ໂມບາຍມັນນີ ເປັນຄູ່ຮ່ວມທຸລະກິດກັບນໍ້າມັນເຊື້ອໄຟລາວ

  ເພື່ອເປັນການເປີດໂຕຄູ່ຮ່ວມທຸລະກິດກັບລັດວິສາຫະກິດນໍ້າມັນເຊື້ອໄຟລາວຢ່າງເປັນທາງການໃນການຊໍາລະຄ່າບໍລິການຕ່າງໆ ໃນລັດວິສາຫະກິດນໍ້າມັນເຊື້ອໄຟລາວຜ່ານບໍລິການ M Money ໂດຍແນໃສ່ຕອບສະໜອງຄວາມຕ້ອງການຂອງລູກຄ້າ ແລະເຮັດໃຫ້ການບໍລິການມີຄວາມສະດວກສະບາຍ,ປອດໄພ, ວອ່ງໄວ ແລະໄດ້ມາດ ຕະຖານສາກົນພາຍໃຕ້ຄໍາຂວັນ: “ໃຫ້ຊີວິດງ່າຍຂຶ້ນຕາມຍຸກດີຈີຕອນ”

   ພິທີເຊັນບົດບັນທຶກຄວາມເຂົ້າໃຈວ່າດ້ວຍການເປັນຄູ່ຮ່ວມທຸລະກິດເຊື່ອມຕໍ່ລະບົບການຊໍາລະຜ່ານ M Money ລະຫວ່າງບໍລິສັດ ລາວໂມບາຍມັນນີ ຈໍາກັດຜູ້ດຽວ ແລະລັດວິສາຫະກິດນໍ້າມັນເຊື້ອໄຟລາວໄດ້ຈັດຂຶ້ນໃນຕອນເຊົ້າຂອງວັນທີ 12 ມີນານີ້ ທີ່ບໍລິສັດ ລາວໂທລະຄົມມະນາຄົມມະຫາຊົນນະຄອນຫຼວງວຽງຈັນ ໂດຍການລົງນາມລະຫວ່າງທ່ານ ທັນສະໄໝ ຊາມຸນຕີ ຜູ້ອໍານວຍການບໍລິສັດ ລາວໂມບາຍມັນນີ ຈໍາກັດຜູ້ດຽວ ແລະທ່ານ ຈັນທະກິງ ອິນທະວົງ ຮອງອໍານວຍການລັດວິສາຫະ ກິດນໍ້າມັນເຊື້ອໄຟລາວ; ເປັນກຽດເຂົ້າຮ່ວມໂດຍ ທ່ານ ສູພົນ ຈັນທະວີໄຊ ຜູ້ອໍານວຍການໃຫຍ່ ບໍລິສັດ ລາວໂທລະຄົມ ມະນາຄົມມະຫາຊົນ, ທ່ານ ອະນຸສິນ ພົນເສນາ ຜູ້ອໍານວຍການລັດວິສາຫະກິດນໍ້າມັນເຊື້ອໄຟລາວ.

    ບໍລິການຂອງລັດວິສາຫະກິດນໍ້າມັນເຊື້ອໄຟລາວເພື່ອເປັນຄູ່ຮ່ວມທຸລະກິດທີ່ຮັບຊໍາລະນໍ້າມັນຜ່ານ M Money ລວມມີຈໍານວນທັງໝົດ 371 ປໍ້າ, ໃນນັ້ນ 21 ປໍ້າ ແມ່ນປໍ້າຕົວແບບ ແລະ349 ປໍ້າແມ່ນປໍ້າຕົວແທນຊຶ່ງໃນເບື້ອງຕົ້ນຈະເລີ່ມເປີດໃຫ້ບໍລິການກ່ອນຈໍານວນ 4 ປໍ້າ ໃນນະຄອນຫຼວງແລ້ວສືບຕໍ່ຂະຫຍາຍໄປບັນດາປໍ້າຕ່າງໆ ແລະດໍາເນີນການພັດທະນາລະບົບການຈ່າຍບົງນໍ້າມັນໃຫ້ກັບບັນດາກະຊວງ ແລະອົງການທຽບເທົ່າໃນທົ່ວປະເທດ.

 ການຮ່ວມມືທາງທຸລະກິດໃນຄັ້ງນີ້, ເປັນບາດກ້າວໜຶ່ງທີ່ສໍາຄັນ ແລະເປັນບາດກ້າວທໍາອິດໃນການຫັນການຊໍາລະເງິນຮູບແບບໃໝ່ຜ່ານ M Money ກະເປົາເງິນເທິງມືຖືເຂົ້າໃນຫົວໜ່ວຍທຸລະກິດທີ່ທັນສະໄໝ ແລະມີຄວາມຈໍາເປັນໃນການດໍາລົງຊີວິດປະຈໍາວັນຂອງຜູ້ຄົນໃນທົ່ວປະເທດ, ເປັນສ່ວນໜຶ່ງໃນການສ້າງທ່າແຮງ, ຊຸກຍູ້ເສີມສ້າງ ແລະ ຜັນຂະຫຍາຍເສດຖະກິດດີຈີຕອນ,ຫຼຸດຜ່ອນການນໍາໃຊ້ເງິນສົດຕາມແຜນພັດທະນາເສດຖະກິດດີຈີຕອນຂອງພັກ-ລັດ ໃຫ້ປະກົດຜົນເປັນຈິງຕາມວິໄສທັດຂອງ ບໍລິສັດ ລາວໂມບາຍມັນນີ ຈໍາກັດຜູ້ດຽວ ເປັນຜູ້ນໍາດ້ານການບໍລິການການເງິນດີຈີຕອນໃນ ສປປ ລາວ.

ຂ່າວ: ສິດຕິພອນ

แชร์