ວາງສີລາລຶກສ້າງອະນຸສາວະລີຮູບຫຼໍ່ເຄິ່ງຄີງ ປະທານໄກສອນ ພົມວິຫານ

ໂດຍ: ຂ່າວສະຫວັນ

ໃນທ້າຍອາທິດທີ່ຜ່ານມານີ້, ຢູ່ທີ່ເດີ່ນຫ້ອງວ່າການປົກຄອງ ເມືອງວິລະບູລີ ແຂວງສະຫວັນນະເຂດ ໄດ້ມີພິທີວາງສີລາລຶກໂຄງການກໍ່ສ້າງອະນຸສາວະລີ ແລະສ້າງຕັ້ງຮູບຫຼໍ່ເຄິ່ງຄີງປະທານໄກສອນ ພົມວິຫານ ຜູ້ນໍາທີ່ແສນເຄົາລົບຮັກຂອງປວງຊົນລາວເຮົາ. ເຂົ້າຮ່ວມໃນພິທີມີທ່ານ ພູວັງເກດ ແກ້ວພົມພອນ ຮອງເລຂາຄະນະບໍລິຫານງານພັກແຂວງ,ທ່ານ ບົວສອນ ມະຫາວົງ ຫົວໜ້າຄະນະຈັດຕັ້ງແຂວງ, ທ່ານ ຄໍາຜຸຍ ສີບຸນເຮືອງ ເຈົ້າເມືອງວິລະບູລີ, ມີບັນດາທ່ານການນໍາຂອງແຂວງ, ການນໍາຂອງເມືອງ, ບັນດາທ່ານເຈົ້າເມືອງອ້ອມຂ້າງ, ຄະນະຮັບຜິດຊອບອະນຸສອນສະຖານໄກສອນ ພົມວິຫານ, ການນໍາບໍລິສັດຊືເຝິງລ້ານຊ້າງມີເນໂຣນສ໌ລິມິເຕັດ, ພ້ອມດ້ວຍມວນຊົນຊາວ ເມືອງວິລະບູລີ ເຂົ້າຮ່ວມຢ່າງພ້ອມພຽງ.

   ທ່ານ ຄໍາຜຸຍ ສີບຸນເຮືອງ ກ່າວວ່າ: ການກໍ່ສ້າງອະນຸສາວະລີ ປະທານ ໄກສອນ ພົມວິຫານ ທີ່ເມືອງວິລະບູລີດິນແດນວິລະຊົນຄົນອາດຫານໃນຄັ້ງນີ້ແມ່ນມີຄວາມໝາຍຄວາມສໍາຄັນທາງດ້ານການເມືອງຢ່າງເລິກເຊິ່ງທັງເປັນການແຈ້ງຂ່າວໃຫ້ຊາວເມືອງວິລະບູລີໄດ້ຮັບຮູ້ແຈ້ງຕື່ມກ່ຽວກັບເສັ້ນທາງປະຕິວັດ ແລະ ພາລະກິດອັນຍິ່ງໃຫຍ່ຂອງປະທານ ໄກສອນ ພົມວິຫານ ທີ່ມີຕໍ່ການປະຕິວັດກໍາມະຊີບຂອງລາວກໍ່ຄືທົ່ວໂລກຮັບຮູ້, ໂຄງການດັ່ງກ່າວນີ້ມີເນື້ອທີ່ທັງໝົດ 1.600 ຕາແມັດ ໂດຍນໍາໃຊ້ທຶນຮອນງົບປະມານຈາກການປະກອບສ່ວນຂອງບໍລິສັດລ້ານຊ້າງມີໂຣນສ໌ ລິມິເຕັດ, ບັນດານັກທຸລະກິດ ແລະບໍລິສັດພາຍໃນເມືອງ, ທັງນີ້ກໍ່ເພື່ອໃຫ້ລູກຫລານຜູ້ສືບທອດໄດ້ຮຽນຮູ້ຄຸນສົມບັດສິນທໍາປະຕິວັດ, ທັງເປັນບ່ອນສຶກສາອົບຮົມການເມືອງແນວຄິດປູກຈິດສໍານຶກໃຫ້ຄົນຮຸ່ນໃໝ່, ເປັນບ່ອນປະຕິຍານຕົນຮັບມະຫາຊົນກ້າວໜ້າເຂົ້າອົງການຈັດຕັ້ງມະຫາຊົນ ແລະຈັດພິທີທີ່ສໍາຄັນໃນວັນສໍາຄັນຕ່າງໆຂອງຊາດກໍ່ຄືຂອງເມືອງ, ໃນນີ້ປະກອບມີຮູບຫລໍ່ເຄິ່ງຄີງສູງ 0,78 ແມັດ ຂອງປະທານໄກສອນ ພົມວິຫານ, ໂຄງສ້າງເສດຕະສັດປະກອບມີການຕົບແຕ່ງເດີ່ນສວນ, ມີລະບົບໄຟຟ້າ, ນໍ້າປະປະປາ, ມີຮົ້ວອ້ອມ ແລະອື່ນໆ.

  ຈາກນັ້ນບັນດາການນໍາກໍ່ໄດ້ວາງສີລາເລີກ, ຮ່ວມກັນຕັດແຜ່ນຜ້າ ແລະລັ່ນຄ້ອງ 9 ບາດ ເພື່ອເປີດພິທີວາງສີລາເລີກໂຄງການໃນຄັ້ງນີ້ຢ່າງເປັນທາງການ.

ຮູບພາບ: ໜັງສືພິມເສດຖະກິດ-ສັງຄົມ

แชร์