ຮ່ວມມືຈຳໜ່າຍຜະລິດຕະພັນສັນຍາລັກແຄນລາວ

 ພິທີເຊັນສັນຍາການຮ່ວມມືໂຄງການຜະລິດ ແລະຈຳໜ່າຍຜະລິດຕະພັນສັນຍາລັກແຄນລາວລະຫວ່າງສະມາຄົມສຽງແຄນລາວ,ບໍລິສັດ ລາວຈະເລີນສິນ ຈຳກັດ ແລະສວນອາຫານມັງກອນທອງໄດ້ຈັດຂຶ້ນໃນວັນທີ 11 ມີນານີ້ທີ່ບໍລິສັດ ລາວຈະເລີນສິນຈຳກັດ ນະຄອນຫຼວງວຽງຈັນ.

 ຮ່ວມລົງນາມຄັ້ງນີ້ຕາງໜ້າສະມາຄົມສຽງແຄນລາວແມ່ນທ່ານ ຄຳພັນ ເໝືອນສິດທິດາ ປະທານສະມາຄົມສຽງແຄນລາວຊຶ່ງເປັນເຈົ້າຂອງລິຂະສິດຂອງໂຄງການຮ່ວມ ມືຜະລິດ ແລະຈຳໜ່າຍຜະລິດຕະພັນສັນຍາລັກແຄນລາວ, ຕາງໜ້າບໍລິສັດ ລາວຈະເລີນສິນ ຈຳກັດແມ່ນ ທ່ານ ຈະເລີນ ພານິດ ຜູ້ອຳນວຍການ ບໍລິສັດ ລາວຈະເລີນສິນຈຳກັດ ຊຶ່ງເປັນບໍລິສັດຜູ້ລົງທຶນການຜະລິດ ແລະ ຈຳໜ່າຍຜະລິດຕະພັນສັນຍາລັກແຄນລາວ ແລະ ຕາງໜ້າສວນອາຫານມັງກອນທອງແມ່ນ ທ່ານ ວັດທະນາໄຊ ລາດສະວົງສິນ ຜູ້ອຳນວຍການສວນອາຫານມັງກອນຊຶ່ງເປັນຜູ້ຮ່ວມການລົງທຶນໂຄງການຜະລິດ ແລະ ຈຳໜ່າຍຜະລິດຕະພັນສັນຍາລັກແຄນລາວໂດຍໃຫ້ກຽດເຂົ້າ ຮ່ວມຂອງ ທ່ານ ຈະເລີນ ເຢຍປາວເຮີ ກຳມະການສູນກາງພັກລັດຖະມົນຕີສຳນັກງານນາຍົກລັດຖະມົນຕີໂຄສົກລັດຖະບານປະທານກິດຕິມະສັກສະມາຄົມສຽງແຄນລາວ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

  ທ່ານ ຄຳພັນ ເໝືອນສິດທິທິດາ ໄດ້ກ່າວວ່າ: ຈຸດປະສົງຂອງໂຄງການຄັ້ງນີ້ແມ່ນເພື່ອສົ່ງເສີມແຄນລາວ ແລະສຽງແຄນລາວຊຶ່ງແມ່ນດົນຕີປະຈໍາຊາດລາວໃຫ້ເປັນທີ່ ເອກອ້າງສົມກັບເປັນມໍລະດົກໂລກ, ສົ່ງເສີມດົນຕີພື້ນເມືອງລາວສຽງແຄນ-ສິລະປະວັດທະນະທໍາລາວຕິດພັນກັບການທ່ອງທ່ຽວ, ເພື່ອໃຫ້ທົ່ວສັງຄົມໄດ້ຮັບຮູ້ ແລະ ຊົມໃຊ້ແຄນລາວຢ່າງກວ້າງຂວາງ, ຍັງເປັນການໃຫ້ນັກທ່ອງທ່ຽວພາຍໃນ ແລະຕ່າງປະເທດໄດ້ເຫັນຄວາມເປັນເອກະລັກຂອງດົນຕີພື້ນເມືອງລາວ, ທັງເປັນການຊຸກຍູ້ການຕະຫຼາດແຄນອອກສູ່ພາຍໃນ ແລະຕ່າງປະເທດ, ເພື່ອປະກອບສ່ວນສົ່ງເສີມວຽກເຮັດງານທໍາໃຫ້ແກ່ບຸກຄະລາກອນພາກລັດ ແລະປະຊາຊົນລາວບັນດາເຜົ່າ, ສາມາດ ສ້າງລາຍຮັບໃຫ້ແກ່ພາກສ່ວນລັດ, ອົງການຈັດຕັ້ງສັງຄົມ, ພາກສ່ວນທຸລະກິດ ແລະການຈັດຕັ້ງກ່ຽວຂ້ອງ, ເພື່ອຊຸກຍູ້ກອງທຶນຂອງສະມາຄົມສຽງແຄນລາວໃຫ້ມີງົບປະມານນໍາໃຊ້ເຂົ້າໃນບັນດາກິດຈະກໍາກ່ຽວກັບວຽກອະນຸລັກຮັກສາມູນເຊື້ອແຄນ ແລະສຽງແຄນລາວມໍລະດົກໂລກໃຫ້ຍືນຍົງຄົງຢູ່ຄູ່ກັບຄົນລາວຊາດລາວ ແລະຊາວໂລກ ຕະຫຼອດໄປ.

ຂ່າວ: ວັນເພັງ, ພາບ:ຍຸພິນທອງ

• 15/03/2021