ພານິວັນ ຍິງຫົວໃຈສູ້ຊົນຈົນກາຍເປັນປະທານອະສັງຫາລິມະຊັບ

  ທ່ານ ນາງ ພານິວັນ ລັດຕະນະໂກສົນ ຫຼືເປັນທີ່ຄຸ້ນເຄີຍສາວນ້ອຍອະສັງຫາລິມະຊັບຜູ້ທີ່ຜ່ານຄວາມລຳບາກຈົນບາງຄັ້ງເຮັດໃຫ້ຕົນເອງຄິດບໍ່ຢາກມີຊີວິດຢູ່ຕໍ່ແຕ່ຍ້ອນເພິ່ນມີຫົວໃຈອົດທົນຄວາມພະຍາຍາມສູ້ຊົນຄິດຫາອະນາຄົດເຮັດໃຫ້ປະຈຸບັນຖືເປັນນັກພັດທະນາເລື່ອງອະສັງຫາແຖວໜ້າລາວເປັນທີ່ຍອມຮັບສັງຄົມທີ່ເພິ່ນມີວິໄສທັດກວ້າງໄກທີ່ຈະຕໍ່ຍອດທຸລະກິດນຳພາອົງກອນນຳພາທີມງານຊື່ສັດຈິງໃຈຈັດບຸກຄະລາກອນໃຫ້ຖືກກັບໜ້າວຽກນຳພາຜູ້ຄົນທີ່ມີຕົ້ນທຶນໜ້ອຍໃຫ້ມີລາຍຮັບລາຍໄດ້ເຂົ້າມາໃນຊີວິດປະຈຳວັນ ແລະໃຫ້ທຸກຄົນມີງົບໜ້ອຍໄດ້ມີທີ່ພັກອາໄສຢ່າງທົ່ວເຖິງ.

  ທ່ານນາງ ພານິວັນ ລັດຕະນະໂກສົນ ປະທານບໍລິສັດຊັບມະຫາໄຊອະສັງຫາລິມະຊັບໃຫ້ສຳພາດກັບນັກຂ່າວໜັງສືພິມເສດຖະກິດສັງຄົມຮູ້ວ່າ: ຕົນເອງເລີ່ມຕົ້ນຈາກ ສູນໃນການລິເລີ່ມທຸລະກິດອະສັງຫາລິມະຊັບ 3 ປີຜ່ານມາໂດຍພານິວັນມີຕົ້ນທຶນຊີວິດຄ້າຍໆກັບຜູ້ຍິງຫຼາຍຄົນທີ່ມີຄວາມຝັນ, ຄວາມຫວັງ, ຄວາມຕັ້ງໃຈ, ຄວາມພະ ຍາຍາມ ແລະເປົ້າໝາຍຊີວິດເພື່ອມຸ້ງຫວັງໃຫ້ຊີວິດຕົນເອງ ແລະຄອບຄົວດີຂຶ້ນໃນອະນາຄົດ, ການເລີ່ມຕົ້ນເຕັມໄປດ້ວຍເລື່ອງລາວຈົນກາຍເປັນປະສົບການ ແລະເຮັດໃຫ້ ສາວນ້ອຍຄົນນີ້ຮຽນຮູ້ວິທີ, ເຕັກນິກ, ຊ່ອງທາງ,ກົນລະຍຸດການເຮັດການຕະຫຼາດ ແລະເລີ່ມຄິດການໃຫຍ່ດ້ວຍການຍ່າງໄປຖາມຊັບທີ່ມີມູນຄ່າເຖິງ 15 ລ້ານບາດ ທັງທີ່ໃນມືມີເງິນພຽງແຕ່ເງິນໝື່ນບາດເທົ່ານັ້ນ. ຈາກເດັກນ້ອຍອາຍຸພຽງ 33 ປີ ພານິວັນ ລັດຕະນະໂກສົນ ເລີ່ມທຸລະກິດຈາກສູນຕໍ່ກາຍເປັນໜຶ່ງຈາກໜຶ່ງກາຍເປັນສອງດ້ວຍສອງມືຂອງຕົນຈົນສາມາດກໍ່ຕັ້ງບໍລິສັດອະສັງຫາລິມະຊັບໃນນາມບໍລິສັດ ຊັບມະຫາໄຊ ອະສັງຫາລິມະຊັບ ໄດ້ສໍາເລັດພ້ອມສາມາດຕໍ່ຍອດທຸລະກິດດ້ວຍການບໍລິ ຫານ-ຈັດການໂຄງການດິນຈັດສັນ ແລະອະສັງຫາອື່ນໆເຖິງ 11 ໂຄງການໃນປະຈຸບັນ.

  ປະຈຸບັນຍຸກນີ້ເປັນຍຸກໄໝ່ພາຍໃຕ້ການນຳພາຂອງພັກ-ລັດ, ເພິ່ນມີນະໂຍບາຍສູງໃຫ້ສິດສະເໝີພາບຍິງ-ຊາຍບົດບາດຍິງ-ຊາຍ ເທົ່າທຽມກັນໝົດມີໂອກາດເທົ່າທຽມ ກັນໝົດເຊັ່ນ: ການຮຽນຮູ້,ການເຮັດທຸລະກິດ, ການນຳພາຕ່າງໆ ແມ່ຍິງສາມາດເປັນຜູ້ນຳພາບໍລິຫານວຽກງານໄດ້ເປັນທີ່ເພິ່ງຂອງອົງກອນໄດ້ ແລະສາມາດສ້າງລາຍໄດ້ເຂົ້າມາລໍ່ລ້ຽງອົງກອນໄດ້ທຸກພາກສ່ວນໃນການບໍລິຫານທຸລະກິດ.

  ແມ່ຍິງມີຂໍ້ສະດວກໃນການເຮັດທຸລະກິດເປັນຕົ້ນແມ່ນເປັນຄົນອ່ອນນ້ອມຖ່ອມຕົນ, ວາຈາສຸພາບອ່ອນຫວານ, ຄິດບວດ, ຄິດໃຫ່ຍ, ຄິດກວ້າງໄກ, ສາມາດບໍລິຫານທຸ ລະກິດພົວພັນວຽກງານລະອຽດຊັດເຈນວ່ອງໄວແມ່ຍິງມີຂໍ້ຫຍຸ້ງຍາກໃນການບໍລິຫານທຸລະກິດເປັນບາງຄັ້ງເຊັ່ນວ່າ: ຂໍ້ຫຍຸ້ງຍາກໃນການເດີນທາງລົດເພກາງທາງແປງບໍ່ເປັນເຮັດໃຫ້ຊ້າຕໍ່ການເຮັດທຸລະກິດ.

  ສຸດທ້າຍຢາກຝາກເຖິງເອື້ອຍນ້ອງແມ່ຍິງ ຫຼືທຸກເພດທຸກໄວໃນສັງຄົມລາວເນື່ອງໃນໂອກາດວັນແມ່ຍິງສາກົນຢາກໃຫ້ທຸກຄົນມີຈຸດຢືນຂອງຕົວເອງຕັ້ງເປົ້າໝາຍໃນຊີວິດໄວ້ຊັດເຈນເຊັ່ນຕ້ອງມີຄວາມກ້າຄິດແລ້ວລົງມືທຳເທົ່ານັ້ນທີ່ຈຶ່ງສຳເລັດປະສົບການສອນໃຜບໍ່ໄດ້ແຕ່ສາມາດຮຽນຮູ້ໃຫ້ມີປະສົບການໄດ້ “ທຸກຄົນສາມາດເປັນອັດສະລິຍະໄດ້ດ້ວຍພະລັງບວກໃນຕົວຂອງເຮົາເອງ” ຢາກສຳເລັດຕ້ອງເບິ່ງແບບຢ່າງດ້ານດີຂອງຄົນທີ່ສຳເລັດຢາກໃຫ້ທຸກທ່ານເບິ່ງໂລກໃນແງ່ບວກ, ຄິດບວກ, ພະລັງບວກຈະພາໃຫ້ເຮົາສຳເລັດໄວຂຶ້ນ ແລະເຄົາລົບນັບຖືຜູ້ມີພະຄຸນສະເໝີເປັນຕົ້ນແມ່ນຜູ້ໃຫ້ກຳເນີດພໍ່-ແມ່ ສຸດທ້າຍນີ້ຂໍອວຍພອນໄຊໃຫ້ທຸກທ່ານຈົ່ງມີແຕ່ຄວາມປະສົບຜົນສຳເລັດດ້ວຍດີໃນໜ້າວຽກຂອງທ່ານ.

  ປະຈຸບັນທ່ານ ນາງ ພານິວັນ ລັດຕະນະໂກສົນ ມີດິນທັງໝົດ 31 ເຮັກຕາ ແລະສຳປະທານໄດ້ 150 ເຮັກຕາ.

แชร์