຫດຢູ່ໃນບັດດຽວກັນ,ສາມາດຄຸ້ມຄອງອຸບັດເຫດໄດ້ຕະຫຼອດ 24 ຊົ່ວໂມງໃນທົ່ວປະເທດໂດຍການຄຸ້ມຄອງດັ່ງນີ້: ຖ້າເສຍຊີວິດ ຫຼືພິການຖາວອນຈະໄດ້ຮັບ 6.000.000 ກີບ, ຄ່າປິ່ນປົວຈາກອຸບັດເຫດສູງສຸດ 500.000 ກີບຕໍ່ຄັ້ງ.

  ປະຈຸບັນທະນາຄານຮ່ວມພັດທະນາໄດ້ຮ່ວມມືກັບຫຼາຍອົງກອນ, ຫຼາຍສະຖາບັນ ແລະຫຼາຍບໍລິສັດ-ຫຼາຍໂຮງງານເພື່ອບໍລິການດ້ານການເງິນທີ່ຄົບວົງຈອນໃຫ້ກັບລູກ ຄ້າທຸກລະດັບຢ່າງເທົ່າທຽມກັນໂດຍປະຕິບັດຄຳຂວັນທີ່ວ່າ: ພວກເຮົາຈະ “ເຕີບໃຫ່ຍໄປພ້ອມກັນ”.

แชร์