ຫຼວງນໍ້າທາ ຊຸກຍູ້ເສຍຄ່າທາງ ແລະທີ່ດິນ

  ວັນທີ 3 ມີນາ 2021 ທີມງານສ່ວຍສາອາກອນປະຈຳແຂວງ ແລະທະນາຄານການຄ້າຕ່າງປະເທດລາວສາຂາ ແຂວງຫຼວງນໍ້າທາ ນຳໂດຍທ່ານ ແສງຄຳ ສຸວັນລາສີ ຮອງຫົວໜ້າສ່ວຍສາອາກອນປະຈຳແຂວງພ້ອມດ້ວຍຄະນະຈາກສອງພາກສ່ວນທີ່ກ່ຽວຂ້ອງໄດ້ປຸກລະດົມ ແລະຊຸກຍູ້ການເສຍຄ່າທຳນຽມທາງ ແລະພາສີທີ່ດິນປະຈຳປີ 2021 ທີ່ກອງບັນຊາການ ປກສ ແຂວງໂດຍເຂົ້າຮ່ວມຂອງ ພັອ ຄຳພັດ ພົມພິພັກ ຮອງຫົວໜ້າກອງບັນຊາການ ປກສ ແຂວງ, ມີຄະນະຫ້ອງ, ກອງ, ຄ້າຍ, ລປພ ຕະຫຼອດຮອດພະນັກງານ-ນັກຮົບພາຍໃນກອງບັນຊາການເຂົ້າຮ່ວມ.

 ທ່ານ ແສງຄໍາ ສຸວັນລາສີ ຮອງຫົວໜ້າສ່ວຍສາອາກອນປະຈໍາເເຂວງໃຫ້ຮູ້ກ່ຽວກັບການເຄື່ອນໄຫວເຮັດວຽກໃນຄັ້ງນີ້ໂດຍປະຕິບັດຕາມລັດຖະບັນຍັດຂອງປະທານປະ ເທດສະບັບ ເລກທີ 001/ປປທ, ລົງວັນທີ 20 ກັນຍາ 2017 ວ່າດ້ວຍການເສຍຄ່າທຳນຽມທາງ ແລະ ລັດຖະບັນຍັດຂອງປະທານປະເທດເລກທີ 01/ສປປ, ລົງວັນທີ 8 ພຶດສະພາ 2007 ວ່າດ້ວຍພາສີທີ່ດິນແລະບັນດານິຕິກຳອື່ນໆ ເປັນຕົ້ນແມ່ນຄຳແນະນຳ, ແຈ້ງການຂອງກະຊວງການເງິນຂອງຫ້ອງວ່າການແຂວງກ່ຽວກັບການຈັດຕັ້ງປະຕິບັດຄ່າທຳນຽມທາງ ແລະພາສີທີ່ດິນ, ເພື່ອເປັນການຈັດເກັບລາຍຮັບເຂົ້າງົບປະມານໃຫ້ບັນລຸຕາມແຜນການ, ຖືກຕ້ອງ,ຄົບຖ້ວນ ແລະທັນຕາມກຳນົດ ເວລາສະນັ້ນ,ສ່ວຍສາອາກອນປະຈຳແຂວງໄດ້ສົມທົບກັບທະນາຄານການຄ້າຕ່າງປະເທດລາວສາຂາແຂວງຫຼວງນໍ້າທາໄດ້ເປີດຂະບວນການກ່ຽວກັບການເສຍຄ່າທຳນຽມທາງ ແລະພາສີທີ່ດິນປະຈຳປີ 2021 ນີ້ຂຶ້ນ.

   ໂອກາດນີ້, ທ່ານກໍ່ໄດ້ຮຽກຮ້ອງໃຫ້ພະນັກງານ-ນັກຮົບພາຍໃນ ແລະອ້ອມຂ້າງກອງບັນຊາການ ປກສ ແຂວງຜູ້ທີ່ນຳໃຊ້ ຫຼື ເປັນເຈົ້າຂອງລົດຕາມທີ່ໄດ້ກຳນົດໃນລັດ ຖະບັນຍັດແມ່ນໃຫ້ມາແຈ້ງເສຍຄ່າທຳນຽມທາງປະຈຳປີຢູ່ທີ່ທະນາຄານ ຫຼື ຕົວແທນທີ່ໄດ້ຮັບມອບສິດໄລຍະເວລາຂອງການເສຍຄ່າທຳນຽມທາງແມ່ນເລີ່ມແຕ່ວັນທີ 1 ມັງກອນ-ວັນທີ 31 ມີນາ ຂອງທຸກໆປີຖ້າກາຍກຳນົດເວລາດັ່ງກ່າວແມ່ນຈະມີມາດຕະການປັບໃໝ, ສ່ວນໃບຕາດິນກໍເຊັ່ນດຽວກັນຖ້າຫາກບຸກຄົນໃດລະເມີດຈະຖືກປັບໃໝຄື: ແຈ້ງຊັກຊ້າປັບໃໝ 10% ຂອງພາສີທີ່ດິນໃນປີ, ເສຍບໍ່ຖືກຕ້ອງບໍ່ຄົບຖ້ວນປັບໄໝ 30% ຂອງພາສີທີ່ດິນໃນປີ,ບໍ່ຍອມແຈ້ງປີທີ່ໜຶ່ງໃຫ້ເສຍພາສີທີ່ດິນຄືນ   ພ້ອມປັບໃໝ 100% ຂອງຈຳນວນເງິນທີ່ຕ້ອງເສຍ, ປີທີສອງໃຫ້ເສຍພາສີທີ່ ດິນຄືນພ້ອມປັບໃໝ 150% ຂອງຈໍານວນເງິນທີ່ຕ້ອງເສຍ,ປີທີສາມໃຫ້ເສຍພາສີທີ່ດິນຄືນພ້ອມປັບໃໝ 200% ຂອງຈຳນວນເງິນທີ່ຕ້ອງເສຍ, ຖ້າບໍ່ເສຍສາມປີຕິດຕໍ່ກັນແມ່ນຈະຖືກເສຍສິດນໍາໃຊ້ທີ່ດິນຕາມທີ່ກຳນົດໄວ້ໃນມາດຕາ 144 ຂອງກົດໝາຍວ່າດ້ວຍທີ່ດິນ.

ຂ່າວ: ສົມພອນ ຂຸນດາວົງ  

แชร์