ດາລຸນນີ ຄວາມສາມັກຄີຄືບໍ່ເກີດແຫ່ງຄວາມສຳເລັດ

   ທ່ານ ນາງ ດາລຸນນີ ພູມມະສັກ ເປັນທີ່ຮູ້ຈັກຊື່ຫຼີ້ນ ດາ ທີ່ຫຼາຍຄົນຮູ້ຈັກດີໃນວົງການທຸລະກິດເປັນນັກທຸລະກິດລາວຍິງຍຸກໃໝ່ມີແນວຄິດໃນການດຳເນີນທຸລະກິດຊຶ່ງເປັນຜູ້ຢູ່ເບື້ອງຫຼັງດຳເນີນທຸລະກິດທີ່ປະສົບຜົນສຳເລັດຫຼາຍຢ່າງທີ່ເພິ່ນມີອຸດົມການຄຳຂວັນປະຈຳຕົວໃນການເຮັດວຽກແມ່ນບໍ່ມີຄວາມສຳເລັດໃດບໍ່ໃຊ້ຄວາມພະຍາຍາມ, ຄິດໃຫ້ໜ້ອຍແຕ່ລົງມືເຮັດຫຼາຍ ແລະຄວາມສາມັກຄີຄືບໍ່ເກີດແຫ່ງຄວາມສຳເລັດ.

  ທ່ານ ນາງ ດາລຸນນີ ພູມມະສັກ ໃຫ້ສຳພາດນັກຂ່າວໜັງສືພິມເສດຖະກິດ-ສັງຄົມ ພວກເຮົາຮູ້ວ່າ: ຕົນເອງເມື່ອກ່ອນແມ່ນສຶກສາຮຽນຈົບຈາກວິທະຍາໄລສ້າງຄູບ້ານເກີນ ແຕ່ປີ 2004 ແລະກ້າວມາເຮັດທຸລະກິດຂອງຕົນເອງໂດຍເຮັດຮ້ານອາຫານແລະກິນດື່ມສືບຕໍ່ທຸລະກິດທາງຄອບຄົວຄືປໍ້ານໍ້າມັນຢູ່ບ້ານເກີນ.

  ມາຮອດປະຈຸບັນຖືວ່າຕົນເອງແມ່ນໄດ້ຂະຫຍາຍກິດຈະການໃໝ່ເຊັ່ນມີໂຄງການເຮືອນຈັດສັນ Green Res idence Lao, ບໍລິສັດ DaSigna ture ອອກແບບຕົບແຕ່ງພາຍໃນ ແລະກໍ່ສ້າງຮ້ານອາຫານ Story Bar& Restaurant ໃນໄວ້ໆນີ້ແມ່ນຈະຂະຫຍາຍເປີດຮ້ານອາຫານເພີ່ມອີກ 1 ແຫ່ງ ຊຶ່ງການເຮັດທຸລະ ກິດຕົນເອງຮູ້ສຶກພູມໃຈໄດ້ເປັນສ່ວນໜຶ່ງສາມາດສ້າງວຽກເຮັດງານທຳບຸກຄະລາກອນຄົນລາວຫຼາຍຕໍາແໜ່ງທີ່ສາມາດ ແລະພວກເຂົາໄດ້ພັດທະນາຕົນເອງ ແລະຊ່ວຍຫຼຸດຜ່ອນຄົນວ່າງງານໄດ້ຈຳນວນໜຶ່ງ.

  ສຳລັບການດຳເນີນທຸລະກິດຜ່ານມາຄວາມຫຍຸ້ງຍາກມີຫຼາຍບັນຫາທີ່ແຕກຕ່າງກັນທີ່ເປັນອຸປະສັກແຕ່ສຳລັບຕົນເອງແລ້ວແມ່ນຈະບອກຕົນເອງສະເໝີວ່າບັນຫາຕ້ອງມີໄວ້ແກ້ບໍ່ແມ່ນມີໄວ້ໃຫ້ອຸກໃຈ, ແຕ່ຖ້າຄິດດ້ານໜຶ່ງບັນຫາຄືຄວາມທ້າທາຍຄືບົດພິສູດໃຫ້ເຮົາກ້າວໄປແບບມີສະຕິ,ບັນຫາປຽບສະເໝືອນຂັ້ນບັນໄດ ແຕ່ລະຂັ້ນແກ້ໄຂບັນ ຫາຫຼາຍເທົ່າໃດກໍ່ຍິ່ງເຮັດໃຫ້ເຮົາກ້າວໄປສູ່ຄວາມສຳເລັດໄດ້ໄວເທົ່ານັ້ນ.

ເນື່ອງໃນໂອກາດວັນແມ່ຍິງສາກົນດາເອງໃນນາມແມ່ຍິງລາວຄົນໜຶ່ງຂໍອວຍພອນໃຫ້ແມ່ຍິງລາວທົ່ວປະເທດຈົ່ງເຂັ້ມແຂງຕັ້ງໝັ້ນ ແລະຢຶດໝັ້ນໃນຄວາມດີຄວາມຖືຕ້ອງ ແລະຄວາມອົດທົນຮຽນຮູ້ ແລະພັດທະນາຕົນເອງຢູ່ສະເໝີຂໍແມ່ຍິງລາວທົ່ວປະເທດຈົ່ງມີຄວາມສຸກກາຍສຸກໃຈ.

แชร์