ພູວົງສົ່ງອອກສິນຄ້າຕ່າງແຂວງ ແລະຕ່າງປະເທດມູນຄ່າ 10,8 ຕື້ກີບ

    ປີ 2020 ຜ່ານມາເມືອງພູວົງ ແຂວງອັດຕະປື ສາມາດສົ່ງອອກສິນຄ້າໄປຕ່າງແຂວງ ແລະ ຕ່າງປະເທດມີມູນຄ່າ 10,8 ຕື້ກີບ, ທຽບໃສ່ແຜນການປີປະຕິບັດໄດ້ 85%, ໂດຍສິນຄ້າສົ່ງອອກສ່ວນໃຫຍ່ແມ່ນສິນຄ້າກະສິກໍາ, ໃນຂະນະທີ່ສິນຄ້ານໍາເຂົ້າມີມູນຄ່າ 18 ຕື້ກວ່າກີບ,ສ່ວນໃຫຍ່ແມ່ນປະເພດໝວດສະບຽງອາຫານ, ນໍ້າມັນເຊື້ອໄຟ ແລະເຄື່ອງກໍ່ສ້າງ.

  ທ່ານ ວິໄລວັນ ໄຊຍະບຸນຮາຍ ຫົວໜ້າຫ້ອງການອຸດສາຫະກຳ ແລະ ການຄ້າເມືອງພູວົງ ໄດ້ລາຍງານຕໍ່ກອງປະຊຸມສະຫຼບການຈັດຕັ້ງປະຕິບັດວຽກງານອຸດສາຫະ ກຳ ແລະການຄ້າເມືອງປະຈຳປີ 2020 ທີ່ຫາກໍ່ສໍາເລັດລົງເມື່ອບໍ່ດົນນີ້ວ່າ: ໃນປີ 2020 ນີ້ເມືອງພູວົງກໍ່ຄືຫ້ອງການອຸດສາຫະກໍາ ແລະການຄ້າເມືອງໄດ້ເອົາໃຈໃສ່ໃນການຄຸ້ມຄອງ, ຕິດຕາມ ແລະ ກວດກາການນໍາເຂົ້າ ແລະ ສົ່ງອອກຜະລິດຕະພັນສິນຄ້າພາຍໃນເມືອງດ້ວຍຄວາມຮັບຜິດຊອບສູງ, ຊຶ່ງສາມາດສົ່ງອອກສິນຄ້າໄປຕ່າງ ແຂວງ ແລະຕ່າງປະເທດມີມູນຄ່າ 10,8 ຕື້ກີບ ໃນນີ້ສິນຄ້າສົ່ງອອກໄປຕ່າງແຂວງມີມູນຄ່າ 1 ຕື້ກວ່າກີບ, ຊຶ່ງປະກອບມີ: ແຂມ 12 ລ້ານກວ່າກີບ, ເຫຼັກເສດມີ 36 ລ້ານກວ່າກີບ, ມັນຕົ້ນມີ 36 ລ້ານກວ່າກີບ, ໝາກຈອງ 5 ຮ້ອຍລ້ານກ່ວາກີບ,ສັດລ້ຽງ 4 ຮ້ອຍລ້ານກວ່າກີບ,ຜະລິດຕະພັນໄມ້ 3,1 ຕື້ກ່ວາກີບ,ສ່ວນສິນຄ້າສົ່ງອອກໄປຕ່າງປະເທດມີມູນຄ່າ 6,2 ຕື້ກວ່າກີບ, ຊຶ່ງປະກອບມີ: ຜະລິດຕະພັນໄມ້ແປຮູບທີໄດ້ຈາກສວນປູກໄມ້ຂອງປະຊາຊົນມີ 42 ລ້ານກ່ວາກີບ, ຜະລິດຕະພັນໄມ້ສຳເລັດ ຮູບ 5,8 ຕື້ກີບ, ຜະລິດຕະພັນໄມ້ປ່ອງ7 ລ້ານກວ່າກີບ ແລະ ຜະລິດຕະພັນຖ່ານດຳ-ຖ່ານຂາວມີ 382 ລ້ານກວ່າກີບ, ສ່ວນສີນຄ້ານໍາເຂົ້າມີມູນຄ່າ 18 ຕື້ກວ່າກີບ, ປະກອບມີໝວດສະບຽງອາຫານ, ນໍ້າມັນເຊື້ອໄຟ, ເຄື່ອງກໍ່ສ້າງ ແລະອື່ນໆ.

ໂດຍ: ສຸດໃຈ ໄຊຍະບຸນຮາຍ

แชร์