ພົບເຫັນລັກລອບເລື່ອຍໄມ້ໃນປ່າສະຫງວນແຫ່ງຊາດນໍ້າຫ້າ 7.715 ແມັດກ້ອນ

ຂ່າວ: ມຸນຕີ 

  ວັນທີ 16 ມີນາ 2021 ທີ່ປ້ອມກີ່ວລົມ, ພະແນກກະສິກໍາ ແລະປ່າໄມແຂວງຫຼວງນໍ້າທາ ທ່ານ ທວງນາມ ວົງສາ ຮອງຫົວໜ້າພະແນກກະສິກໍາ ແລະປ່າໄມ້ແຂວງຫຼວງນໍ້າທາ, ທ່ານ ຢານ ວິເກວແມນ ຜູ້ອໍານວຍການຫ້ອງການທະນາຄານ KFW ປະຈໍາປະເທດລາວ,ມີຮອງເຈົ້າເມືອງ 2 ເມືອງ ຄື: ເມືອງຫຼວງນໍ້າທາ ແລະເມືອງ ສິງ, ຫົວໜ້າຫ້ອງການກະສິກໍາ ແລະປ່າໄມ້ເມືອງ, ພາກສ່ວນທີ່ກ່ຽວຂ້ອງຂັ້ນແຂວງ ແລະຂັ້ນເມືອງໄດ້ຢ້ຽມຢາມ ແລະລົງກວດຈຸດທົບທວນຄືນຄວາມຄືບໝ້າຂອງໂຄງ ການອະນຸລັກຊີວະນາໆພັນ ແລະປ່າໄມ້ແບບປະສົມປະສານທີ່ນອນຢູ່ໃນໂຄງການອະນຸລັກຊີວະນາໆພັນ ແລະປ່າໄມ້ແບບປະສົມປະສານໂດຍສະເພາະແມ່ນຂອບເຂດປ້ອມກີ່ວລົມ ແລະຂອບເຂດບ້ານນໍ້າກົ່ງເມືອງຫຼວງນໍ້າທາ.

  ໃນພິທີໄດ້ຮັບຟັງການລາຍງານຈາກທີມງານປະຈໍາປ້ອມກີ່ວລົມ ແລະປ້ອມຍາມປ່າຂອບເຂດນໍ້າກົ່ງໂດຍຫຍໍ້ກ່ຽວກັບຄວາມຄືບໝ້າຂອງໂຄງການອະນຸລັກຊີວະນາໆພັນ ແລະປ່າໄມ້ແບບປະສົມປະສານໄດ້ລົງສົມທົບກັບພະນັກງານກອງກວດກາປ່າໄມ້ແຂວງເຄື່ອນໄຫວກວດກາລາດຕະເວັນຕາມເສັ້ນທາງນໍ້າທາ-ເມືອງສິງ ແລະຢຶດສັດປ່າໄດ້ຈໍານວນໜຶ່ງ ແລະສົມທົບກັບພະນັກງານກອງກວດກາປ່າໄມ້ແຂວງ ແລະທະຫານຊາຍແດນ 134 ລົງກວດກາຂອບເຂດບ້ານຫຼັກຄໍາໃໝ່,ບ້ານນໍ້າກົ່ງແມ່ນພົບເຫັນປະ ຊາຊົນຈໍານວນໜຶ່ງທີ່ຍັງລັກລອບເລື່ອຍໄມ້ຢູ່ໃນເຂດປ່າສະຫງວນແຫ່ງຊາດນໍ້າຫ້າ ຈໍານວນທັງໝົດ 7.715 ແມັດກ້ອນ, ໄດ້ສ້າງບົດບົດບັນທຶກສຶກສາອົບຮົມຮ່ວມກັນໄດ້ເປັນຢ່າງດີ ແລະ ປ້ອມຍາມປ່າເຂດບ້ານນໍ້າກົ່ງໄດ້ລົງກວດກາລາດຕະເວນປ່າສະຫງວນແຫ່ງຊາດນໍ້າຫ້າ ແລະ ໄດ້ເກັບກໍາຂໍ້ມູນຄວາມຫຼາກຫຼາຍຂອງຊີວະນາໆ ພັນເຊັ່ນ: ຮອງຮອຍສັດປ່າ, ຕົ້ນໄມ້, ພືດ, ເຄື່ອງປ່າຂອງດົງ ແລະພໍ່ແມ່ປະຊາຊົນມີຄວາມເຂົ້າໃຈຫຼາຍຂຶ້ນຕໍ່ກັບວຽກງານອະນຸລັກຊີວະນາໆພັນ, ມີຄວາມເຂົ້າໃຈຕໍ່ລະບຽບກົດໝາຍເປັນຕົ້ນແມ່ນ: ການລັກລອບຕັດໄມ້ແບບຜິດກົດໝາຍ, ເລື່ອຍໄມ້, ໄດ້ໂຄສະນາກ່ຽວກັບຄວາມໝາຍຄວາມສໍາຄັນຂອງປ່າໄມ້ໃຫ້ປະຊາຊົນເຂົ້າໃຈເປັນຢ່າງດີ.

ຮູບພາບ: ໜັງສືພິມເສດຖະກິດ-ສັງຄົມ

แชร์