ເຜີຍແຜ່ຄຳສັ່ງ ກັກ ຢືດ ແລະອາຍັດທຶນໃຫ້ແກ່ການແຜ່ຜາຍອາວຸດທຳລາຍລ້າງຜານ

  ສໍານັກງານຂໍ້ມູນຕ້ານການຟອກເງິນ (ສຕຟງ), ທະນາຄານແຫ່ງ ສປປ ລາວ ໃນນາມກອງເລຂາຄະນະກໍາມະການແຫ່ງຊາດເພື່ອຕ້ານການຟອກເງິນ ແລະ ສະ ໜອງທຶນໃຫ້ແກ່ການກໍ່ການຮ້າຍໄດ້ຈັດກອງປະຊຸມເຜີຍແຜ່ຄຳສັ່ງວ່າດ້ວຍການກັກການຢຶດ ແລະ ອາຍັດທຶນທີ່ກ່ຽວຂ້ອງກັບການສະໜອງທຶນໃຫ້ແກ່ການແຜ່ຜາຍອາວຸດທຳລາຍລ້າງຜານ ສະບັບເລກທີ 20/ນຍ, ລົງວັນທີ 26 ພະຈິກ 2020 ແລະນິຕິກໍາອີກຈໍານວນໜຶ່ງທີ່ຕິດພັນກັບພັນທະຂອງຫົວໜ່ວຍທີ່ມີໜ້າທີ່ລາຍງານ ຊຶ່ງໄດ້ຈັດຂຶ້ນໃນວັນທີ 5 ມີນາ 2021 ທີ່ສະຖາບັນການທະນາຄານໂດຍການໃຫ້ກຽດເປັນປະທານໂດຍ ທ່ານ ໄຊສີ ສັນຕິວົງ ລັດຖະມົນຕີກະຊວງຍຸຕິທຳ, ຫົວໜ້າຄະ ນະຮັບຜິດຊອບວຽກງານນິຕິກຳ ແລະກົນໄກຊຶ່ງມີບັນດາທະນາຄານທຸລະກິດ, ສະຖາບັນການເງິນຈຸລະພາກທີ່ຮັບຝາກເງິນ, ບໍລິສັດໂອນເງິນດ່ວນ, ວິສາຫະກິດໄປສະນີແລະພາກສ່ວນກ່ຽວຂ້ອງໃນການຈັດຕັ້ງປະຕິບັດຄໍາສັ່ງດັ່ງກ່າວເຂົ້າຮ່ວມ.

  ທ່ານ ຈິນດາໄມ ວິໄລຫົງສ໌ ຮອງຫົວໜ້າ ສຕຟງ ແລະ ພະນັກງານຈາກສໍານັກງານດັ່ງກ່າວໄດ້ນຳສະເໜີເນື້ອໃນ ແລະ ຫຼັກການທີ່ໄດ້ກໍານົດໄວ້ໃນຄໍາສັ່ງດັ່ງກ່າວຮັບ ປະກັນໃຫ້ພາກສ່ວນກ່ຽວຂ້ອງສາມາດນໍາເອົາຂໍ້ກໍານົດ ແລະ ຫຼັກການໄປໝູນໃຊ້ເຂົ້າໃນການປະຕິບັດວຽກງານຂອງຕົນຢ່າງເປັນຮູບປະທໍາຊຶ່ງມີຄຳສັ່ງວ່າດ້ວຍການກັກການຢຶດ ແລະອາຍັດທຶນທີ່ກ່ຽວຂ້ອງກັບການສະໜອງທຶນໃຫ້ແກ່ການແຜ່ຜາຍອາວຸດທໍາລາຍລ້າງຜານ ສະບັບເລກທີ 20/ນຍ, ລົງວັນທີ 26 ພະຈິກ 2020; ຄໍາສັ່ງວ່າດ້ວຍການກັກການຢຶດ ແລະການອາຍັດທຶນທີ່ພົວພັນກັບຜູ້ກໍ່ການຮ້າຍ ແລະການສະໜອງທຶນໃຫ້ແກ່ການກໍ່ການຮ້າຍສະບັບເລກທີ 3/ນຍ, ລົງວັນທີ 11 ກຸມ ພາ 2016 ແລະຮ່າງຂໍ້ຕົກລົງວ່າດ້ວຍການຊອກຮູ້ລູກຄ້າ ແລະການເພີ່ມທະວີການເອົາໃຈໃສ່ລູກຄ້າ (ສະບັບປັບປຸງ).

ພ້ອມດຽວກັນນີ້,ກໍ່ເປັນການຈັດຕັ້ງປະຕິບັດແຜນວຽກໃນການກະກຽມຄວາມພ້ອມຮອງຮັບໃຫ້ແກ່ການປະເມີນການຈັດຕັ້ງປະຕິບັດວຽກງານຕ້ານສະກັດກັ້ນການຟອກເງິນ ແລະການສະໜອງທຶນໃຫ້ແກ່ການກໍ່ການຮ້າຍຕາມພັນທະສາກົນຂອງ ສປປ ລາວ ໃນຄັ້ງທີ 2 (ລະຫວ່າງ ປີ 2020-2021).

ຂ່າວ: ຣັດສະໝີ ດວງສັດຈະ

ຮູບພາບ: ໜັງສືພິມເສດຖະກິດສັງຄົມ

แชร์