ທ່າແຕງຕ້ອງການທຶນຟື້ນຟູ ຫຼັງໄພພິບັດ 7 ຕື້ກວ່າກີບ

ຂ່າວ: ລັດຕະນາ ຄຳສົມພູ

  ໃນຕົ້ນເດືອນມີນາ 2021 ນີ້, ຄະນະກຳມະການຄຸ້ມຄອງໄພພິບັດຂັ້ນເມືອງໄດ້ສະຫຼຸບການຈັດຕັ້ງປະຕິບັດການຄຸ້ມຄອງໄພພິບັດ, ຄຸ້ມຄອງກອງທຶນຂັ້ນເມືອງ ແລະ ຄວາມຕ້ອງການທຶນຟື້ນຟູຫຼັງໄພພິບັດຂັ້ນເມືອງປະຈຳປີ 2021 ໂດຍການເປັນປະທານຂອງທ່ານ ແສງສຸບັນ ໄຊສະຫວັນ ປະທານຄຸ້ມຄອງໄພພິບັດຂັ້ນເມືອງ,ມີຄະນະກຳມະການຄວບຄຸມໄພພິບັດຂັ້ນເມືອງເຂົ້າຮ່ວມ.

  ທ່ານ ສີສັກດາ ແສງນາລີວົງ ຫົວໜ້າຫ້ອງແຮງງານ ແລະສະຫວັດດີການສັງຄົມເມືອງທ່າແຕງທັງເປັນຮອງປະທານຄະນະກຳມະການຄວບຄຸມໄພພິບັດ, ຄຸ້ມຄອງ ກອງທຶນຂັ້ນເມືອງກ່າວວ່າ: ຄະນະກຳມະການຄຸ້ມຄອງໄພພິບັດຂັ້ນເມືອງໄດ້ເຮັດໜ້າທີ່ຕອບໂຕ້, ກູ້ໄພສຸກເສີນແລະຟື້ນຟູສະພາບການຕ່າງໆທີ່ເກີດຂຶ້ນຄືນສູ່ປົກກະຕິເປັນຕົ້ນ: ລົມພະຍຸ, ນໍ້າຖ້ວມ, ແຫ້ງແລ້ງ, ແຜ່ນດິນໄຫວ, ດິນເຊາະເຈື່ອນ, ສັດຕູພືດ, ພະຍາດຄົນ, ພະຍາດສັດລະບາດ, ອັກຄີໄພ ແລະອື່ນໆຊຶ່ງໃນປີຜ່ານມາໄດ້ສ້າງຄວາມເສຍຫາຍ 11 ຕື້ກວ່າກີບ ເປັນຕົ້ນ: ຂະແໜງກະສິກຳແລະປ່າໄມ້ (ວຽກງານປູກຝັງ, ວຽກງານຊົນລະປະທານ) ມູນຄ່າ 6 ຕື້ກວ່າກີບ, ຂະແໜງໂຍທາທິການ ແລະຂົນສົ່ງ (ສ້ອມແປງເສັ້ນທາງ) ມູນຄ່າ 5 ຕື້ກວ່າກີບ.

 ທ່ານໃຫ້ຮູ້ຕື່ມອີກວ່າ: ສຳລັບແຜນຄວາມຕ້ອງການທຶນຟື້ນຟູຫຼັງໄພພິບັດປີ 2021 ນີ້ແມ່ນ 7 ຕື້ກວ່າກີບ ໂດຍຈະສຸມໃສ່ 3 ຂະແໜງການເປັນບູລິມະສິດພິເສດເຊັ່ນ: ຂະແໜງກະສິກຳ ແລະປ່າໄມ້ມີ 3 ໂຄງການມູນຄ່າ 1,8 ຕື້ກີບ, ຂະແໜງໂຍທາທິການ ແລະ ຂົນສົ່ງມີ 4 ໂຄງການມູນຄ່າ 5 ຕື້ກວ່າກີບ ແລະ ຂະແໜງແຮງງານ ແລະສະຫວັດດີການສັງຄົມເມືອງມີ 1 ໂຄງການມູນຄ່າ 5 ລ້ານກວ່າກີບ.


ຮູບພາບ: ໜັງສືພິມເສດຖະກິດ-ສັງຄົມ

แชร์