ບໍ່ແກ້ວ ເປີດສວນສາທາລະນະພັດທະນາເພື່ອສັງຄົມ

ຂ່າວ: ຄໍາພັນ ແກ້ວມະນີ

 ໂຄງການກໍ່ສ້າງສວນສາທາລະນະແຫ່ງນີ້ເປັນໂຄງການທໍາອິດທີ່ບໍ່ໄດ້ໃຊ້ງົບປະມານຂອງລັດແຕ່ໄດ້ດໍາເນີນການກໍ່ສ້າງດ້ວຍການປຸກລະດົມຂົນຂວາຍ,ການອຸປະຖໍາ,ການປະກອບສ່ວນ, ການຮ່ວມແຮງຮ່ວມໃຈທາງດ້ານກໍາລັງແຮງງານຂອງບັນດາພະແນກການ, ອົງການອ້ອມຂ້າງແຂວງ, ກໍາລັງປກຊ-ປກສ, ລັດວິສາຫະກິດ, ໂຮງຮຽນ, ໂຮງໝໍ ແລະການປະກອບສ່ວນທາງດ້ານງົບປະມານທຶນຮອນ, ວັດສະດຸກໍ່ສ້າງຂອງທຸກພາກສ່ວນພາກລັດ ແລະ ເອກະຊົນພາຍໃນ ແລະ ຕ່າງປະເທດ, ສວນທາສາລະນະແຫ່ງນີ້ແມ່ນແນວຄວາມຄິດຂອງທ່ານເຈົ້າແຂວງ, ຊຶ່ງເນື້ອທີ່ເປົ່າຫວ່າງຢູ່ບໍລິເວນເດີນສະໂມສອນແຂວງ ແລະຫໍວັດທະນະທໍາແຂວງມີເນື້ອທີ່ທັງໝົດ 10,883 ຕາ ແມັດ, ການລົງມືກໍ່ສ້າງແມ່ນເລີ່ມກໍ່ສ້າງມາແຕ່ທ້າຍປີ 2019 ຊຶ່ງໜ້າວຽກທີ່ປະຕິບັດແມ່ນການສໍາຫຼວດ, ອອກແບບ, ການບຸກເບີກດຸດດິນເປັນລອກໜ້າດິນທໍາມະ  ຊາດ, ປັບໜ້າດິນໃຫ້ໄດ້ຕາມລະດັບການອອກແບບ,ການປັກຟັງ, ຈັດລະດັບ, ວັດແທກ, ຈັດວາງຕອນດິນ,ຈັດວາງໜານດອກໄມ້,ການກໍ່ສ້າງແມ່ນນໍາໃຊ້ທັງແຮງງານ ແລະກົນຈັກ,ສໍາລັບແຮງງານແມ່ນທຸກໆວັນສຸກ ຫຼືເອີ້ນວ່າວັນເສົາແດງເປັນທີ່ສ້າງຂະບວນການອອກແຮງງານລວມໃຫຍ່ຢູ່ສວນແຫ່ງນີ້,ລວມຜູ້ສະໜັບສະໜູນເປັນເງິນສົດ 441 ລ້ານກວ່າກີບ, ເປັນວັດຖຸ 503 ລ້ານກວ່າກີບ.

   ດັ່ງນັ້ນມາໃນວັນທີ 8 ມີນາ 2021 ນີ້ໄດ້ມີພິທີເປີດຢ່າງເປັນທາງການໂດຍການເຂົ້າຮ່ວມຂອງທ່ານ ປອ ບົວຄົງ ນາມມະວົງ ເຈົ້າແຂວງ ແຂວງບໍ່ແກ້ວ, ມີການນໍາແຂວງ, ນັກທຸລະກິດ, ຜູ້ປະກອບການຕະຫຼອດຮອດພະແນກການອ້ອມຂ້າງແຂວງເຂົ້າຮ່ວມ.

 ພິທີໄດ້ມອບໃບຍ້ອງຍໍຂອງທ່ານເຈົ້າແຂວງໃຫ້ກັບພາກສ່ວນທີ່ປະກອບສ່ວນພັດທະນາສວນສາທາລະນະແຫ່ງນີ້ຕື່ມອີກ,ສໍາລັບການປົກປັກຮັກສາແມ່ນມອບໃຫ້ພະແນກການ, ກົມກອງສືບຕໍ່ບົວລະບັດຕາມການແບ່ງປັນຂອງອະນຸກໍາມະການ, ກໍເພື່ອເປັນການຈັດຕັ້ງປະຕິບັດຄໍາຂວັນ 4 ສ ຄື: ສ້າງເມືອງຫ້ວຍຊາຍເປັນສີຂຽວ, ສະຫງົບ, ສະຫວ່າງ ແລະສະເໜ່ໃຫ້ປາກົດຜົນເປັນຈິງ,ສ້າງສະພາບແວດລ້ອມອັນສວຍສົດງົດງາມ, ປະດັບເອ້ຫໍວັດທະນະທຳ ແລະສະໂມສອນແຂວງໃຫ້ເປັນເຂດສີຂຽວ, ເປັນບ່ອນພັກຜ່ອນຢ່ອນໃຈ, ທ່ຽວຊົມສວນດອກໄມ້, ອອກກໍາລັງກາຍ ແລະນໍາໃຊ້ເປັນບ່ອນຈັດກິດຈະກໍາທີ່ເປັນຜົນປະໂຫຍດໃຫ້ແກ່ສັງຄົມກໍຄືການຈັດຕັ້ງຕ່າງໆ.

ຮູບພາບ: ໜັງສືພິມເສດຖະກິດ-ສັງຄົມ

แชร์