ໄຟຟ້າຫົງສາ ຮັບໃບຮັບຮອງມາດຕະການຖານຈັດການສິ່ງແວດລ້ອມສາກົນ

ວັນທີ 2 ມີນາ 2019 ທີ່ນະຄອນຫຼວງວຽງຈັນ, ບໍລິສັດ ໄຟຟ້າຫົງສາ ຈໍາກັດ ໄດ້ຈັດພິທີມອບ-ຮັບໃບຮັບຮອງມາດຕະການຖານຈັດການສິ່ງແວດລ້ອມສາ ກົນ ISO 14001: 2015 ໂດຍການເຂົ້າຮ່ວມຂອງ ທ່ານ ທອງພັດ ອິນທະວົງ ຮອງລັດຖະມົນຕີກະຊວງພະລັງງານ ແລະບໍ່ແຮ່ ແລະມອບໂດຍທ່ານ ປຣະ ວານທອງ ທອງໃຫຍ່ນະອາຍຸດທະຍາ ຜູ້ຈັດການຝ່າຍຮັບຮອງລະບົບພູມີພາກລູ່ມແມ່ນ້ຳຂອງ ບໍລິສັດ ບູໂຣເວີຣິທັດ ປະເທດໄທ ແລະຮັບໂດຍທ່ານ ຄະທາຢຸດ ຊູພູນ ຜູ້ອຳນວຍການໃຫຍ່ບໍລິສັດໄຟ ຟ້າຫົງສາ ຈຳກັດ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

  ທ່ານ ຄະທາຢຸດ ຊູພູນ ກ່າວວ່າ: ໂດຍໃນວັນທີ 30 ພະຈິກ 2009 ໄດ້ຈັດພິທີລົງນາມຂໍ້ຕົກລົງສັນຍາສໍາປະທານຮ່ວມກັນລະຫວ່າງລັດຖະບານແຫ່ງ ສປປ ລາວ ແລະໂຄງການໄຟຟ້າຫົງສາ ຊຶ່ງໄດ້ມີການກຳນົດ ແລະເບິ່ງແຍງຮັກ ສາສິ່ງແວດລ້ອມ ແລະສັງຄົມພາຍໃຕ້ ສັນຍາສຳປະທານ (CA) ນີ້ ໄວ້ຢ່າງຊັດເຈນ ໂດຍ ບໍລິສັດໄຟຟ້າຫົງສາ ຈໍາກັດ ໄດ້ມີຄວາມມຸ່ງໝັ້ນ ແລະຄວາມສຳຄັນຕໍ່ການບໍລິຫານຈັດການດ້ານຄວາມປອດໄພສຸຂະພາບອະນາໄມສິ່ງແວດລ້ອມ ແລະສັງຄົມ ໃຫ້ມີຄວາມສອດຄ່ອງພາຍ ໃຕ້ສັນຍາສຳປະທານ ແລະຈະຕ້ອງປະຕິບັດຕາມກົດໝາຍດ້ານສິ່ງແວດລ້ອມຂອງລາວຈິ່ງເປັນທີ່ມາຂອງການພັດທະນາລະບົບການຄຸ້ມຄອງ ແລະຕິດຕາມກວດສອບຄຸນນະພາບດ້ານສິ່ງແວດລ້ອມເພື່ອໃຫ້ໝັ້ນໃຈວ່າການດຳເນີນງານຂອງບໍລິສັດຈະບໍ່ສົ່ງຜົນກະທົບຕໍ່ສິ່ງແວດ ລ້ອມ ແລະຊຸມຊົນໂດຍໃນສັນຍາສຳປະທານໄດ້ລະບຸໄວ້ຢ່າງຊັດເຈນວ່າ ບໍລິສັດໄຟຟ້າຫົງສາ ຕ້ອງໄດ້ຮັບຮອງມາດຕະຖານການຈັດການສິ່ງແວດລ້ອມສາກົນ ISO 14001: 2015 ພາຍ ຫຼັງຈາກການເດີນເຄື່ອງຈ່າຍກະແສໄຟຟ້າຄົບທັງ 3 ໜ່ວຍຜະລິດພາຍໃນ 3 ປີ.

  ພັນທະກິດຫຼັກຂອງບໍລິສັດໄຟຟ້າຫົງສາ ບໍ່ພຽງແຕ່ເປັນຜູ້ດຳເນີນທຸລະກິດດ້ານພະລັງງານໄຟຟ້າເທົ່ານັ້ນແຕ່ຍັງມຸ່ງເນັ້ນການດຳເນີນທຸລະກິດຄວບຄູ່ໄປກັບການເບິ່ງແຍງຮັກສາສິ່ງແວດລ້ອມ ແລະເບິ່ງແຍງເອົາໃຈໃສ່ຊຸມຊົນ ໃນພື້ນທີ່ເພື່ອກ້າວສູ່ຄວາມຍືນຍົງດັ່ງທີ່ລະບຸໄວ້ໃນວິໄສທັດຂອງບໍລິສັດຄື: ການເປັນໂຮງໄຟຟ້າປາກບໍ່ແຮ່ນຳໜ້າໃນອາຊຽນໂດຍການເຮັດວຽກທີ່ເປັນເລີດສ້າງຄວາມເຊື່ອໝັ້ນ ແລະຄວາມສຸກສູ່ສັງຄົມ.

 ທ່ານ ປຣະວານທອງ ທອງໃຫຍ່ນະອາຍຸດທະຍາກ່າວວ່າ: ISO 14001: 2015 ແມ່ນມາດຕະຖານການຈັດການສິ່ງແວດລ້ອມທີ່ສາກົນ ແລະທົ່ວໂລກໃຫ້ການຍອມຮັບປະກອບດ້ວຍການຈັດການດ້ານສິ່ງແວດລ້ອມທີ່ມີປະສິດທິພາບ ແລະເປັນຫົວໃຈຂອງການດຳເນີນງານຈະຊ່ວຍໃຫ້ອົງກອນປະສົບຜົນສຳເລັດຢ່າງຍືນຍົງ, ມາດຕະຖານສະບັບນີ້ມີຈຸດປະສົງເພື່ອໃຊ້ສຳລັບອົງກອນທີ່ຕ້ອງການບໍລິຫານຈັດການກັບຄວາມຮັບຜິດຊອບດ້ານສິ່ງແວດລ້ອມຢ່າງເປັນລະບົບ ໂດຍໃຊ້ຂໍ້ກຳນົດທີ່ລະບຸໄວ້ໃນມາດຕະຖານການຈັດການສິ່ງແວດລ້ອມເປັນແນວທາງໃນການປະຕິບັດເພື່ອຕອບສະໜອງຕໍ່ຄວາມຄາດຫວັງຂອງລະບົບການຈັດການສິ່ງແວດລ້ອມເຊິ່ງປະກອບດ້ວຍການດຳເນີນງານໃຫ້ສອດຄ່ອງຕາມກົດໝາຍ ແລະ ພັນທະສັນຍາທີ່ກ່ຽວຂ້ອງ ແລະ ຄວາມສາມາດໃນການບັນລຸຈຸດປະສົງດ້ານການຈັດການສິ່ງແວດລ້ອມຂອງອົງກອນເພື່ອໃຫ້ເກີດຄຸນຄ່າຕໍ່ອົງກອນ, ຜູ້ມີສ່ວນຮ່ວມ, ສິ່ງແວດລ້ອມ ແລະສອດຄ່ອງກັບນະໂຍບາຍດ້ານສິ່ງແວດລ້ອມຂອງອົງກອນລວມເຖິງເພື່ອຄວາມຍືນຍົງດ້ານການບໍລິຫານການຈັດການສິ່ງແວດລ້ອມອີກດ້ວຍ.

ຂ່າວ: ກິ່ງລັດຕະນະ

แชร์