ສະຫຼຸບວຽກກໍ່ສ້າງຮາກຖານການເມືອງພັດທະນາ 3 ຈຸດສຸມ ແຂວງໄຊສົມບູນ

ຂ່າວ: ຈິນລະວອນ ວໍລະສົມບູນ

  ກອງປະຊຸມສະຫຼຸບຖອດຖອນບົດຮຽນວຽກງານກໍ່ສ້າງຮາກຖານການເມືອງ-ພັດທະນາ 3 ຈຸດສຸມ ແຂວງໄຊສົມບູນໄລຍະ 5 ປີ 2015-2020 ແລະທິດທາງແຜນ ການ 5 ປີ2021-2025 ໄດ້ໄຂຂຶ້ນຢ່າງເປັນທາງການໃນວັນທີ 5 ມີນາ 2021 ນີ້ທີ່ສະໂມສອນເມືອງອະນຸວົງ ໂດຍການເປັນປະທານຂອງສະຫາຍ ພົນເອກ ຈັນສະໝອນ ຈັນຍາລາດ, ກຳມະການກົມການເມືອງສູນກາງພັກ, ລັດຖະມົນຕີກະຊວງປ້ອງກັນປະເທດ, ມີສະຫາຍ ພົນຕີ ຄຳລຽງ ອຸທະໄກສອນ,ກຳມະການສູນກາງພັກ, ເລຂາພັກແຂວງ, ເຈົ້າແຂວງໄຊສົມບູນ, ສະຫາຍ ພົນຕີ ວົງຄຳ ພົມມະກອນ, ກຳມະການສູນກາງພັກ, ຫົວໜ້າກົມໃຫຍ່ເສນາທິການກອງທັບ, ຫົວໜ້າຄະນະຊີ້ນຳພັດທະນາ 3 ຈຸດສຸມ ແຂວງໄຊສົມບູນ, ມີກຳມະການສູນກາງພັກ-ຮອງລັດຖະມົນຕີ ບັນດາກະຊວງ, ຄະນະພັກ-ຄະນະນຳ ແຂວງໄຊສົມບູນພ້ອມດ້ວຍການນຳທັງ 5 ເມືອງ-ບັນດາບ້ານ ແລະທຸກພາກສ່ວນກ່ຽວຂ້ອງເຂົ້າຮ່ວມ.

  ໂອກາດນີ້ສະຫາຍ ພົນຕີ ວົງຄຳ ພົມມະກອນ, ກຳມະການສູນກາງພັກ, ຫົວໜ້າກົມໃຫຍ່ເສນາທິການກອງທັບ, ຫົວໜ້າຄະນະຊີ້ນຳພັດທະນາ 3 ຈຸດສຸມ ແຂວງໄຊສົມບູນໄດ້ຜ່ານບົດສະຫຼຸບວຽກງານກໍ່ສ້າງຮາກຖານການເມືອງ-ພັດທະນາຊົນນະບົດ 5 ປີ ຂອງຄະນະຊີ້ນຳ 3 ຈຸດສຸມ ໃນໄລຍະຜ່ານມາຊຶ່ງສູນກາງ ແລະອຳນາດການປົກຄອງທ້ອງຖິ່ນແຕ່ລະຂັ້ນໄດ້ສຸມໃສ່ແກ້ໄຂບັນຫາຄວາມບໍ່ສະຫງົບ ແລະຄວາມທຸກຍາກຂອງປະຊາຊົນບັນດາເຜົ່າໂດຍຫັນເອົາພະນັກງານລົງກໍ່ສ້າງຮາກຖານການເມືອງຕາມ 4 ເນື້ອໃນ 4 ຄາດໝາຍເຮັດໃຫ້ອຳນາດການປົກຄອງບ້ານ ແລະປະຊາຊົນມີຄວາມຕື່ນຕົວໃນການປົກປັກຮັກສາ-ພັດທະນາບ້ານຊ່ອງ, ລະບົບປະຊາທິປະໄຕຢູ່ຮາກຖານບ້ານໄດ້ຮັບການປັບປຸງໃຫ້ເຂັ້ມແຂງໂດຍຮັບປະກັນຄວາມສະຫງົບ ແລະເປັນລະບຽບຮຽບຮ້ອຍຢ່າງໜັກແໜ້ນ,ປະຊາຊົນໄດ້ຕັ້ງໜ້າປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງທ້ອງຖິ່ນກໍຄືຄອບຄົວຂອງຕົນໃຫ້ຫຼຸດພົ້ນອອກຈາກຄວາມທຸກຍາກເທື່ອລະກ້າວ, ຊີວິດການເປັນຢູ່ທາງດ້ານວັດຖຸ ແລະຈິດໃຈຂອງເຂົາ ເຈົ້າໄດ້ຮັບການຍົກລະດັບດີຂຶ້ນເລື້ອຍໆ, ບັນດາພື້ນຖານໂຄງລ່າງໄດ້ຮັບການປັບປຸງກໍ່ສ້າງຢ່າງເປັນຮູບປະທຳຊຶ່ງເປັນເງື່ອນໄຂໃນການສ້າງບ້ານພັດທະນາໃຫ້ກາຍເປັນຕົວເມືອງນ້ອຍໃນຊົນນະບົດ. ພ້ອມນີ້ລູກຫຼານປະຊາຊົນບັນດາເຜົ່າໄດ້ຮັບການຮໍ່າຮຽນຢ່າງທົ່ວເຖິງ ແລະໃນເວລາເຈັບເປັນກໍໄດ້ຮັບການປິ່ນປົວເປັນຢ່າງດີ, ການເຊື່ອຖືແບບງົມງວາຍໄດ້ມີທ່າອຽງຫຼຸດລົງເປັນກ້າວໆ,ກອງປະຊຸມຄັ້ງນີ້ໄດ້ຕີລາຄາຄືນຢ່າງພາວະວິໄສໂດຍຍົກໃຫ້ເຫັນເຖິງຜົນງານອັນພົ້ນເດັ່ນໃນການຈັດຕັ້ງປະຕິບັດຜ່ານມາ,ດ້ານດີ, ດ້ານອ່ອນ, ບາງບົດຮຽນທີ່ຖອດຖອນໄດ້ ແລະບັນຫາຂໍ້ຄົງຄ້າງອື່ນໆ ທັງນີ້ກໍເພື່ອພ້ອມກັນຄົ້ນຄວ້າແລະປຶກສາຫາລືຢ່າງ ປະດິດສ້າງແນໃສ່ວາງທິດທາງແຜນການ ຈັດຕັ້ງປະຕິບັດໃນຕໍ່ໜ້າໃຫ້ມີຄວາມຮັດກຸມ ແລະມີປະສິດທິພາບດີຂຶ້ນກວ່າເກົ່າ. ກອງປະຊຸມໄດ້ຖືໂອກາດດັ່ງກ່າວມອບໃບຍ້ອງຍໍໃຫ້ກົມກອງລວມໝູ່ ແລະ ບຸກຄົນທີ່ມີຜົນງານດີເດັ່ນໃນການປະກອບສ່ວນປົກປັກຮັກສາແລະສ້າງສາພັດທະນາແຂວງໄຊສົມບູນໃນໄລຍະຜ່ານມາ, ໃນໂອກາດທີ່ມີຄວາມໝາຍ-ຄວາມສຳຄັນນີ້ ສະຫາຍ ພົນເອກ ຈັນສະໝອນ ຈັນຍາລາດ, ກຳມະການກົມການເມືອງສູນກາງພັກ,ລັດຖະມົນຕີກະຊວງປ້ອງກັນປະເທດໄດ້ມີຄຳເຫັນໂອ້ລົມຕໍ່ກອງປະຊຸມຊຶ່ງສະຫາຍໄດ້ເນັ້ນໜັກໃຫ້ຄະນະຊີ້ນຳ 3ຈຸດສຸມປະສານສົມທົບກັບການນຳແຂວງໄຊສົມບູນສືບຕໍ່ຊີ້ນຳ-ນຳພາວຽກງານນີ້ຢ່າງເລິກເຊິ່ງ ແລະແທດເຖິງໂດຍຫັນເອົາພະນັກງານລົງສູ່ຮາກຖານ-ນຳພາປະຊົນເຮັດຕົວຈິງ, ຕັ້ງໜ້າປຸກລະດົມຂົນຂວາຍ-ສຶກສາອົບຮົມປະຊາຊົນໃຫ້ມີຄວາມຕື່ນຕົວດຸໝັ່ນຫ້າວຫັນທຳມາຫາກິນ-ຜະລິດເປັນສິນຄ້າ ແລະ ເຮັດການບໍລິ ຫານສ້າງລາຍຮັບເຂົ້າຄອບຄົວທັງປະກອບສ່ວນປົກປັກຮັກສາ ແລະສ້າງສາບ້ານຊ່ອງຂອງຕົນໂດຍສອດຫ້ອຍກັບວຽກງານປ້ອງກັນຊາດ-ປ້ອງກັນຄວາມສະຫງົບຢູ່ຮາກ ຖານໃຫ້ໜັກແໜ້ນເພື່ອຮັບປະກັນສະຖຽນລະພາບໃຫ້ແກ່ການພັດທະນາເສດຖະກິດ-ສັງຄົມຢູ່ຂັ້ນຮາກຖານ,ທັງໝົດນັ້ນກໍເພື່ອສຸມໃສ່ສ້າງສາພັດທະນາແຂວງໄຊສົມ ບູນໃຫ້ມັ່ງຄັ່ງເຂັ້ມແຂງ ແລະຫຼຸດພົ້ນອອກຈາກຄວາມທຸກຍາກເທື່ອລະກ້າວ.

ຮູບພາບ: ໜັງສືພິມເສດຖະກິດສັງຄົມ

แชร์