ກຽມພົບງານໃຫຍ່ວາງສະແດງສິນຄ້າເຟີນີເຈີວຽງຈັນ

  ເພື່ອປະຕິບັດຕາມທິດນະໂຍບາຍໃນການສົ່ງເສີມການຜະລິດເຄື່ອງເຟີນີເຈີໄມ້ລາວທັງເປັນການໂຄສະນາເຜີຍແຜ່ໃຫ້ສັງຄົມຮັບຮູ້ຜະລິດຕະພັນເຟີນີເຈີໄມ້ລາວຫຼາຍຂຶ້ນໃຫ້ຜູ້ຜະລິດສາມາດເຂົ້າຫາຕະຫຼາດ ແລະຈຳໜ່າຍສິນຄ້າໄດ້ທັງພາຍໃນ ແລະຕ່າງປະເທດ ແລະກ້າວເຂົ້າສູ່ການສ້າງຕາໜ່າງການວາງສະແດງຫຼາຍສິນຄ້າເຟີນີເຈີໄມ້ກັບພາກພື້ນ ແລະ ສາກົນໃນອະນາຄົດ, ສະນັ້ນສະມາຄົມເຟີນີເຈີລາວຈຶ່ງຈະໄດ້ຈັດງານວາງສະແດງສິນຄ້າເຟີນີເຈີວຽງຈັນຄັ້ງທີ 5 ປະຈຳປີ 2021 ຂຶ້ນໃນລະຫວ່າງວັນທີ 20-28 ມີນາ 2021 ທີ່ສູນການຄ້າລາວ-ໄອເຕັກ (ຕຶກເກົ່າ) ນະຄອນຫຼວງວຽງຈັນ.

  ໃນວັນທີ 9 ມີນາຜ່ານມາທ່ານ ກອງມາລາ ພົມມາໄລ ຮອງປະທານສະມາຄົມເຟີນີເຈີລາວໄດ້ຖະແຫຼງຂ່າວຕໍ່ສື່ມວນຊົນວ່າ: ເພື່ອເປັນການຈັດຕັ້ງປະຕິບັດ ແລະ ຜັນຂະຫຍາຍຕາມເນື້ອໃນຈິດໃຈຂອງຂັ້ນເທິງວາງອອກໃຫ້ປາກົດຜົນເປັນຈິງໄປເທື່ອລະກ້າວ, ຜັນຂະຫຍາຍຕາມເນື້ອໃນຂອງແຈ້ງການ ເລກທີ 15/ນຍ, ເພື່ອເປັນການອະນຸລັກຮັກສາປ່າໄມ້,ການນຳໃຊ້ໄມ້ໃຫ້ເກີດຜົນປະໂຫຍດສູງສຸດ ແລະມີໄມ້ໄວ້ໃຊ້ຢ່າງຍືນຍົງໂດຍການປຸງແຕ່ງໃຫ້ເປັນຜະລິດຕະພັນສຳເລັດຮູບມາຈາກໄມ້,ຫວາຍ ແລະໄມ້ປ່ອງໃຫ້ມີຫຼາກຫຼາຍຜະລິດຕະພັນຕາມທີ່ສັງຄົມປະຈຸບັນຕ້ອງການ ແລະເປັນທີ່ນິຍົມກັນຢູ່ດ້ວຍການນຳໃຊ້ເຕັກໂນໂລຊີທີ່ທັນສະໄໝ ແລະທັງເປັນການສ້າງມູນຄ່າເພີ່ມໃຫ້ກັບຜະລິດຕະພັນເຟີນີເຈີລາວໃຫ້ກາຍເປັນສິນຄ້າທີ່ມີຄຸນນະພາບ ແລະ ລາຄາສູງຕາມຄວາມຕ້ອງການຂອງລູກຄ້າ ແລະ ຕະຫຼາດເຮັດໃຫ້ສາມາດສົ່ງອອກຕ່າງປະເທດໄດ້, ຍັງເປັນການສ້າງວຽກເຮັດງານທຳໃຫ້ກັບປະຊາຊົນບັນດາເຜົ່າ, ຕ້ານໄພວ່າງງານ ແລະຊ່ວຍໃຫ້ຫຼຸດພົ້ນຈາກຄວາມທຸກຍາກຕື່ມໃນອະນາຄົດ.

 ທ່ານ ກອງມາລາ ພົມມາໄລ ກ່າວຕື່ມວ່າ: ເພື່ອເປັນການສົ່ງເສີມການປູກໄມ້ ແລະຫັນມາໃຊ້ໄມ້ປູກທົດແທນໄມ້ທຳມະຊາດ,ເຮັດໃຫ້ສັງຄົມຮູ້ຈັກກັບຜະລິດຕະພັນເຟີນີເຈີໄມ້ລາວຫຼາຍຂຶ້ນ ແລະກວ້າງຂວາງໄປເລື້ອຍໆ, ສົ່ງເສີມງານວາງສະແດງສິນຄ້າເຟີນີເຈີໄມ້ລາວໃຫ້ໂດດເດັ່ນມີຊື່ສຽງເປັນທີ່ຮູ້ຈັກ ແລະທັງເປັນການດຶງດູດເອົາລູກຄ້າເຂົ້າມາຊື້- ຂາຍສິນຄ້າເຟີນີເຈີໃນ ສປປ ລາວ ຫຼາຍຂຶ້ນ, ສຳລັບຜະລິດຕະພັນທີ່ນຳມາວາງສະແດງຈະມີເຄື່ອງເຟີນີເຈີທີ່ເຮັດດ້ວຍໄມ້, ຫວາຍ, ໄມ້ປ່ອງ ແລະຈາກວັດສະ ດຸເສດເຫຼືອຕ່າງໆ, ຜະລິດຕະພັນຫັດຖະກຳ ແລະເຄື່ອງແກະສະຫຼັກ, ເຄື່ອງປະດັບຕົກແຕ່ງ ແລະເອ້ຢ້ອງພາຍໃນເຮືອນແລະອື່ນໆ.

 ສ່ວນທ່ານ ບຸນຖອງ ຫຼວງໂຄດ ຄະນະສະມາຄົມເຟີນີເຈີລາວກ່າວວ່າ: ສຳລັບຫ້ອງວາງສະແດງແມ່ນມີທັງໝົດ 200 ຫ້ອງໃນນັ້ນມີ 30 ຫ້ອງສຳລັບຫົວໜ່ວຍທຸລະກິດໂອດັອບ, ປະຈຸບັນການຈັບຈອງຫ້ອງຂາຍໄດ້ 90%, ໂດຍຈະມີຫົວໜ່ວຍ ຫຼືໂຮງງານທີ່ຈະເຂົ້າມາຮ່ວມ 70 ຫົວໜ່ວຍ ແລະຕ່າງແຂວງ 20 ຫົວໜ່ວຍຈາກ 10 ແຂວງ, ຊຶ່ງຄາດຄະເນຕະຫຼອດການຈັດງານຈະມີການຈາລະຈອນຊື້-ຂາຍສິນຄ້າພາຍໃນງານປະມານ 10 ຕື້ກີບ ແລະຈະມີຜູ້ເຂົ້າທ່ຽວຊົມປະມານ 10 ພັນຄົນ.

  ດ້ານທ່ານ ກອງແຊງ ລາດຊະມຸນ ຄະນະສະມາຄົມເຟີນີເຈີລາວ ກ່າວເນັ້ນວ່າ: ພາຍໃນງານວາງສະແດງນັບແຕ່ວັນທີ 20-28 ມີນາ ຍັງຈະມີກິດຈະກຳຕ່າງໆເປັນຕົ້ນວາງສະແດງຊື້-ຂາຍສິນຄ້າ, ສະແດງດົນຕີລາວ, ສະແດງກາຍຍະສິນ,ມິນິຄອນເສີດ,ຈັບສະຫຼາກມອບລາງວັນລວມມູນຄ່າຫຼາຍກວ່າ 30 ລ້ານກວ່າກີບ ແລະອື່ນໆ.

แชร์