ສະເຕດ້ຽມ ຊຸກຍູ້ເຄື່ອງກີລາເຕະບານຫຼາຍລາຍການ ໃຫ້ຢູ-12 ນະຄອນຫຼວງ

  ສູນຈຳໜ່າຍເຄື່ອງກີລາຄົບວົງຈອນສະເຕດ້ຽມ ສະປອດຕົວ ແທນຈຳໜ່າຍເຄື່ອງກີລາ  FBT ຈຳກັດຜູ້ດຽວໃນ ສປປ ລາວ ໃຫ້ ການສະໜັບສະໜູນເຄື່ອງກີລາ ເຕະບານຫຼາຍລາຍການລວມມູນຄ່າ 9 ລ້ານກວ່າກີບ ໃຫ້ຂຸນພົນ ນັກເຕະບານຮຸ່ນເຍົາວະຊົນອາຍຸ ບໍ່ເກີນ 12 ປີ ຫຼື ຢູ-12 ນະຄອນຫຼວງວຽງຈັນ  ກຽມຕາງໜ້າ  ສປປ ລາວ ເຂົ້າຮ່ວມການແຂ່ງຂັນກີລາ ເຕະບານ ຢູ-12 ຊີງແຊ໋ມນາໆຊາດ ຈະຈັດຂຶ້ນລະຫວ່າງວັນທີ 11-14 ມີນາ 2019 ທີ່ສະໜາມອາມມີ້ ຢູໄນເຕັດນະຄອນຫຼວງບາງກອກ ປະເທດໄທ ໂດຍທະຫານໄທຮັບ ກຽດເປັນເຈົ້າພາບ.

  ເມື່ອວັນທີ 2 ມີນາຜ່ານມາທີ່ສະໜາມກີລາເຕະບານຫຍ້າທຽມສັບພະວິຊາເມືອງສີສັດຕະນາກ ນະຄອນຫຼວງວຽງຈັນ ໄດ້ມີພິທີມອບ-ຮັບເຄື່ອງກີລາເຕະບານຫຼາຍລາຍການລວມມູນຄ່າ 9 ລ້ານ ກວ່າກີບ ຂອງສູນຈຳໜ່າຍເຄື່ອງກີລາຄົບວົງຈອນສະເຕດ້ຽມສະປອດຕາງໜ້າກ່າວມອບ ໂດຍທ່ານ ສົງການ ພັນແພງດີ ຜູ້ຈັດການທີມເຕະບານຢູ-12 ນະຄອນຫຼວງ ວຽງຈັນ ແລະກ່າວຮັບແມ່ນທ່ານ ພູທອງ ວົງກົດ ຜູ້ຊ່ວຍຄູຝຶກຢູ-12 ນະຄອນຫຼວງວຽງຈັນ ມີບັນດາພະນັກງານທີ່ກ່ຽວຂ້ອງ ແລະພໍ່ ແມ່ຜູ້ປົກຄອງນັກກີລາຕະຫຼອດ ຮອດນັກກີລາເຂົ້າຮ່ວມເປັນສັກຂີພິຍານ.

  ສຳລັບນໍ້າໃຈໃນການຊຸກຍູ້ ເຄື່ອງກີລາໃນຄັ້ງນີ້ປະກອບມີຊຸດແຂ່ງຂັນ 2 ສີ ຄື ສີແດງ ແລະສີ ຂຽວຈຳນວນ 50 ຊຸດ ແລະຊຸດສະເພາະຝຶກຊ້ອມ 20 ຊຸດ ລວມ ທັງໝົດ 70 ຊຸດ ມູນຄ່າ 7 ລ້ານ ກີບ. ນອກຈາກນັ້ນ, ກໍ່ຍັງມີຖົງ ເທົ້າ 42 ຄູ່ ລວມມູນຄ່າ 9 ແສນ ກີບ ແລະເສື້ອໂລຄະນະນຳພາ 9 ຜືນ ລວມມູນຄ່າ 5,4 ແສນກີບ, ເສື້ອຍືດຄໍມົນ 21 ຜືນ 6,3 ແສນ ກີບ.  

  ໃນການເຂົ້າຮ່ວມງານດັ່ງກ່າວ,ໃນເບື້ອງຕົ້ນທີມຢູ-12 ນະຄອນຫຼວງວຽງຈັນໄດ້ມີການຄັດເລືອກນັກກີລາໃນຈຳນວນເກືອບ 30 ຄົນ ເລືອກ 21 ຄົນ ແລະມີການຝຶກຊ້ອມຜ່ານມາຈົນມາປະຈຸບັນພໍດີໜຶ່ງເດືອນເຕັມໃນນັ້ນໄດ້ມີການລົງສະໜາມອຸ່ນເຕື່ອງຜ່ານມາ 3 ນັດ ແລະສາມາດເອົາຊະນະໄດ້ເຖິງ 2  ນັດ ຄື: ຊະນະ ທີມສະໂມສອນ ລ້ານຊ້າງຢູໄນເຕັດ  4-1  ປະຕູ, ຊະນະສະໂມສອນວຽງຈັນ ເອັບທີ 5-3 ປະຕູ ແລະສະເໝີສະໂມສອນບຸນເກີດເອັບຊີ  2-2  ປະຕູ ໃນວັນພຸດທີ 6 ມີນານີ້ຕອນແລງເວລາ 16:00 ໂມງ ທີ່ສະໜາມກີລາ ເຕະບານເອສຣາຢູ-12 ນະຄອນ ຫຼວງວຽງຈັນ  ຈະໄດ້ຍົກທີມໄປທົດ ສອບຄວາມສາມາດນັດສຸດທ້າຍ ກັບສະໂມສອນເອສຣາ ກ່ອນຈະ ບິນຂ້າມແມ່ນໍ້າຂອງເຂົ້າຮ່ວມແຂ່ງ ຂັນໃນງານດັ່ງກ່າວ.  

  ການແຂ່ງຂັນລາຍການນີ້ມີ ທີມເຂົ້າຮ່ວມທັງໝົດ 6 ປະເທດ ແລະໄດ້ຈັດແບ່ງອອກເປັນ 2 ກຸ່ມ ແຂ່ງຂັນພົບກັນໝົດຄັດເອົາທີ 1-2 ຜ່ານເຂົ້າຮອບ 4 ທີມສຸດທ້າຍ  ສຳລັບກຸ່ມເອ ນະຄອນຫຼວງວຽງຈັນ ຖືກຈັດຢູ່ຮ່ວມກັບຢູ-12  ຈາກປະເທດຍີ່ປຸ່ນ ແລະສສ ຫວຽດ ນາມ ສ່ວນກຸ່ມບີ ປະກອບມີເຈົ້າພາບທະຫານໄທ, ຮົງກົງ ແລະປະ ເທດອັງກິດ.

ໂດຍ: ສົງການ

แชร์