ມອບ-ຮັບໜ້າທີ່ ເຈົ້າເມືອງຄູນຄຳ

ຂ່າວ: ກອງຄຳ

ພິທີມອບ-ຮັບໜ້າທີ່ທ່ານ ເຈົ້າເມືອງຄູນຄຳລະຫວ່າງຜູ້ເກົ່າກັບຜູ້ໃໝ່ແມ່ນຈັດຂຶ້ນໃນວັນທີ 4 ມີນາ 2021 ໂດຍການເປັນກຽດເຂົ້າຮ່ວມຂອງທ່ານ ວົງເພັດ ຈິດ ປັນຍາ ຮອງເລຂາພັກແຂວງຄໍາມ່ວນ, ມີບັນດາພາກສ່ວນທີ່ກ່ຽວຂ້ອງຈາກຂັ້ນແຂວງ, ບັນດາຂະແໜງການຕ່າງໆຂັ້ນເມືອງຕະຫຼອດເຖິງພະນັກງານຫຼັກແຫຼ່ງອ້ອມຂ້າງເມືອງເຂົ້າຮ່ວມ.

 ທ່ານ ແກ້ວ ວົງພະຈັນ ຮອງຫົວໜ້າຄະນະຈັດຕັ້ງແຂວງໄດ້ຜ່ານຂໍ້ຕົກລົງຂອງທ່ານເຈົ້າແຂວງຄຳມ່ວນວ່າດ້ວຍການຍົກຍ້າຍ, ແຕ່ງຕັ້ງທ່ານເຈົ້າເມືອງຄູນຄຳຊຶ່ງໄດ້ຕົກ ລົງຍົກຍ້າຍທ່ານ ຄຳໝັ້ນ ສໍປະເສີດ ເຈົ້າເມືອງຄູນຄຳ (ຜູ້ເກົ່າ) ໄປຮັບຜິດຊອບໜ້າທີ່ໃໝ່ຢູ່ຂັ້ນແຂວງ ແລະຕົກລົງແຕ່ງຕັ້ງທ່ານ ແກ້ວວິໄລ ໄຊຍະບຸດ ຫົວໜ້າພະແນກພາຍໃນແຂວງຄຳມ່ວນເປັນເຈົ້າເມືອງຄູນຄຳ (ຜູ້ໃໝ່).

  ທ່ານ ອິນທະວົງ ແກ້ວອ່ອນໄຂ ຮອງເຈົ້າເມືອງຄູນຄຳໄດ້ຜ່ານຜົນງານການເຄື່ອນໄຫວນຳພາ-ຊີ້ນຳຕະຫຼອດໄລຍະທີ່ທ່ານເຈົ້າເມືອງໄດ້ຖືກມອບໝາຍຈາກຂັ້ນເທິງໃຫ້ມາດຳລົງຕຳແໜ່ງເປັນເຈົ້າເມືອງຊຶ່ງໄດ້ຈັດຕັ້ງປະຕິບັດຕາມສິດ, ພາລະບົດບາດໜ້າທີ່ຄວາມຮັບຜິດຊອບ ແລະການມອບໝາຍເຮັດໃຫ້ວຽກງານມີຜົນສຳເລັດໃນຫຼາຍ ດ້ານໂດຍສະເພາະໄດ້ຊີ້ນຳ-ນຳພາ ອົງການປົກຄອງທ້ອງຖິ່ນໃນທົ່ວເມືອງຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຕິດພັນກັບການລົງກໍ່ສ້າງຮາກຖານການ ເມືອງ ແລະວຽກງານປ້ອງກັນຊາດ-ປ້ອງກັນຄວາມສະຫງົບເຮັດໃຫ້ຮາກຖານບ້ານໃນທົ່ວເມືອງມີສະຖຽນລະພາບທາງດ້ານການເມືອງທີ່ໜັກແໜ້ນ, ສັງຄົມມີຄວາມ ສະຫງົບ ແລະຄວາມເປັນລະບຽບຮຽບຮ້ອຍໂດຍພື້ນຖານ, ເປັນເຈົ້າການນຳພາແກ້ໄຂ ແລະປັບປຸງຍົກລະດັບຊີວິດການເປັນຢູ່ຂອງປະຊາຊົນບັນດາເຜົ່າດີຂຶ້ນຢ່າງຈະແຈ້ງ ສາມາດຫຼຸດພົ້ນອອກຈາກຄວາມທຸກຍາກເທື່ອລະກ້າວ, ປຸກລະດົມມະຫາຊົນເປັນເຈົ້າການປະກອບສ່ວນເຂົ້າໃນການປົກປັກຮັກສາແລະສ້າງສາພັດທະນາເມືອງຄູນຄຳໃຫ້ມີໃບໜ້າໃໝ່ຂຶ້ນເປັນກ້າວໆ. ຈາກນັ້ນທ່ານ ສຸລິຍົງ ໂພຄຳ ຮອງເລຂາພັກເມືອງຄູນຄຳໄດ້ຜ່ານບົດບັນທຶກການມອບ-ຮັບໜ້າທີ່ ພ້ອມນັ້ນກໍ່ໄດ້ລົງນາມເຊັນບົດບັນທຶກການມອບ-ຮັບລະຫວ່າງ ທ່ານ ຄຳໝັ້ນ ສໍປະເສີດ ເຈົ້າເມືອງຄູນຄຳຜູ້ເກົ່າ ແລະທ່ານ ແກ້ວວິໄລ ໄຊຍະບຸດ ເຈົ້າເມືອງຄູນຄຳຜູ້ໃໝ່.

  ໃນພິທີ ທ່ານ ວົງເພັດ ຈິດປັນຍາ ຮອງເລຂາພັກແຂວງຄຳມ່ວນໄດ້ມີຄຳເຫັນວ່າ: ໃນການຍົກຍ້າຍ, ແຕ່ງຕັ້ງໜ້າທີ່ຂອງເຈົ້າເມືອງຄູນຄຳໃນຄັ້ງນີ້ແມ່ນໃຫ້ຖືວ່າເປັນວຽກງານປົກກະຕິ, ເປັນການສັບປ່ຽນໝູນວຽນວຽກງານເຮັດໃຫ້ພະນັກງານ-ສະມາຊິກພັກກຳໄດ້ສະພາບການໃນແຕ່ລະຂົງເຂດວຽກງານ ແລະແມ່ນຄວາມຮຽກຮ້ອງຕ້ອງການຂອງໜ້າທີ່ວຽກງານພາຍໃນແຂວງ; ສຳລັບຜູ້ທີ່ຖືກຍົກຍ້າຍມາຮັບໜ້າທີ່ໃໝ່ຈະຕ້ອງໄດ້ບຸກບືນ-ສູ້ຊົນ ແລະ ຍົກສູງບົດບາດການນຳພາຂອງຕົນຕໍ່ວຽກງານວິຊາສະເພາະໃຫ້ສູງຂຶ້ນ, ປັບປຸງແບບແຜນວິທີນຳພາ, ແບບແຜນວິທີເຮັດວຽກ, ເຕົ້າໂຮມຄວາມສາມັກຄີພາຍໃນໃຫ້ກວ້າງຂວາງ, ໜັກແໜ້ນ ແລະ ຮຽກຮ້ອງມາຍັງພະນັກງານ-ສະມາຊິກພັກພາຍໃນເມືອງຈົ່ງໄດ້ໃຫ້ການສະໜັບສະໜູນແກ່ທ່ານເຈົ້າເມືອງຜູ້ທີ່ມາຮັບຜິດຊອບໜ້າທີ່ໃໝ່ເພື່ອເຮັດສຳເລັດໜ້າທີ່ໆການຈັດຕັ້ງຂັ້ນເທິງມອບໝາຍໃຫ້.

• 10/03/2021