ຫາລືວຽກຄຸ້ມຄອງໄພພິບັດ ທົ່ວປະເທດ

  ຂປລ. ໃນວັນທີ 10 ມີນາ 2021 ທີ່ນະຄອນຫຼວງວຽງຈັນ, ກົມສັງຄົມສົງເຄາະກະຊວງແຮງງານ ແລະສະຫວັດດີການສັງຄົມໄດ້ຈັດກອງປະຊຸມວຽກງານຄຸ້ມຄອງໄພພິບັດທົ່ວປະເທດປະຈໍາປີ 2020 ເພື່ອຮັບຟັງການສະເໜີບົດສະຫຼຸບການຈັດຕັ້ງປະຕິບັດວຽກງານຄຸ້ມຄອງໄພພິບັດໄລຍະ 5 ປີຜ່ານມາ (2016-2020) ແລະທິດທາງແຜນການ 5 ປີ (2021-2025) ລວມທັງແຜນວຽກຈຸດສຸມ ແລະ ການກຽມຄວາມພ້ອມຕອບໂຕ້ໄພພິບັດປີ 2021 ລວມທັງການສະເໜີແລກປ່ຽນບົດ ຮຽນການຈັດຕັ້ງປະຕິບັດວຽກງານຄຸ້ມຄອງໄພພິບັດຢູ່ຂັ້ນທ້ອງຖິ່ນເພື່ອສ້າງຄວາມຮັບຮູ້ເຂົ້າໃຈຢ່າງກວ້າງຂວາງ ແລະມີຄວາມເປັນເອກະພາບກັນໃນການພັດທະນາວຽກ ງານຄຸ້ມຄອງໄພພິບັດພ້ອມທັງການວາງມາດຕະການຕ່າງໆ ໃນການຈັດຕັ້ງປະຕິບັດບັນດາຄາດໝາຍວຽກຄຸ້ມຄອງໄພພິບັດຕາມທີ່ໄດ້ກຳນົດໄວ້ໃຫ້ມີປະສິດທິຜົນດີຂຶ້ນ.

  ທ່ານ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະສະຫວັດດີການສັງຄົມທັງເປັນຮອງປະທານຜູ້ປະຈໍາການຄະນະກໍາມະການຄຸ້ມຄອງໄພພິບັດຂັ້ນສູນ ກາງໄດ້ກ່າວວ່າ: ໃນໄລຍະ 5 ປີ ຜ່ານມາໄດ້ມີເຫດການໄພພິບັດທໍາມະຊາດເກີດຂຶ້ນຫຼາຍຄັ້ງເປັນຕົ້ນນໍ້າຖ້ວມ, ດິນເຈື່ອນ, ລົມພາຍຸ, ພະຍາດລະບາດທັງຄົນ ແລະສັດ, ອັນທີ່ພົ້ນເດັ່ນແມ່ນເຫດການໄພນໍ້າຖ້ວມປີ 2018 ສາເຫດມາຈາກເຂື່ອນເຊປ່ຽນ-ເຊນໍ້ານ້ອຍ ແຕກພັງສົ່ງຜົນກະທົບຕໍ່ປະຊາຊົນຢູ່ ເມືອງສະໜາມໄຊ ແຂວງອັດຕະປື, ໄພພິບັດນໍ້າຖ້ວມປີ 2019 ສົ່ງຜົນກະທົບຕໍ່ປະຊາຊົນຢູ່ບັນດາແຂວງພາກກາງ ແລະພາກໃຕ້ ສປປ ລາວ ແລະໄພນໍ້າຖ້ວມປີ 2020 ທີ່ສົ່ງຜົນກະທົບຢ່າງໜັກ ໜ່ວງຢູ່ແຂວງສະຫວັນນະເຂດ, ລວມທັງບັນຫາຜົນກະທົບຈາກການລະບາດຂອງພະຍາດໂຄວິດ-19, ເຖິງແນວໃດກໍຕາມໃນໄລຍະຜ່ານມາລວມທັງປີ 2020, ບັນດາຂະແໜງການທີ່ກ່ຽວຂ້ອງໃນຄະນະກໍາມະການຄຸ້ມຄອງໄພພິບັດຂັ້ນສູນກາງ ແລະແຂວງກໍ່ໄດ້ເອົາໃຈໃສ່ປະຕິບັດພາລະບົດບາດ ແລະໜ້າທີ່ຂອງຕົນຢ່າງຕັ້ງໜ້າ, ຊຶ່ງໄດ້ມີຜົນສຳເລັດຫຼາຍດ້ານໂດຍໄດ້ເພີ່ມທະວີໃນການປະຕິບັດບົດບາດດ້ານມະຫາພາກຢ່າງຕັ້ງໜ້າດ້ວຍການຄົ້ນຄວ້າສ້າງກົດໝາຍ ແລະລະບຽບການຕ່າງໆພ້ອມທັງຕິດຕາມຊຸກຍູ້ຈັດຕັ້ງປະຕິບັດຢ່າງກວ້າງຂວາງ, ວຽກງານການປ້ອງກັນໄພພິບັດ ແລະ ການກຽມຄວາມພ້ອມຮັບມືໄພພິບັດກໍ່ໄດ້ຮັບການຈັດຕັ້ງປະຕິບັດ ແລະ ມີຜົນສໍາເລັດ; ວຽກງານຄວບຄຸມ ແລະ ຕອບໂຕ້ສຸກເສີນໄພພິບັດກໍ່ສາມາດຮັບປະກັນໄດ້ຄວາມວ່ອງໄວ ແລະ ທັນການໃນການແກ້ໄຂຊ່ວຍເຫຼືອຜູ້ປະສົບໄພພິບັດເປັນຕົ້ນການປະ ກາດແຈ້ງເຕືອນໄພ ແລະຍົກຍ້າຍປະຊາຊົນລວມທັງຊັບສິນໄປບ່ອນຫຼົບໄພຊົ່ວຄາວ, ການຊອກຄົ້ນ-ຄົ້ນຫາ ແລະກູ້ໄພ, ການຈັດຫາທີ່ພັກຊົ່ວຄາວ ແລະ ສະໜອງເຄື່ອງບັນເທົາທຸກສຸກເສີນປະເພດອາຫານ, ນໍ້າຖ້ວມ, ການປິ່ນປົວສຸຂະພາບ;ວຽກງານແກ້ໄຂຟື້ນຟູທັງໄລຍະສຸກເສີນ ແລະຫຼັງໄພພິບັດກໍ່ໄດ້ຮັບການຈັດຕັ້ງປະຕິບັດຢ່າງມີຜົນສໍາເລັດເປັນຕົ້ນໃນຂະແໜງໂຍທາທິການ ແລະຂົນສົ່ງ,  ກະສິກໍາ ແລະປ່າໄມ້, ສາທາລະນະສຸກ ແລະສຶກສາທິການ ແລະກີລາ,ອັນທີ່ພົ້ນເດັ່ນແມ່ນການແກ້ໄຂຟື້ນຟູຫຼັງໄພພິບັດຢູ່ເມືອງສະໜາມໄຊແຂວງອັດຕະປື, ເຮັດໃຫ້ປະຊາຊົນທີ່ໄດ້ຮັບຜົນກະທົບໃນ 19 ບ້ານ ແລະ 6 ບ້ານທີ່ຖືກກະທົບໜັກໄດ້ຮັບການຊ່ວຍເຫຼືອຟື້ນຟູຊີວິດການເປັນຢູ່ເຂົ້າສູ່ສະພາບປົກກະຕິ ແລະດີຂຶ້ນ, ການປຸກສ້າງເຮືອນຖາວອນໄດ້ສໍາເລັດຫຼາຍ 100 ຫຼັງ, ໂຄງລ່າງພື້ນຖານດ້ານເສັ້ນທາງ, ຊົນລະປະທານ, ໂຮງຮຽນ, ໂຮງ ໝໍ, ສຸກສາລາ, ອື່ນໆ ກໍ່ໄດ້ຮັບການກໍ່ສ້າງຄືນໃໝ່, ປະຊາຊົນຫຼາຍຄອບຄົວກໍ່ໄດ້ຮັບທີ່ດິນສໍາລັບການປຸກເຮືອນ ແລະເພື່ອທໍາການຜະລິດກະສິກໍາ.

  ທ່ານ ຄຳແພງ ໄຊສົມແພງ ກ່າວຕື່ມວ່າ: ເຖິງແມ່ນວ່າພວກເຮົາຈະສາມາດຍາດໄດ້ຜົນສໍາເລັດຫຼາຍດ້ານ, ແຕ່ກໍ່ສັງເກດເຫັນວ່າຍັງມີຂໍ້ຫຍຸ້ງຍາກ ແລະສິ່ງທ້າທາຍຫຼາຍປະການທີ່ຈະຕ້ອງໄດ້ພ້ອມກັນຄົ້ນຄ້ວາດ້ານວິຊາການ ແລະວາງແຜນການໃຫ້ມີຄວາມສອດຄ່ອງກັບສະພາບຄວາມເປັນຈິງ ແລະທ່າແຮງບົ່ມຊ້ອນທີ່ມີຢູ່ແຕ່ລະທ້ອງ ຖິ່ນເພື່ອຊອກຫາວິທີການ ແລະ ມີມາດຕະການໃນການຈັດຕັ້ງປະຕິບັດວຽກງານແຕ່ລະດ້ານເພື່ອສ້າງຄວາມເຂັ້ມແຂງໃນການຈັດຕັ້ງປະຕິບັດບັນດາເປົ້າໝາຍ, ແຜນວຽກຈຸດສຸມ, ຄາດໝາຍ ແລະຕົວຊີ້ບອກຕາມທີ່ໄດ້ກຳນົດໄວ້ໃນທິດທາງແຜນການປີ 2021 ໃຫ້ບັນລຸຜົນສໍາເລັດຕາມແຜນທີ່ວາງໄວ້ລວມທັງວຽກງານປ້ອງກັນ, ການຄວບຄຸມຊ່ວຍເຫຼືອສຸກເສີນ ແລະການແກ້ໄຂຟື້ນຟູຫຼັງໄພພິບັດ.

แชร์