ນັກໂທດໄດ້ຮັບການໃຫ້ອະໄພໂທດມີ 1.791 ຄົນ

  ກອງປະຊຸມສະຫຼຸບວຽກງານອະໄພຍະໂທດປະຈໍາປີ 2020 ແລະວາງທິດທາງແຜນການປີ 2021 ໄດ້ຈັດຂຶ້ນໃນວັນທີ 10 ມີນາ ທີ່ຫໍປະຊຸມແຫ່ງຊາດ, ພາຍໃຕ້ການເປັນປະທານຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະການລົງທຶນ,ປະທານຄະນະກຳມະການອະໄພຍະໂທດລະດັບຊາດ, ມີຄະນະກໍາມະການອະໄພຍະໂທດລະດັບຊາດ, ປະທານຄະນະກໍາມະການອະໄພຍະໂທດລະດັບກະຊວງ, ແຂວງ-ນະຄອນຫຼວງເຂົ້າຮ່ວມ.

ທ່ານ ສອນໄຊ ສີພັນດອນ ກ່າວວ່າ: ກອງປະຊຸມຄັ້ງນີ້ຈະໄດ້ພ້ອມກັນສັງເກດຕີລາຄາ, ສະຫຼຸບຖອດຖອນບົດຮຽນດ້ານດີ-ດ້ານຕັ້ງໜ້າທີ່ຈະຕ້ອງໄດ້ເສີມຂະຫຍາຍ ແລະຊອກໃຫ້ເຫັນດ້ານອ່ອນຂໍ້ຄົງຄ້າງພ້ອມທັງສາເຫດໃນການຈັດຕັ້ງປະຕິບັດວຽກງານອະໄພຍະໂທດໃນປີ 2020 ເພື່ອປັບປຸງແກ້ໄຂໃຫ້ທັນກັບສະພາບການ ແລະວາງທິດ ທາງແຜນການຈັດຕັ້ງປະຕິບັດວຽກງານອະໄພຍະໂທດປະຈຳປີ 2021ກອງປະຊຸມໄດ້ແນະນໍາເນື້ອໃນຕົ້ນຕໍໃນການຈັດຕັ້ງລັດຖະບັນຍັດວ່າດ້ວຍການໃຫ້ອະໄພຍະໂທດ, ບາງເນື້ອໃນຄຳແນະນໍາແຈ້ງການຂອງຄະນະກຳມະການອະໄພຍະໂທດລະດັບຊາດແລະກອງເລຂາ, ໃນປີ 2020 ຜ່ານມາຄະນະກໍາມະການອະໄພຍະໂທດລະດັບຊາດ, ກອງເລຂາ ແລະຄະນະກໍາມະການອະໄພຍະໂທດລະດັບກະຊວງ, ແຂວງ-ນະຄອນຫຼວງ ໄດ້ມີຄວາມຮັບຜິດຊອບສູງໃນການຈັດຕັ້ງປະຕິບັດລັດຖະບັນຍັດຂອງປະທານປະເທດວ່າດ້ວຍການໃຫ້ອະໄພຍະໂທດ, ໂດຍການຈັດຕັ້ງເຊື່ອມຊຶມບັນດາເອກະສານກ່ຽວກັບວຽກງານອະໄພຍະໂທດໃຫ້ແກ່ຄະນະພັກ, ຄະນະນໍາ ແລະ ຄະນະກໍາມະການອະໄພຍະໂທດແຕ່ລະລະດັບ, ນັບທັງສັງຄົມ ແລະ ນັກໂທດໄດ້ມີຄວາມຮັບຮູ້ເຂົ້າໃຈ, ໃນເວລາຈັດຕັ້ງປະຕິບັດວຽກງານຕົວຈິງກໍໄດ້ເປັນເຈົ້າການຄົ້ນຄວ້າ, ກວດກາຄວາມຖືກຕ້ອງ, ເພື່ອໃຫ້ສອດຄ່ອງຕາມລັດຖະບັນຍັດທີ່ໄດ້ກໍານົດໄວ້, ຊຶ່ງເຫັນໄດ້ແນວທາງນະໂຍບາຍມະນຸດສະທໍາຂອງພັກ-ລັດທີ່ມີຕໍ່ນັກໂທດຜູ້ທີ່ມີຄວາມກ້າວໜ້າ, ຄືດັ່ງທີ່ພວກເຮົາຮູ້ນໍາກັນແລ້ວວ່າຈາກສະພາບການລະບາດຂອງພະຍາດໂຄວິດ-19 ໃນທົ່ວໂລກກໍຄືພາຍໃນປະເທດພົບຄວາມຫຍຸ້ງຍາກຫຼາຍໆດ້ານເປັນຕົ້ນຄວາມຫຍຸ້ງ ຍາກທາງດ້ານເສດຖະກິດການເງິນ-ເງິນຕາ, ບັນຫາຢາເສບຕິດ, ບັນຫາໄພທໍາມະຊາດ, ໂລກລະບາດ ແລະ ອື່ນໆ ການສະເໜີຂໍໃຫ້ອະໄພຍະໂທດຂອງຄະນະກໍາມະການອະໄພຍະໂທດລະດັບກະຊວງ, ແຂວງ-ນະຄອນຫຼວງປະຈໍາປີ 2020 ພົບຄວາມຫຍຸ້ງຍາກຊັກຊ້າຈໍານວນໜຶ່ງບໍ່ທັນຕາມກໍານົດເວລາ, ເຖິງແນວໃດກໍຕາມຄະນະກໍາມະການອະໄພຍະໂທດລະດັບຕ່າງໆ ກໍໄດ້ເອົາໃຈໃສ່ໃນການປະຕິບັດໜ້າທີ່ດ້ວຍຄວາມຮັບຜິດຊອບສູງບໍ່ໄດ້ປະລະວຽກງານອະໄພຍະໂທດເຮັດໃຫ້ການຈັດຕັ້ງປະຕິບັດວຽກງານອະໄພຍະໂທດປະຈໍາປີ 2020 ດໍາເນີນໄປເປັນປົກກະຕິ, ສະແດງອອກຍ້ອນຄວາມຮັບຜິດຊອບຂອງຄະນະພັກ, ຄະນະນໍາ ແລະຄະນະກໍາມະການອະໄພຍະໂທດແຕ່ລະດັບທີ່ໄດ້ພ້ອມກັນເຮັດຫຼ້ອນໜ້າທີ່ການເມືອງທີ່ພັກ-ລັດມອບໝາຍ, ຮັບປະກັນປະຕິບັດຖືກຕ້ອງຕາມຫຼັກການທັນຕາມກໍານົດເວລາທີ່ໄດ້ກໍານົດໄວ້ໃນລັດຖະບັນຍັດດັ່ງນັ້ນປະທານປະເທດຈຶ່ງໄດ້ຕົກລົງໃຫ້ອະໄພຍະໂທດແກ່ນັກໂທດປະຈໍາປີ 2020 ຈໍານວນທັງໝົດ 1.791 ຄົນ, ຍິງ 280 ຄົນ.

  ທ່ານ ຄຳສານ ສຸວົງ ຫົວໜ້າອົງການ ໄອຍະການປະຊາຊົນສູງສຸດຕາງໜ້າຄະນະກຳມະການອະໄພຍະໂທດລະດັບຊາດກ່າວວ່າ: ນັກໂທດທີ່ໄດ້ຮັບການໃຫ້ອະໄພຍະໂທດຕາມລັດຖະດຳລັດຂອງປະທານປະເທດປະຈໍາປີ 2020 ມີທັງໝົດ 1.791 ຄົນ, ຍິງ 280 ຄົນ, ຕ່າງປະເທດ 34 ຄົນ, ຍິງ 8 ຄົນ ໃນນີ້ຕະຫຼອດຊີວິດ 28 ຄົນ, ຍິງ 5 ຄົນ, ຈໍານວນນັກໂທດທີ່ໄດ້ເງື່ອນໄຂຫຼຸດຜ່ອນໂທດມີທັງໝົດ 1.761 ຄົນ, ຍິງ 277 ຄົນ, ນັກໂທດຄະດີຢາເສບຕິດ 1.676 ຄົນ, ຍິງ 255 ຄົນ, ຕ່າງປະເທດ 26 ຄົນ, ຍິງ 8 ຄົນ, ນັກໂທດຄະດີທົ່ວໄປ 84 ຄົນ, ຍິງ 22 ຄົນ, ຕ່າງປະເທດ 8 ຄົນ, ນັກໂທດຄະດີກະທໍາຜິດຕໍ່ຄວາມສະຫງົບຂອງຊາດ 1 ຄົນ, ຈໍານວນນັກໂທດທີ່ໄດ້ເງື່ອນໄຂປ່ອຍຕົວມີທັງໝົດ 30 ຄົນ, ຍິງ 3 ຄົນ, ນັກໂທດ ຄະດີຢາເສບຕິດມີ 30 ຄົນ, ຍິງ 3 ຄົນ ນອກນັ້ນກໍໄດ້ພິຈາລະນາຕົກລົງ ໃຫ້ອະໄພຍະໂທດປ່ອຍຕົວໃນຊ່ວງໄລຍະປ້ອງກັນສະກັດກັ້ນ ແລະຄວບຄຸມການແຜ່ລະບາດຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ໂຄວິດ-19 ຈໍານວນທັງໝົດ  970 ຄົນ, ຍິງ 135 ຄົນ, ຕ່າງປະເທດ 17 ຄົນ, ຍິງ 1 ຄົນ,ສັງລວມແລ້ວ, ພາຍຫຼັງມີລັດຖະບັນຍັດຂອງປະທານປະເທດວ່າດ້ວຍການໃຫ້ອະໄພຍະໂທດ, ການຈັດຕັ້ງປະຕິບັດວຽກງານອະໄພຍະໂທດຂອງຄະນະກໍາມະການອະໄພຍະໂທດທຸກລະດັບໄດ້ດໍາເນີນໄປຢ່າງຖືກຕ້ອງ ແລະມີຜົນສໍາເລັດ.

ຂ່າວ: ພູວັນ

ຮູບພາບ: ໜັງສືພິມເສດຖະກິດ-ສັງຄົມ

แชร์