ປີນີ້ ຈຳປາສັກ ຕັ້ງເກັບລາຍຮັບ 1,4 ພັນຕື້ກີບ

  ໃນວັນທີ 2 ມີນາ 2021, ທີ່ສະໂມສອນຂອງແຂວງ (ຫຼັກ4) ພະແນກການເງິນແຂວງຈຳປາສັກ, ໄດ້ເປີດກອງປະຊຸມສະຫຼຸບການຈັດຕັ້ງປະຕິບັດແຜນງົບປະມານປະຈຳປີ 2020 ແລະທິດທາງແຜນການປີ 2021 ທົ່ວແຂວງຈຳປາສັກໂດຍການເຂົ້າຮ່ວມເປັນປະທານຂອງທ່ານ ສົມບູນ ເຮືອງວົງສາ ຮອງເຈົ້າແຂວງໆຈຳປາສັກ, ຜູ້ຊີ້ນຳວຽກງານເສດຖະກິດ, ມີຫົວໜ້າພະແນກ, ຮອງຫົວໜ້າພະແນກການເງິນ, ຫົວໜ້າຂະແໜງການ 3 ສາຍຕັ້ງ, ຫົວໜ້າຂະແໜງທີ່ຂື້ນກັບພະແນກການເງິນ, ແຂກຖືກເຊີນຈາກພະແນກການອ້ອມຂ້າງແຂວງ, ມີຮອງເຈົ້ານະຄອນປາກເຊ, ຮອງເຈົ້າເມືອງ 9 ຕົວເມືອງ, ຫົວໜ້າຫ້ອງການເງິນນະຄອນ 9 ຕົວເມືອງ ແລະພະນັກງານຂອງຂະແໜງການເງິນທັງໝົດເຂົ້າຮ່ວມ.

 ທ່ານ ສຸກກະເສີມ ສີຫານຸວົງ ຫົວໜ້າພະແນກການເງິນແຂວງຈໍາປາສັກໄດ້ລາຍງານສະພາບການຈັດຕັ້ງປະຕິບັດວຽກງານໃນໄລຍະຜ່ານມາໃຫ້ຮູ້ວ່າ: ປີ 2020 ພະ ແນກການເງິນແຂວງຈໍາປາສັກໄດ້ຮັບຕົວເລກແຜນການຈັດເກັບລາຍຮັບຈໍານວນ 1.456,36 ຕື້ກີບ ໃນນັ້ນ, ລາຍຮັບພູດສູນກາງ 826,10 ຕື້ກີບ, ລາຍຮັບພູດ ທ້ອງຖິ່ນ 630,26 ຕື້ກີບ.

  ຜ່ານການຈັດຕັ້ງປະຕິບັດວຽກງານຕົວຈິງໝົດປີ 2020 ສາມາດປະຕິບັດລາຍຮັບໄດ້ທັງໝົດ 1.317,91 ຕື້ກີບ, ລາຍຮັບປົກກະຕິໄດ້ 1.317,04 ຕື້ກີບ, ທຽບໃສ່ແຜນດັດແກ້ເທົ່າກັບ 90,43% ທຽບໃສ່ໄລຍະດຽວຂອງປີກ່ອນເພີ່ມຂຶ້ນ 0,48%.

  ສໍາລັບທິດທາງແຜນການປີ 2021 ໄດ້ຮັບຕົວເລກແຜນການຈັດເກັບລາຍຮັບງົບປະມານທັງໝົດທົ່ວແຂວງຈໍານວນ 1.489,81 ຕື້ກີບ, ເທົ່າກັບ 6,34% ຂອງ GDP (GDP ຂອງແຂວງ 23.511 ຕື້ກີບ), ທຽບໃສ່ແຜນດັດແກ້ປີ 2020 ເພີ່ມຂຶ້ນ 2,30% ຫຼືເທົ່າກັບ 33,45 ຕື້ກີບ.

  ໃນກອງປະຊຸມຍັງໄດ້ຜ່ານຄໍາແນະນໍາໃນການຈັດຕັ້ງປະຕິບັດແຜນງົບປະມານປີ 2021, ແນະນໍາບັນດາມາດຕະການ ແລະວຽກຈຸດສຸມຂອງແຕ່ລະຂະແໜງການເປັນຕົ້ນ: ວຽກງານພາສີ, ສ່ວຍສາອາກອນ ແລະ ຄຸ້ມຄອງຊັບສິນຂອງລັດ, ພ້ອມທັງລາຍງານວຽກງານອັນທີ່ພົ້ນເດັ່ນໃນການຈັດຕັ້ງປະຕິບັດແຜນງົບປະມານປີ 2020 ແລະທິດທາງ ປີ 2021 ໃນການຄຸ້ມຄອງຫົວໜ່ວຍທຸລະກິດເຂົ້າໃນລະບົບພັນທະໃໝ່, ການຄຸ້ມຄອງໃບເກັບເງິນ, ການເກັບຄ່າທໍານຽມ ແລະຄ່າບໍລິການ, ການຄຸ້ມຄອງ ແລະການຈັດເກັບລາຍຮັບວິຊາການ ແລະປະກອບຄໍາຄິດເຫັນໃສ່ແຕ່ລະວຽກງານເພື່ອເຮັດໃຫ້ການຈັດຕັ້ງປະຕິບັດວຽກງານໄດ້ຮັບຜົນສໍາເລັດ.

  ໂອກາດດັ່ງກ່າວ, ທ່ານ ສົມບູນ ເຮືອງວົງສາ ຮອງເຈົ້າແຂວງໆຈຳປາສັກຍັງໄດ້ໃຫ້ທິດຊີ້ນໍາເພື່ອເປັນທິດເຍືອງທາງໃນການຈັດຕັ້ງປະຕິບັດວຽກງານຂະແໜງການເງິນໃນຕໍ່ໜ້າໂດຍເນັ້ນໃຫ້ແຕ່ລະຂະແໜງການເອົາໃຈໃສ່ຈັດຕັ້ງປະຕິບັດວຽກງານດ້ວຍຄວາມຈູກຈ້າວຫ້າວຫັນມີແບບແຜນໃນການປະຕິບັດວຽກງານຂອງຕົນໃຫ້ໄດ້ຮັບຜົນສໍາເລັດ ແລະມີປະສິດທິຜົນເປັນກ້າວໆ.

ຂ່າວ ກະຊວງການເງິນ

แชร์