ຫຼວງພະບາງເລີ່ມສັກວັກແຊງປ້ອງກັນໂຄວິດໃຫ້ກຸ່ມສ່ຽງ

 ແຂວງຫຼວງພະບາງ ໄດ້ສັກວັກແຊງປ້ອງກັນພະຍາດໂຄວິດ-19 ເລີ່ມເຂັມທໍາອິດໃນວັນທີ 10 ມີນາ 2021 ນີ້ໂດຍການເຂົ້າຮ່ວມຂອງທ່ານ ສຸກັນ ບຸນຍົງ ຮອງເລຂາພັກແຂວງ, ທ່ານ ດຣ ຄໍາສອນ ພົງສະຫວັດດີ ຫົວໜ້າພະແນກສາທາລະນະສຸກແຂວງຫຼວງພະບາງ, ມີອໍານວຍການໂຮງໝໍພ້ອມດ້ວຍແພດໝໍ ແລະຄະນະສະເພາະກິດຂັ້ນແຂວງເຂົ້າຮ່ວມ.

  ທ່ານ ດຣ ຄໍາສອນ ພົງສະຫວັດດີ ຫົວໜ້າພະແນກສາທາລະນະສຸກແຂວງໄດກ່າວວ່າ: ວັກແຊງທີ່ນໍາມາສັກໃຫ້ກຸ່ມທີ່ມີຄວາມສ່ຽງເປັນຕົ້ນແມ່ນຄະນະການນໍາຂອງແຂວງ, ພະນັກງານແພດ-ໝໍ (ໂຮງໝໍແຂວງ, ໂຮງໝໍເພື່ອນລາວ, ໂຮງໝໍ 107, ໂຮງໝໍຈີນ), ບັນດາຜູ້ບໍລິຫານນັກທ່ອງທ່ຽວ, ເຈົ້າຂອງໂຮງແຮມ, ເຮືອນພັກ ແລະຮ້ານອາຫານ,ກຸ່ມຄົນທີ່ປະຕິບັດໜ້າທີ່ຕາມຈຸດຜ່ານແດນສາກົນຢູ່ຫ້ອງປະຊຸມໂຮງໝໍແຂວງຄັ້ງນີ້ເປັນວັກແຊງທີ່ລັດຖະບານລາວໄດຮັບການຊ່ວຍເຫຼືອຈາກລັດຖະ ບານ ສປ ຈີນ ທີ່ຜະລິດໂດຍບໍລິສັດຊີໂນຟາມ, ປະຈຸບັນລັດຖະບານລາວສືບຕໍ່ປະສານງານກັບອົງການສາກົນເພື່ອນໍາວັກແຊງກັນພະຍາດໂຄວິດ-19 ເຂົ້າມາຕື່ມອີກເພື່ອນໍາມາຊັກໃຫ້ປະຊາຊົນລາວກຸ່ມຄົນອື່ນຕໍ່ໄປ. 

  ສໍາລັບແຂວງຫຼວງພະບາງມີເປົ້າໝາຍເບື້ອງຕົ້ນຈະໄດ້ຮັບວັກຊີນທັງໝົດ 3000 ໂດສ ແລະຂະບວນການສັກວັກຊີນເທື່ອນີ້ໄດ້ເລີ່ມແຕ່ວັນທີ 10-15 ຈຶ່ງສໍາເລັດ.

-------

ຂ່າວ: ສີສຸວັນ 

ຮູບພາບ: ໜັງສືພິມເສດຖະກິດ-ສັງຄົມ

• 15/03/2021