ປະກາດແຕ່ງຕັ້ງ ຫົວໜ້າຄະນະໂຄສະນາອົບຮົມສະຫວັນນະເຂດ

ໂດຍ: ຂ່າວສະຫວັນ

  ທີ່ຫ້ອງປະຊຸມຫ້ອງວ່າການປົກຄອງແຂວງສະຫວັນນະເຂດໃນວັນທີ 4 ມີນາ 2021, ໄດ້ຈັດພິທີປະກາດແຕ່ງຕັ້ງພະນັກງານ ແລະເຊັນບົດບັນທຶກການມອບ-ຮັບໜ້າທີ່ຂອງພະນັກງານການນຳຂັ້ນສູງຄະນະໂຄສະນາອົບຮົມແຂວງເປັນກຽດເຂົ້າຮ່ວມຂອງ ທ່ານ ພູວັງ ເກດແກ້ວພົມພອນ ຮອງເລຂາຄະນະບໍລິຫານງານພັກແຂວງສະຫວັນນະເຂດ, ມີພະແນກການກົມກອງອ້ອມຂ້າງແຂວງ, ຮັກສາການຫົວໜ້າຫ້ອງວ່າການປົກຄອງແຂວງ,ຄະນະຈັດຕັ້ງແຂວງ,ຄະນະອຳນວຍການໂຮງຮຽນການເມືອງ-ການປົກຄອງແຂວງພ້ອມດ້ວຍຄະນະນຳແລະພະນັກງານພາຍໃນຄະນະຈັດຕັ້ງແຂວງ.

  ໃນພິທີ,ທ່ານນາງ ຫົງຄຳ ໄຊຍະຄົມ ຮອງຫົວໜ້າຄະນະໂຄສະນາອົບຮົມແຂວງກໍ່ໄດ້ຂຶ້ນຜ່ານບົດສະຫຼຸບການຊີ້ນຳ-ນຳພາວຽກງານຂອງຄະນະໂຄສະນາອົບຮົມແຂວງໃນໄລຍະຜ່ານມາພ້ອມທິດທາງແຜນການໃນ 5 ປີ ຕໍ່ໜ້າຈາກນັ້ນ, ຕາງໜ້າຄະນະຈັດຕັ້ງແຂວງກໍ່ໄດ້ຂຶ້ນຜ່ານຂໍ້ຕົກລົງຂອງທ່ານເຈົ້າແຂວງສະຫວັນນະເຂດ ເລກທີ 0202/ຈຂ.ສຂ, ລົງວັນທີ 19/ 01/2021 ວ່າດ້ວຍການແຕ່ງຕັ້ງພະນັກງານຊຶ່ງໄດ້ຕົກລົງແຕ່ງຕັ້ງທ່ານ ຄຳວິໄສ ຜຸຍຍະວົງ ກຳມະການປະຈຳພັກແຂວງເປັນຫົວ ໜ້າຄະນະໂຄສະນາອົບຮົມແຂວງ, ໃນພິທີໄດ້ມີການເຊັນບົດບັນທຶກການມອບ-ຮັບໜ້າທີ່ລະຫວ່າງທ່ານ ແກ້ວອຸດອນ ແກ້ວດວງດີ ຮອງຫົວໜ້າຄະນະໂຄສະນາອົບຮົມແຂວງ ແລະທ່ານ ຄຳວິໄສ ຜຸຍຍະວົງ ຫົວໜ້າຄະນະໂຄສະນາອົບຮົມແຂວງຄົນໃໝ່.

 ໃນຕອນທ້າຍຂອງກອງປະຊຸມ, ກໍ່ໄດ້ຮັບຟັງການໃຫ້ທິດຊີ້ນຳຈາກທ່ານຮອງເລຂາພັກແຂວງໂດຍທ່ານໄດ້ຍົກໃຫ້ເຫັນເຖິງຄວາມສຳຄັນ ແລະຈຳເປັນໃນການປັບປຸງການຈັດຕັ້ງພາຍໃນຄະນະໂຄສະນາອົບຮົມແຂວງໃນຄັ້ງນີ້ພ້ອມທັງຊີ້ນຳບາງວຽກງານທີ່ຈະຕ້ອງພ້ອມກັນສືບຕໍ່ເອົາໃຈໃສ່ໃນຕໍ່ໜ້າຕື່ມອີກໂດຍສະເພາະແມ່ນວຽກງານການເມືອງ-ແນວຄິດ ທີ່ເປັນວຽກງານສຳຄັນຕົ້ນຕໍກວ່າໝູ່. 

แชร์