ປະຊາຊົນຮຽກຮ້ອງໃຫ້ເມືອງບາຈຽງ ຊ່ວຍແກ້ໄຂກີ່ນເໝັນຈາກໂຮງງານເກັບຊື້ຢາງພາລາ

 ກາຍເປັນປາກົດການຫຍໍ້ທໍ້ຕໍ່ສັງຄົມ ແລະສ້າງຜົນກະທົບຕໍ່ສະພາບແວດລ້ອມກໍ່ຄືປະຊາຊົນທີ່ຢູ່ບໍລິເວນໃກ້ຄຽງກັບໂຮງງານເກັບຊື້ຢາງພາລາທີ່ຕັ້ງຢູ່ລະຫວ່າງກິໂລແມັດ ຫຼັກ 12-14 ບ້ານລົ້ມສັກ ເມືອງດັ່ງກ່າວເນື່ອງຈາກໄດ້ສົ່ງກິ່ນເໝັນຢ່າງແຮງໃຫ້ກັບປະຊາຊົນຢູ່ບໍລິເວນໃກ້ຄຽງ,ຂະນະທີ່ປະຈຸບັນພາກສ່ວນກ່ຽວຂ້ອງຂອງເມືອງກຳລັງສຸມໃສ່ໃນການແກ້ໄຂກິ່ນເໝັນດັ່ງກ່າວ.

   ອີງຕາມການລົງເຄື່ອນໄຫວຕິດຕາມຂອງສື່ມວນຊົນຂອງພວກເຮົາເມື່ອທ້າຍອາທິດທີ່ຜ່ານມາກັບຫຼາຍພາກສ່ວນພາຍໃນເມືອງບາຈຽງຈະເລີນສຸກ ແຂວງຈຳປາສັກ, ກ່ຽວກັບປາກົດການຫຍໍ້ທໍ້ຕໍ່ສັງຄົມ,ໂດຍສະເພາະແມ່ນປາກົດການກິ່ນເໝັນຈາກໂຮງງານເກັບຊື້ຢາງພາລາຢູ່ລະຫວ່າງເຂດບ້ານລົ້ມສັກ ກິໂລແມັດ ທີ 12-14 ເມືອງບາຈຽງຈະເລີນສຸກ (ທາງໄປເມືອງໂຂງ) ຊຶ່ງການໃຫ້ສຳພາດຂອງແຕ່ລະພາກສ່ວນປະຊາຊົນ, ບ້ານ, ເມືອງ ແລະ ຜູ້ທີ່ຢູ່ບໍລິເວນໃກ້ຄຽງກັບໂຮງງານເກັບຊື້ຢາງພາລາ ດັ່ງກ່າວກໍ່ໄດ້ໃຫ້ການຢັ້ງຢືນວ່າໄດ້ຮັບຜົນກະທົບກິ່ນເໝັນຈາກໂຮງງານເກັບຊື້ຢາງພາລາດັ່ງກ່າວແທ້ແລະເກີດມີປາກົດການດັ່ງກ່າວນີ້ມາດົນນານແລ້ວປະຈຸບັນກິ່ນເໝັນເນົ່າດັ່ງກ່າວແມ່ນຍັງບໍ່ທັນໄດ້ຮັບການແກ້ໄຂເທື່ອ.

  ທ່ານ ວິລະວັດ ຈຳປາສານ ຮອງນາຍບ້ານໆລົ້ມສັກ ເມືອງບາຈຽງ ຈະເລີນສຸກ ແຂວງຈຳປາສັກ ໄດ້ໃຫ້ຮູ້ກ່ຽວກັບສະພາບການດັ່ງກ່າວວ່າ: ຕາມການລົງເກັບກຳຂໍ້ມູນບໍລິສັດຂອງຊາວຫວຽດນາມ ທີ່ໄດ້ມາຕັ້ງໂຮງງານຮັບຊື້ຢາງພາລາຢູ່ບ້ານຂອງພວກເຮົາແມ່ນເຫັນວ່າມີສະພາບກິ່ນເໝັນເນົ່າຕາມການຮ້ອງທຸກຂອງປະຊາຊົນ, ດັ່ງນັ້ນ ບ້ານຈຶ່ງໄດ້ສະເໜີທາງເມືອງ, ຂະແໜງການຮັບຜິດຊອບຂັ້ນເມືອງ, ຂັ້ນແຂວງ ແລະຜ່ານມາແມ່ນໄດ້ເຮັດບົດບັນທຶກຫຼາຍຄັ້ງແລ້ວແຕ່ຍັງເຫັນວ່າໂຮງງານດັ່ງກ່າວຍັງບໍ່ທັນມີວິທີແກ້ໄຂເມື່ອເຮັດໃຫ້ກິ່ນເໝັນດັ່ງກ່າວເບົາບາງລົງປະຈຸບັນຍັງສົ່ງຜົນກະທົບສົ່ງກິ່ນເໝັນເນົ່າຕໍ່ສະພາບແວດລ້ອມ ແລະການປິດຢູ່ຂອງປະຊາຊົນໃນລະດັບ 500 ແມັດ ຫ່າງຈາກໂຮງງານ ແລະປະຊາຊົນຍັງສືບຕໍ່ຮຽກຮ້ອງເຖິງພາກສ່ວນທີ່ກ່ຽວຂ້ອງລົງມາແກ້ໄຂຢ່າງຈິງຈັງ.

  ໃນຄະນະທີ່ທ່ານ ເຊີດໄຊ ພິມພັກດີ ເຈົ້າຂອງໂຮງງານປຸງແຕ່ໄມ້ສຳເລັດຮູບເຊີດໄຊ ຫຼັກ 12 ກ່າວວ່າ: ປະຊາຊົນ ເຂດໃກ້ຄຽງລວມທັງໂຮງງານຂ້າພະເຈົ້າແມ່ນໄດ້ຮັບຜົນກະທົບຈາກມົນລະພິດກິ່ນເນົ່າເໝັນຈາກໂຮງງານເກັບຊື້ຢາງພາລາແຈ້ງດັ່ງກ່າວມາໄດ້ປະມານ 1 ປີ, ໂດຍສະເພາະແມ່ນຊ່ວງເດືອນ 11-12 ກີ່ນເນົ່າເໝັນຈະແຮງຫຼາຍ, ຊຶ່ງໄດ້ສົ່ງຜົນກະທົບໂດຍສົ່ງຕໍ່ສຸຂະພາບຂອງປະຊາຊົນ, ພະນັກງານ, ກຳມະກອນພາຍໃນໂຮງງານ, ໂດຍສະເພາະແມ່ນເລື່ອງສຸຂະພາບກິນຢູ່ແມ່ນມີຄວາມຫຍຸ້ງຍາກ ແລະທໍລະມານຈາກກິ່ນເໝັນ ແລະຈົນເຮັດໃຫ້ຫຼາຍເດືອນລູກຄ້າບໍ່ເຂົ້າມາໃຊ້ບໍ ລິການຢູ່ໂຮງງານ, ຜ່ານມາກໍ່ໄດ້ສະເໜີໄປຫາພາກສ່ວນທີ່ກ່ຽວຂ້ອງແຕ່ຍັງບໍ່ສາມາດແກ້ບັນຫາດັ່ງກ່າວນີ້ໄດ້.

  ຢ່າງໃດກໍ່ຕາມຕໍ່ບັນຫາດັ່ງກ່າວນີ້ທ່ານ ໝອນ ບຸນຊາວຈອນ ຫົວໜ້າຫ້ອງການຊັບພະຍາກອນທຳມະຊາດ ແລະສິ່ງແວດລ້ອມເມືອງບາຈຽງຈະເລີນສຸກໄດ້ໃຫ້ສຳພາດວ່າ: ໃນໄລຍະຜ່ານມາການແກ້ໄຂປາກົດການຫຍໍ້ທໍ້ທີ່ເກີດຂຶ້ນໂດຍສະເພາະແມ່ນການແກ້ໄຂບັນຫາກິ່ນເໝັນເນົ່າຈາກຈຸດເກັບຊື້ຢາງໂຮງງານດັ່ງກ່າວຊຶ່ງທາງເມືອງພວກເຮົາກໍ່ໄດ້ມີຄະນະກຳມະການ, ການຄ້າ, ກະສິກຳ ແລະ ຊັບພະຍາກອນເມືອງແມ່ນໄດ້ລົງຕິດຕາມກວດກາຢ່າງເປັນໄລຍະໂດຍສະເພາະແຕ່ລະຈຸດເກັບຊື້ຢາງເພື່ອໃຫ້ເຂົາເຈົ້າໄດ້ປັບປຸງບັນຫາກິ່ນເໝັນໃຫ້ ຫຼຸດໜ້ອຍຖອຍລົງໃນຈຸດຕ່າງໆທີ່ພໍ່ແມ່ ປະຊາຊົນໄດ້ສະເໜີຜ່ານມາພວກເຮົາໄດ້ ສ້າງບົດບັນທຶກກັບເຂົາເຈົ້າແຕ່ລະຈຸດຊື້: ຊຶ່ງປະຈຸບັນທົ່ວເມືອງມີຢູ່ 10 ກວ່າຈຸດເກັບຊື້ ແລະທາງເມືອງຂອງພວກເຮົາແມ່ນຈະໄດ້ສືບຕໍ່ຕິດຕາມ ແລະແກ້ໄຂບັນຫາດັ່ງກ່າວ: ໂດຍໄດ້ມີທິດຊີ້ນຳຈາກທ່ານເຈົ້າເມືອງ ໂດຍຈະໄດ້ຈັດກອງປະຊຸມພາຍໃນຄະນະກຳມະການຂຶ້ນເພື່ອຄົ້ນຄວ້າແກ້ໄຂບັນຫາດັ່ງກ່າວ ແລະ ຈະໄດ້ຮຽນເຊີນເອົາຜູ້ປະກອບການດັ່ງກ່າວປຶກສາກັນຕື່ມ, ເນື່ອງຈາກຜ່ານມາແມ່ນໄດ້ເຮັດບົດບັນທຶກແລ້ວເພື່ອໃຫ້ເຂົາເຈົ້າຂົ້າໃຈກ່ຽວກັບກົດໝາຍຕື່ມ, ໃຫ້ເຂົາເຈົ້າເລັ່ງບຳບັດບໍ່ໃຫ້ສົ່ງຜົນຕໍ່ສິ່ງແວດລ້ອມ,ສັງຄົມໃຫ້ຫຼຸດໜ້ອຍຖອຍລົງພ້ອມຈະໄດ້ເຄັ່ງຄັດໃນການຂົນສົ່ງບໍ່ໃຫ້ມີກິ່ນເໝັນເນົ່າ ແລະບໍ່ໃຫ້ມີຫາງສຽງຂອງສັງຄົມ.

ໂດຍ: ໂພທິລາດ

แชร์