ຄຳມ່ວນ ມອບ-ຮັບໜ້າທີ່ຫົວໜ້າພະແນກການ

ຂ່າວ: ແດງສະຫວັດ ແສນພານິດ

  ພິທີມອບ-ຮັບໜ້າທີ່ຫົວໜ້າພະແນກການ 7 ພາກສ່ວນພາຍໃນແຂວງຄໍາມ່ວນລະຫວ່າງຜູ້ເກົ່າ ແລະຜູ້ໃໝ່ໄດ້ຈັດຂຶ້ນຢ່າງເປັນທາງການໃນຕອນບ່າຍຂອງວັນທີ 5 ມີ ນາ 2021 ຢູ່ທີ່ສະໂມສອນໃຫຍ່ຂອງແຂວງ (ຫຼັກ 4) ໂດຍການເຂົ້າຮ່ວມເປັນກຽດຂອງທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ,ໃນພິທີອັນມີຄວາມໝາຍສໍາຄັນນີ້ຍັງມີບັນດາທ່ານໃນຄະນະບໍລິຫານພັກແຂວງ, ຫົວໜ້າ, ຮອງຫົວໜ້າພະແນກການ, ພະນັກງານວິຊາການຈາກ 7 ພາກສ່ວນຕະຫຼອດເຖິງພາກສ່ວນກ່ຽວຂ້ອງເຂົ້າຮ່ວມ .

  ທ່ານ ນາງ ມຸນທາ ລັດຖະຈັກ ຮອງຫົວໜ້າຄະນະຈັດຕັ້ງແຂວງໄດ້ຜ່ານຂໍ້ຕົກລົງຂອງຄະນະປະຈໍາພັກແຂວງວ່າສັບຊ້ອນພະນັກງານ-ລັດຖະກອນໄປຮັບໜ້າທີ່ໃໝ່, ໃນນີ້ໄດ້ມອບ-ຮັບໜ້າທີ່ລະຫວ່າງທ່ານ ສົມໃຈ ພານີຈັນ ເຈົ້າເມືອງໜອງບົກ (ຜູ້ເກົ່າ) ມາຮັບໜ້າທີ່ໃໝ່ເປັນຫົວໜ້າຄະນະຈັດຕັ້ງແຂວງ ແລະທ່ານ ນາງ ບັງອອນ ໄຊຍະສິດ ຮັກສາການຫົວໜ້າຄະນະຈັດຕັ້ງແຂວງແມ່ນໄປຮັບໜ້າທີ່ໃໝ່ຢູ່ຂະແໜງການອື່ນ; ມອບ-ຮັບໜ້າທີ່ລະຫວ່າງທ່ານ ຄໍາຜົງ ວົງພະຈັນ ຫົວໜ້າຄະນະກວດກາພັກ-ລັດແຂວງ (ຜູ້ເກົ່າ) ແມ່ນອອກພັກຜ່ອນຮັບອຸດໜູນບໍານານແລະທ່ານ ຄໍາສອນ ອ້ວນທະວີ ຫົວໜ້າພະແນກຊັບພະຍາກອນທໍາມະຊາດ ແລະສິ່ງແວດລ້ອມ (ຜູ້ເກົ່າ) ມາຮັບໜ້າທີ່ໃໝ່ເປັນຫົວໜ້າຄະນະກວດກາພັກ-ລັດແຂວງ; ມອບ-ຮັບໜ້າທີ່ລະຫວ່າງ ທ່ານ ຄໍາສອນ ອ້ວນທະວີ ຫົວໜ້າພະແນກຊັບພະຍາກອນທໍາມະຊາດ  ແລະສິ່ງແວດລ້ອມ (ຜູ້ເກົ່າ) ແລະ ທ່ານ ຄໍາໝັ້ນ ສໍປະເສີດ ເຈົ້າເມືອງຄູນຄໍາ (ຜູ້ເກົ່າ) ມາຮັບໜ້າທີ່ໃໝ່ເປັນຫົວໜ້າພະແນກຊັບພະຍາກອນທໍາມະຊາດ ແລະ ສິ່ງ ແວດລ້ອມ (ຜູ້ໃໝ່); ມອບ-ຮັບໜ້າທີ່ລະຫວ່າງ ທ່ານ ແກ້ວວິໄລ ໄຊຍະບຸດ ຫົວໜ້າພະແນກພາຍໃນແຂວງ (ຜູ້ເກົ່າ) ໄປຮັບໜ້າທີ່ໃໝ່ເປັນເຈົ້າເມືອງຄູນຄໍາ (ຜູ້ໃໝ່) ແລະທ່ານ ນາງ ອາລີ  ບົວຈູມ ປະທານສະຫະພັນແມ່ຍິງແຂວງ (ຜູ້ເກົ່າ) ມາຮັບໜ້າທີ່ໃໝ່ເປັນຫົວໜ້າພະແນກພາຍໃນແຂວງ (ຜູ້ໃໝ່); ມອບ-ຮັບ ໜ້າທີ່ລະຫວ່າງທ່ານ ນາງ ອາລີ ບົວຈູມ ປະທານສະຫະພັນແມ່ຍິງແຂວງ (ຜູ້ເກົ່າ) ແລະທ່ານ ນາງ ກຽນຕາ ວັນມະນາ ຮອງປະທານສະຫະພັນແມ່ຍິງແຂວງຂຶ້ນເປັນປະ ທານສະຫະພັນແມ່ຍິງແຂວງ (ຜູ້ໃໝ່); ມອບ-ຮັບໜ້າທີ່ລະຫວ່າງທ່ານ ແກ້ວວັນໄຊ ສຸກແສງທອງ ຫົວໜ້າຄະນະໂຄສະນາອົບຮົມແຂວງ (ຜູ້ເກົ່າ) ແມ່ນໄປຮັບໜ້າທີ່ໃໝ່ເປັນຫົວໜ້າໂຮງຮຽນທິດສະດີການເມືອງ ແລະການປົກຄອງແຂວງ (ຜູ້ໃໝ່) ສ່ວນວ່າ ທ່ານ ນາງ ອານົງໄຊ ສັງທອງ ເພັດຫົວໜ້າໂຮງຮຽນທິດສະດີການເມືອງ ແລະການປົກຄອງແຂວງ (ຜູ້ເກົ່າ) ແມ່ນໄປຮັບໜ້າທີ່ໃໝ່ຢູ່ຫ້ອງວ່າການປົກຄອງແຂວງ; ມອບ-ຮັບໜ້າທີ່ລະຫວ່າງທ່ານ ແກ້ວວັນໄຊ ສຸກແສງທອງ ຫົວໜ້າຄະນະໂຄສະນາອົບຮົມແຂວງ (ຜູ້ເກົ່າ) ແລະທ່ານ ສົມພົງ ວັນໄພທອງ ຮອງປະທານຄະນະກວດກາພັກ-ລັດແຂວງ (ຜູ້ເກົ່າ) ຂຶ້ນມາຮັບໜ້າທີ່ໃໝ່ເປັນຫົວໜ້າຄະນະໂຄສະ ນາອົບຮົມແຂວງ (ຜູ້ໃໝ່).

  ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ ໄດ້ມີຄໍາເຫັນໂອ້ລົມຕໍ່ພິທີກໍ່ຄືບັນດາຫົວໜ້າພະແນກການທີ່ໄດ້ຮັບການມອບໝາຍໃຫ້ດໍາລົງຕໍາແໜ່ງໜ້າທີ່ໃໝ່ວ່າ: ໃຫ້ເອົາໃຈໃສ່ຮັກສາຄວາມສາມັກຄີພາຍໃນ ແລະສຶກສາອົບຮົມດ້ານການເມືອງແນວຄິດໃຫ້ພະນັກງານລັດຖະກອນ ແລະສະມາຊິກພັກທີ່ຂຶ້ນກັບການຄຸ້ມຄອງກໍ່ຄືຂຶ້ນກັບຄວາມຮັບຜິດຊອບຂອງຕົນ, ພາຍຫຼັງທີ່ມີການມອບ-ຮັບໜ້າທີ່ວຽກງານໄປແລ້ວພະນັກງານທີ່ຂຶ້ນກັບຄວາມຮັບຜິດຊອບຂອງຕົນຕ້ອງມີຄວາມຈິງໃຈສະໜັບສະໜູນ, ຊ່ວຍເຫຼືອແກ່ຫົວໜ້າຄົນໃໝ່, ພ້ອມນັ້ນທ່ານເຈົ້າແຂວງກໍ່ໄດ້ລົງເລິກໃຫ້ທິດຊີ້ນໍາ ແລະເນັ້ນໜັກຕໍ່ວຽກງານແຕ່ລະຂົງເຂດເຊັ່ນ: ດ້ານວຽກງານຈັດຕັ້ງແມ່ນໃຫ້ເອົາໃຈໃສ່ການສ້າງໜ່ວຍພັກເຂັ້ມແຂງ, ປອດໃສ, ໜັກແໜ້ນຕ້ອງຮັບປະກັນໃຫ້ໄດ້ຄຸນນະພາບ,  ເອົາໃຈໃສ່ໃນການຂະຫຍາຍໜ່ວຍພັກ ແລະສະມາຊິກພັກ, ສໍາລັບວຽກງານກວດ ກາແມ່ນເປັນວຽກງານສໍາຄັນເພາະວ່າໃນຫຼັກການຂອງພັກໄດ້ກ່າວວ່າ: ຖ້າບໍ່ມີການ ກວດກາກໍ່ບໍ່ມີການນໍາພາແລະໃຫ້ຖືວ່າ ວຽກງານກວດກາເປັນວຽກປົກກະຕິ, ສ່ວນວຽກງານໂຄສະນາອົບຮົມແມ່ນເປັນວຽກເສນາທິການຂອງພັກເຊິ່ງເປັນຜູ້ນໍາເອົາມະຕິ, ຄໍາສັ່ງ, ຄໍາແນະນໍາຕະຫຼອດເຖິງແນວທາງນະໂຍບາຍຂອງພັກໄປຈັດຕັ້ງໂຄສະນາເຜີຍແຜ່, ສຶກສາອົບຮົມໃຫ້ສະມາຊິກພັກ , ພະນັກງານ-ລັດຖະກອນ ແລະປະຊາຊົນບັນດາເຜົ່າມີຄວາມຮັບຮູ້ເຂົ້າໃຈຢ່າງເລິກຊຶ່ງ,ກວ້າງຂວາງ, ສໍາລັບວຽກງານພາຍໃນແມ່ນເປັນວຽກງານສໍາຄັນທີ່ມີພາລະບົດບາດໃນການຄຸ້ມຄອງລັດຖະກອນແມ່ນຕ້ອງປັບປຸງກົງຈັກການຈັດຕັ້ງ, ກໍານົດຕໍາແໜ່ງງານຖ້າກໍານົດຕໍາແໜ່ງງານໄດ້ດີ ແລະສອດຄ່ອງແນ່ນອນຈະຊຸກຍູ້ໃຫ້ວຽກງານມີການຂະຫຍາຍຕົວ, ພ້ອມກັນນັ້ນທ່ານຍັງໃຫ້ປັບປຸງຄືນກົງຈັກການຈັດຕັ້ງທີ່ມີຢູ່, ສ່ວນວຽກງານແມ່ຍິງແມ່ນໃຫ້ເອົາ ໃຈໃສ່ຜັນຂະຫຍາຍຄໍາຂວັນຂອງ ແມ່ຍິງໃຫ້ກວ້າງຂວາງ,ຊຸກຍູ້ຂະຫຍາຍພະນັກງານເພດຍິງດຽວກັນໃນຕໍາແໜ່ງນໍາພາຄຸ້ມຄອງໃຫ້ເພີ່ມຂຶ້ນພາຍໃນແຂວງ,ສໍາລັບໂຮງ ຮຽນທິດສະດີການເມືອງ ແລະການປົກຄອງແຂວງໃຫ້ເອົາໃຈໃສ່ໃນການບໍາລຸງ, ຍົກລະດັບທາງດ້ານຄວາມຮູ້-ຄວາມ ສາມາດຂອງພະນັກງານຄູ-ອາຈານ ຊຶ່ງຖືວ່າເປັນຂອດສໍາຄັນໂດຍສະເພາະແມ່ນການບໍາລຸງໄລຍະສັ້ນຊຶ່ງຈະຕ້ອງໄດ້ຂຶ້ນແຜນລະອຽດນັບທັງດ້ານບຸກຄະລາກອນ ແລະງົບປະມານ,ພ້ອມທັງມີການປັບປຸງ ແລະຂະຫຍາຍຫຼັກສູດໃຫ້ກວມເອົາຫຼາຍຂົງເຂດຕື່ມອີກໂດຍໃຫ້ສອດຄ່ອງກັບພຶດຕິກໍາຕົວຈິງ, ສ່ວນວ່າວຽກງານຊັບພະຍາກອນທໍາມະຊາດ ແລະສິ່ງແວດລ້ອມແມ່ນໃຫ້ເອົາໃຈໃສ່ດ້ານການຄຸ້ມຄອງທີ່ດິນແຕ່ລະປະເພດຕື່ມເພາະໃນປະຈຸບັນຂໍ້ຂັດແຍ່ງກ່ຽວກັບທີ່ດິນແມ່ນມີຫຼາຍສະນັ້ນຕ້ອງຫັນເອົາການຄຸ້ມຄອງທີ່ດິນໃຫ້ເຂົ້າສູ່ລະບົບເພື່ອຫຼີກລ່ຽງຈາກຫາງສຽງຈົ່ມວ່າຂອງປະຊາຊົນ.

ທ່ານເຈົ້າແຂວງຄໍາມ່ວນຍັງໄດ້ຮຽກຮ້ອງໃຫ້ບັນດາທ່ານທີ່ໄດ້ຖືກສັບຊ້ອນມອບ-ຮັບໜ້າທີ່ໃໝ່ໃນຄັ້ງນີ້ໃຫ້ພ້ອມກັນເພີ່ມທະວີຄວາມຮັບຜິດຊອບຕໍ່ໜ້າທີ່ວຽກງານຂອງຕົນໃຫ້ສູງຂຶ້ນທັງນີ້ກໍ່ເພື່ອນໍາຜົນປະໂຫຍດ ແລະຄວາມຈະເລີນຮຸ່ງເຮືອງມາສູ່ແຂວງຄໍາມ່ວນເວົ້າສະເພາະ, ເວົ້າລວມກໍ່ຄືປະເທດຊາດຂອງພວກເຮົາ.

ຮູບພາບ: ໜັງສືພິມເສດຖະກິດ-ສັງຄົມ

แชร์