ເມືອງອະນຸວົງ ໄດ້ຮັບການພັດທະນາຫຼາຍດ້ານ

  ເມືອງອະນຸວົງ ເປັນເມືອງ ໜຶ່ງທີ່ນອນຢູ່ໃນ 5 ເມືອງ ຂອງແຂວງໄຊສົມບູນ, ເປັນເມືອງເທສະບານຂອງແຂວງ ໄດ້ສ້າງຕັ້ງຂຶ້ນວັນທີ 3/12/2013 ໂດຍແມ່ນການ ແຍກເມືອງໄຊສົມບູນທີ່ຂຶ້ນກັບແຂວງວຽງຈັນໃນເມື່ອກ່ອນນັ້ນອອກເປັນສອງເມືອງຄື: ເມືອງອະນຸວົງ ແລະເມືອງລ້ອງແຈ້ງ, ຊຶ່ງເມືອງອະນຸວົງ ໃນປະຈຸບັນມີທີ່ຕັ້ງຢູ່ຈຸດຂອງເມືອງໄຊສົມບູນໃນເມື່ອກ່ອນພາຍໃນເມືອງປະກອບມີທັງໝົດ 19 ບ້ານ, ມີ4.033 ຫຼັງຄາ ເຮືອນ, ມີຈໍານວນຄົວເຮືອນ 4.136 ຄົວເຮືອນ, ມີພົນລະເມືອງທັງໝົດ 24.936 ຄົນ, ຍິງ 12.224 ຄົນ, ປະກອບມີ 3 ຊົນເຜົ່າຄື: ເຜົ່າລາວລຸ່ມ 6.100 ກວ່າຄົນ, ຍິງ 2.930 ຄົນ, ກວມ 24,13%,ເຜົ່າມົ້ງ 16.470 ຄົນ, ຍິງ 8.221 ຄົນ, ກວມຢູ່66,85%, ເຜົ່າກຶມມຸ 2.166 ຄົນ, ຍິງ 130 ຄົນ, ກວມ 8,6%, ພູມສັນຖານໂດຍທົ່ວໄປ ເປັນພູດອຍ,ເຂດຮາບພຽງມີໜ້ອຍ, ເປັນເມືອງທີ່ຕັ້ງຂອງພູເບ້ຍທີ່ສູງທີ່ສຸດຢູ່ໃນປະເທດລາວທີ່ມີລະດັບຄວາມສູງຈາກໜ້ານໍ້າທະເລປະມານ 2.820 ແມັດ, ມີຖໍ້າເຈົ້າອະນຸວົງ, ຊຶ່ງເປັນອົງກະສັດຂອງລາວ ໃນເມື່ອກ່ອນມາອາໄສຢູ່ໃນຖໍ້າແຫ່ງນີ້, ເປັນເມືອງທີ່ອຸດົມສົມບູນໄປດ້ວຍຊັບໃນດິນສີນໃນນໍ້າເປັນຕົ້ນ: ມີແຮ່ທອງແດງ, ແຮ່ຄຳ, ແຮ່ເຫຼັກ. ປະຊາຊົນມີມູນເຊື້ອໃນການ ຕໍ່ສູ້ຢ່າງພິລະອາດຫານ, ມີມູນເຊື້ອດຸໝັ່ນຂະຫຍັນພຽນ, ມີບົດຮຽນໃນການປູກຝັງ-ລ້ຽງສັດ; ອາກາດເມືອງອະນຸວົງນີ້ເປັນພູມອາກາດທີ່ຊຸ່ມຊື່ນຕະຫຼອດປີ, ມີອຸນຫະ ພູມຕໍ່າສຸດບາງປີ-3 ຫາ-5 ອົງສາ, ມີຝົນຕົກຕະຫຼອດ 8 ເດືອນ ມີພູຜາປ່າດົງ, ແມ່ນໍ້າລໍາເຊຫຼາຍສາຍ, ມີທົວທັດທີ່ສວຍງາມເໝາະແກ່ການປູກຝັງ-ລ້ຽງສັດ, ການສ້າງເຂື່ອນໄຟ້ຟ້າ ແລະເປັນທ່າແຮງທາງດ້ານການທ່ອງທ່ຽວອັນສຳຄັນຂອງເມືອງ.

 ກ່ອນການປົດປ່ອຍເມືອງອະນຸວົງເຄີຍເປັນເຂດຄຸ້ມຄອງ,ເປັນຖານທີ່ໝັ້ນ ແລະສູນບັນຊາການລັບຂອງທະຫານຈັກກະພັດອາເມລິການທີ່ດຳເນີນການຕໍ່ສູ້ກັບຝ່າຍແນວລາວຮັກຊາດປະຊາຊົນຖືກກົດຂີ່ຂູດຮິດ,ຖືກຈຳກັດການເຄື່ອນໄຫວທຳມາຫາກິນເຮັດໃຫ້ຊີວິດການເປັນຢູ່ພົບຄວາມຫຍຸ້ງຍາກ. ພາຍຫຼັງປະເທດຊາດໄດ້ຮັບການປົດປ່ອຍຢ່າງສົມບູນ ເມືອງອະນຸ ວົງໄດ້ກາຍເປັນເຂດຈຸດສູມພັດທະນາຂອງລັດຖະບານຫຼັງຈາກສ້າງຕັ້ງເປັນແຂວງໄຊສົມບູນຊຶ່ງຍັງແມ່ນຈຸດສຸມພິເສດຂອງລັດຖະບານທີ່ຈະຕ້ອງລົງໃກ້ຊິດຕິດແທດ ແລະ ລົງທຶນເຂົ້າໃນການພັດທະນາຫຼາຍດ້ານເນື່ອງຈາກປະຊາຊົນຈຳນວນໜຶ່ງຍັງດໍາລົງຊີວິດຕິດພັນກັບທໍາມະຊາດ ແລະ ພູມສັນຖານຂອງເມືອງສ່ວນຫຼາຍເປັນພູຜາຊັນເປັນເຂດສອກຫຼີກ, ບ້ານຢູ່ກະແຈກກະຈາຍ ແລະທຸລະກັນດານມີຄວາມສ່ຽງຫຼາຍດ້ານເຮັດໃຫ້ນັກລົງທຶນບໍ່ຢາກມາລົງທຶນຢູ່ບໍລິເວນນີ້, ຍັງຂາດເຂີນພະນັກງານດ້ານປະລິມານ ແລະຄຸນນະພາບ. ຍ້ອນແນວນັ້ນການນຳພັກ-ລັດ ກໍຄືອຳນາດການປົກຄອງທ້ອງຖິ່ນໄດ້ສຸມທຶນຮອນເຂົ້າໃສ່ພ້ອມທັງໂຄສະນາປຸກລະດົມຂົນຂວາຍເຮັດວຽກງານການເມືອງ-ແນວຄິດຢ່າງຂະຫຍັນຂັນແຂງເຊິ່ງເຮັດໃຫ້ສະພາບແນວຄິດ, ຊີວິດການເປັນຢູ່ຂອງປະຊາຊົນໃນເຂດດັ່ງກ່າວໄດ້ມີການຫັນປ່ຽນຢ່າງຕັ້ງໜ້າ ແລະໄດ້ຮັບການພັດທະນາຂຶ້ນເປັນກ້າວໆ.

  ນັບແຕ່ກອງປະຊຸມໃຫຍ່ຄັ້ງທີ I ຂອງອົງຄະນະພັກເມືອງທ້າຍປີ 2014 ເປັນຕົ້ນມາຄະນະພັກອົງການປົກຄອງເມືອງໄດ້ເອົາໃຈໃສ່ຊີ້ນຳ-ນຳພາ ແລະເຮັດວຽກງານ ແນວຄິດໂດຍຫັນເອົາມະຕິກອງປະຊຸມໃຫຍ່ຄັ້ງທີ X ຂອງພັກ, ມະຕິຂອງອົງຄະນະພັກແຂວງ, ມະຕິກອງປະຊຸມໃຫຍ່ຄັ້ງທີ I ຂອງອົງຄະນະພັກເມືອງລົງເຜີຍແຜ່ໃຫ້ ປະຊາຊົນໄດ້ຮັບຮູ້, ເຊື່ອມຊຶມເພື່ອໃຫ້ເຂົ້າໃຈແນວທາງນະໂຍບາຍ ໂດຍສະເພາະແມ່ນຈັດຕັ້ງການໂຄ ສະນາ-ປາຖະກະຖາ, ຫັນພະນັກ ງານລົງຮາກຖານ, ຮ່ວມຊີວິດກັບ ປະຊາຊົນ,ເອົາການສ່ອງແສງປະຈຳທິດ, ປະຈຳເດືອນເປັນການສຶກສາອົບຮົມແນວຄິດ ແລະການເປີດບັ້ນດຳເນີນຊີວິດການເມືອງຜ່ານມາເຫັນວ່າສະພາບແນວຄິດຂອງພະນັກງານ, ສະມາຊິກພັກ ແລະປະຊາຊົນສ່ວນຫຼາຍແມ່ນມີແນວຄິດທຸ່ນທ່ຽງເຊື່ອໝັ້ນຕໍ່ການນຳພາຂອງພັກ, ມີຄວາມຮັບຮູ້ ແລະເຂົ້າໃຈຕໍ່ແນວທາງນະໂຍບາຍ ຂອງພັກ-ລັດ,ຕົ້ນຕໍແມ່ນໄດ້ຫັນເອົາແນວທາງປ້ອງກັນຊາດ-ປ້ອງ ກັນຄວາມສະຫງົບມາເຜີຍແຜ່ເພື່ອໃຫ້ປະຊາຊົນມີສ່ວນຮ່ວມໄດ້ເຮັດໜ້າທີ່ໃນການປົກປັກຮັກສາທ້ອງຖິ່ນໂຕເອງໃຫ້ມີຄວາມສະຫງົບເອົາໃຈໃສ່ປັບປຸງກຳລັງທະຫານເມືອງ, ປກສ ເມືອງ, ກອງຫຼອນບ້ານ ແລະ ປກສ ບ້ານເພື່ອໃຫ້ເຂົາເຈົ້າຮູ້ພາລະບົດບາດໜ້າທີ່ ແລະຄວາມຮັບຜິດຊອບໃນການປົກປັກຮັກສາຄວາມສະຫງົບຂອງສັງຄົມ. ພ້ອມນັ້ນ,ຍັງໄດ້ເອົາໃຈໃສ່ໃນການສ້າງບ້ານປ້ອງກັນຊາດດີ,ປ້ອງກັນຄວາມສະຫງົບດີ,ຊຶ່ງປະຊາຊົນແຕ່ລະບ້ານ, ແຕ່ລະທ້ອງຖິ່ນໄດ້ເຂົ້າຮ່ວມ ແລະປະກອບສ່ວນເຮັດໜ້າທີ່ປ້ອງກັນບ້ານຊ່ອງຂອງຕົນເອງ.

 ຄຽງຄູ່ກັນນັ້ນການພັດທະນາເສດຖະກິດກໍມີການຂະຫຍາຍຕົວຢ່າງຕໍ່ເນື່ອງເປັນຕົ້ນແມ່ນກະສິກຳ, ອຸດສາຫະກໍາ ແລະການບໍລິການເຫັນວ່າເພີ່ມຂຶ້ນລວມຍອດຜະລິດ ຕະພັນພາຍໃນບັນລຸເຖິງ 180,37 ຕື້ກີບ, ລື່ນແຜນການ 49,37 ຕື້ກີບ ສະເລ່ຍໃສ່ຫົວຄົນແມ່ນໄດ້ 912,47 ໂດລາຕໍ່ຄົນຕໍ່ປີ, ສຳລັບການພັດທະນາຊົນນະບົດແກ້ໄຂຄວາມທຸກຍາກຜ່ານມາແມ່ນໄດ້ຮັບການແກ້ໄຂຢ່າງຕັ້ງໜ້າເມື່ອທຽບໃສ່ ປີ 2015 ທົ່ວເມືອງແມ່ນມີຄອບຄົວທຸກຍາກ 644 ຄອບຄົວ, ກວມ 17,12%, ມາ ຮອດທ້າຍປີ 2017 ຄວາມທຸກຍາກທົ່ວເມືອງຍັງເຫຼືອພຽງແຕ່ 155 ຄອບຄົວ, ກວມ 3,74% ແລະການສ້າງພື້ນຖານໂຄງລ່າງໂດຍສະເພາະແມ່ນເສັ້ນທາງໄປຫາແຕ່ລະບ້ານແຕ່ລະກຸ່ມບ້ານແມ່ນທຽວໄດ້ຕະຫຼອດສອງລະດູ.

 ການສ້າງພື້ນຖານໂຄງລ່າງທາງດ້ານວັດທະນະທໍາ-ສັງຄົມ ເປັນຕົ້ນ: ວຽກງານສຶກສາແມ່ນມີໂຮງຮຽນປະຖົມທົ່ວທຸກບ້ານ, ໂຮງຮຽນມັດທະຍົມກໍມີຫຼາຍແຫ່ງໄດ້ຮັບການຍົກລະດັບເປັນໂຮງຮຽນສອງຊັ້ນໄດ້ະກາດຈົບຊັ້ນປະຖົມທົ່ວເມືອງຮຽບຮ້ອຍໄປແລ້ວໃນປີ 2015, ສືບຕໍ່ບຳລຸງການຮຽນການສອນນອກໂຮງຮຽນໃຫ້ນັກຮຽນ ມ ຕົ້ນ, ໃນປີ 2109 ເມືອງອະນຸວົງ ສາມາດປະກາດຈົບມັດທະຍົມຕົ້ນ. ພ້ອມນັ້ນ, ຍັງໄດ້ສ້າງໂຮງຮຽນອະນຸບານເພື່ອເຮັດໃຫ້ເດັກນ້ອຍມີພື້ນຖານອັນດີເພື່ອກ້າວເຂົ້າສູ່ຊັ້ນປະຖົມ.

  ວຽກສາທາລະນະສຸກກໍໄດ້ມີການພັດທະນາເປັນຕົ້ນແມ່ນໄດ້ສ້າງສຸກສາລາ, ຖົງຢາປະຈຳບ້ານໄດ້ມີໂຄງການໂຄສະນາສຸຂະສຶກສາໃຫ້ປະຊາຊົນໄດ້ຮູ້ກ່ຽວກັບການຮັກສາອະນາໄມຂັ້ນພື້ນຖານ, ຢູ່ດີກິນດີການສ້າງບ້ານແບບຢ່າງ ສາທາລະນະສຸກການໃຊ້ບໍລິການ ຢູ່ສຸກສາລາ, ການສັກ-ຢາຢອດຢາ ເພື່ອປ້ອງກັນພະຍາດຕ່າງຈາກນັ້ນແມ່ນການປັບປຸງສຸກສາລາ, ປັບ ປຸງນໍ້າລິນເຮັດໃຫ້ທຸກບ້ານແມ່ນ ມີນໍ້າສະອາດໃຊ້; ການຄຸ້ມຄອງ ແຮງງານໂດຍສະເພາະແມ່ນໄດ້ ມອບໝາຍໃຫ້ເຈົ້າໜ້າທີ່ ປກສ ເກັບກຳຈຳນວນສະຖິຕິແຮງງານຂອງ ຕ່າງປະເທດ, ແຮງງານພາຍໃນ ເພື່ອຂຶ້ນທະບຽນບັນຊີໃຫ້ລະອຽດ ຫັນໄປສູ່ການຄຸ້ມຄອງລັດດ້ວຍລະບຽບກົດໝາຍເທື່ອລະກ້າວ, ໄດ້ ຈັດຕັ້ງແບ່ງຂັ້ນຄຸ້ມຄອງລະຫວ່າງ ເມືອງກັບບ້ານ, ລະຫວ່າງເມືອງ ກັບແຂວງປັບປຸງອຳນາດການປົກ ຄອງບ້ານ, ໜວຍງານຊ່ວຍວຽກ ຂອງບ້ານ ແລະໄດ້ບຳລຸງແບບວິທີ ການບໍລິຫານບ້ານໂດຍອີງໃສ່ກົດ ໝາຍການປົກຄອງທ້ອງຖິ່ນມາ ເປັນເຄື່ອງມືໃນການຈັດຕັ້ງປະຕິບັດໃຫ້ແກ່ອົງການປົກຄອງບ້ານແນໃສ່ໃຫ້ອົງການປົກຄອງບ້ານຮູ້ບໍລິຫານບ້ານໃຫ້ບ້ານໄດ້ມີລະບົບປະຈຳການມີນາຍບ້ານມາປະ ຈຳການ, ມີໜ່ວຍງານຕ່າງໆເຂົ້າ ມາປະຈຳການການ, ຊີ້ນຳ-ນຳພາ ອົງການແນວລາວສ້າງຊາດ, ນັກ ຮົບເກົ່າ,ອົງການຈັດຕັ້ງມະຫາຊົນເພື່ອໃຫ້ອົງການເຫຼົ່ານັ້ນສາມາດເຮັດໜ້າທີ່ໃນການເຕົ້າໂຮມຄວາມສາມັກຄີ,ເປັນກຳລັງແຮງໃຫ້ແກ່ອຳນາດການປົກຄອງ, ຄະນະພັກ ແຕ່ລະຂັ້ນ.

  ວຽກງານການກໍ່ສ້າງ ແລະ ປັບປຸງພັກມາຮອດປະຈຸບັນໄດ້ມີການປັບປຸງຂະຫຍາຍສະມາຊິກພັກເພີ່ມຂຶ້ນ 259 ຄົນ, ກວມ 36% ຂອງຈໍານວນພະນັກງານລັດຖະກອນ, ສ້າງໜ່ວຍພັກປອດໃສ, ເຂັ້ມແຂງ ແລະໜັກແໜ້ນ16 ໜ່ວຍພັກ, ລົບລ້າງບ້ານຂາວໄດ້ 3 ບ້ານ, ເຮັດໃຫ້ທຸກບ້ານມີໜ່ວຍພັກຊີ້ນຳ-ນຳພາ.

  ມະຕິກອງປະຊຸມໃຫຍ່ຄັ້ງທີ I ຂອງອົງຄະນະພັກເມືອງໄດ້ວາງອອກເປັນຕົ້ນຄື: 1.ການສຶກສາອົບຮົມດ້ານແນວຄິດໃຫ້ແກ່ພະນັກງານ, ປະຊາຊົນຍັງແມ່ນວຽກງານ ທີ່ສຳຄັນ ແລະເປັນກົກທີ່ຈະຕ້ອງໄດ້ເຮັດເປັນປົກກະຕິຢູ່ໃນແຕ່ທ້ອງຖິ່ນຢູ່ໃນແຕ່ລະໜ່ວຍ, ຢູ່ໃນແຕ່ລະຂົງເຂດ, ຕ້ອງແຍກອອກເປັນແຕ່ລະເປົ້າໝາຍເພື່ອເຮັດວຽກງານ ແນວຄິດໃຫ້ທົ່ວເຖິງ, ຕ້ອງເລືອກເຝັ້ນເອົາເນື້ອໃນໃຫ້ຖືກເປົ້າໝາຍ ແລະເຮັດວຽກງານແນວຄິດຢ່າງມີຈຸດສຸມແກ້ແນວຄິດແຕ່ລະເປົ້າໝາຍໃຫ້ໄດ້, ລົງຮາກຖານແມ່ນ ເພື່ອສ້າງກຳລັງຢູ່ແຕ່ລະຮາກຖານບ້ານ,ຢູ່ແຕ່ລະຂົງເຂດ,ຢູ່ແຕ່ລະຂະແໜງການໃຫ້ມີຜູ່ເຮັດວຽກງານແນວຄິດໂດຍສະເພາະແມ່ນອົງການແນວລາວ, ນັກຮົບເກົ່າ ແລະ ອົງການຈັດຕັ້ງມະຫາຊົນຕ້ອງເຮັດໜ້າທີ່ໃນການສຶກສາອົບຮົມໃຫ້ປະຊາຊົນບັນດາເຜົ່າ, ຊັ້ນຄົນເຊື່ອໝັ້ນຕໍ່ການນຳພາຂອງພັກປະກອບສ່ວນປົກປັກຮັກສາ, ສ້າງສາພັດທະນາປະເທດຊາດ ແລະພັດທະນາຄອບຄົວຂອງເຂົາເຈົ້າໃຫ້ມີຊີວິດການເປັນຢູ່ດີຂຶ້ນ.

2. ເອົາໃຈໃສ່ນຳເອົາແນວທາງປ້ອງກັນຊາດ-ປ້ອງກັນຄວາມສະຫງົບ ມາເຜີຍແຜ່ໃຫ້ທຸກຄົນໄດ້ເຂົ້າໃຈໃຫ້ທຸກຄົນໄດ້ມີສ່ວນຮ່ວມໃນການເຮັດໜ້າທີ່ປ້ອງກັນຊາດ-ປ້ອງ ກັນຄວາມສະຫງົບຈຶ່ງຈະຮັບປະກັນໃຫ້ທົ່ວເມືອງມີຄວາມເປັນລະບຽບຮຽບຮ້ອຍສືບຕໍ່ປັບປຸງກຳລັງກອນຫຼອນ, ປັບປຸງກໍາລັງ ປກສ ບ້ານໂດຍສະເພາະແມ່ນສ້າງເຂົາເຈົ້າມີຄຸນທາດການເມືອງ,ມີຄວາມຮູ້ຄວາມສະມາດ,ມີຍຸດທະວິທີການສູ້ຮົບ,ການປ້ອງກັນຕົວເອງໃນການປົກປ້ອງທ້ອງຖິ່ນໂຕເອງ, ຈາກນັ້ນເອົາໃຈໃສ່ຄຸ້ມຄອງພົນລະເມືອງໂດຍການສືບຕໍ່ອອກບັດປະຈຳຕົວ, ປຶ້ມສໍາມະໂນຄົວ, ຄົນຍົກຍ້າຍ, ຄົນພັກອາໃສຊົ່ວຄາວ, ເພື່ອຮັບປະກັນຄວາມສະຫງົບໄດ້; ຕ້ອງກໍາໃຫ້ໄດ້ໜໍ່ແໜງຄວາມບໍ່ສະຫງົບ, ມີອາວຸດລ່າເນື້ອ, ອາວຸດເສິກ, ຄົນຫວ່າງງານ, ຄົນທຸກຍາກ, ບັນຫາສິ່ງເສບຕິດ, ຂີ້ລັກງັດແງ້ເພື່ອໃຫ້ສັງຄົມມີຄວາມເປັນລະບຽບຮຽບຮ້ອຍ, ເຮັດໃຫ້ແນວທາງປ້ອງ ກັນຊາດກາຍເປັນພຶດຕິກຳຕົວຈິງຂອງທຸກຄົນຈຶ່ງຈະສາມາດຮັບປະກັນໃຫ້ທຸກບ້ານ ແລະເມືອງມີຄວາມສະຫງົບ.

3. ຕ້ອງເອົາໃຈໃສ່ສົ່ງເສີມອຸດສາຫະກຳຂະໜາດນ້ອຍ, ຂະໜາດກາງ ເພື່ອເຮັດໃຫ້ຜົນຜະລິດ ແລະເຮັດໃຫ້ການບໍລິການເພີ່ມຂຶ້ນເປັນ 30% ຕ້ອງສູ້ຊົນສ້າງລາຍຮັບໃຫ້ໄດ້ 1.200 ໂດລາຕໍ່ຄົນຕໍ່ປີ, ສົ່ງເສີມບັນດາໂຮງງານ, ການລົງທຶນຕ່າງໆ, ປູກພຶດເມືອງໜາວ, ໂຮງງານກິນຈິຜັກກາດຂາວ, ແຫຼ່ງທ່ອງທ່ຽວເຈົ້າອານຸ, ສືບຕໍ່ເອົາໃຈໃສ່ການຜະລິດເປັນສິນຄ້າເພື່ອສົ່ງຂາຍໃຫ້ໂຮງງານເຮັດກິນຈິ, ສົ່ງເສີມການລ້ຽງສັດໃຫຍ່ຂອງຄອບຄົວທີ່ບໍ່ທັນມີດິນທຳການຜະລິດມີນະໂຍບາຍມອບດິນໃຫ້ຂົາເຈົ້າທຳການຜະລິດຈຶ່ງຈະສາມາດຫຼຸດພົ້ນອອກຈາກຄວາມທຸກຍາກໄດ້ ແລະ ປະສານສົມທົບກັບທະນາຄານນະໂຍບາຍ, ທະນາຄານສົ່ງເສີມກະສິກໍາເພື່ອໃຫ້ປະຊາຊົນສາມາດເຂົ້າຫາແຫຼ່ງທຶນໄປພັດທະນາເສດຖະກິດຄອບຄົວໃຫ້ຫຼຸດພົ້ນອອກຈາກຄວາມທຸກຍາກໄດ້; ເອົາໃຈໃສ່ຍົກສູງສະມັດຕະພາບຂອງການຜະລິດເຂົ້າຂຶ້ນຕື່ມສືບຕໍ່ສ້າງພື້ນຖານໂຄງລ່າງທາງດ້ານຊົນລະປະທານໂດຍການປຸກລະດົມການລົງທຶນຈາກຫຼາຍພາກສ່ວນເພື່ອເຮັດໃຫ້ພວກເຮົາສາມາດມີທຶນຮອນເຂົ້າໃນການພັດທະນາ; ເອົາໃຈໃສ່ການພັດທະນາສ້າງເມືອງອະນຸວົງໃຫ້ກາຍເປັນເມືອງທ່ອງທ່ຽວໂດຍອີງໃສ່ແຫຼ່ງທ່ອງທ່ຽວທຳມະຊາດພາຍໃນເມືອງເພື່ອຈະເຮັດໃຫ້ເສດຖະກິດໄດ້ມີການເຕີບ ໂຕຢ່າງຕໍ່ເນື່ອງ ແລະສາມາດແກ້ໄຂໄດ້ຄວາມທຸກຍາກໄດ້.

4. ສືບຕໍ່ສ້າງພື້ນຖານໂຄງລ່າງຕ່າງໆເປັນຕົ້ນແມ່ນໂຮງຮຽນອະນຸບານຕ້ອງໃຫ້ເດັກນ້ອຍໄດ້ເຂົ້າຮຽນໃນໄວຮຽນ ແລະການສ້າງບ້ານແບບຢ່າງດ້ານຕ່າງໆ, ບ້ານພັດທະ ນາ, ຕ້ອງໄດ້ເອົາໃຈໃສ່ການຍົກລະດັບຊີວິດການເປັນຢູ່ຂອງປະຊາຊົນໂດຍການສ້າງຖະໜົນຫົນທາງ, ນ້ໍາປະປາ, ຕະຫຼາດຕ່າງໆ ເພື່ອໃຫ້ຮອງຮັບໃຫ້ແກ່ການພັດທະນາ; ສືຕໍ່ຫຍອດຢາ, ສັກຢາປ້ອງກັນພະຍາດໃຫ້ແມ່ຍິງ, ເດັກນ້ອຍ ແລະແມ່ມານ. ບັນດາອົງການຈັດຕັ້ງແມ່ຍິງ, ສາທາ, ແນວລາວສ້າງຊາດຕ້ອງເຮັດໜ້າທີ່ໃນການປຸກລະດົມປະຊາຊົນໃຫ້ເຂົ້າມາໃຊ້ບໍລິການຢູ່ສຸກສາລາ, ຢູ່ໂຮງໝໍເມືອງ; ຕ້ອງປະຕິບັດການສັກຢາໃຫ້ແຕ່ລະກຸ່ມບ້ານຄຽງຄູ່ກັບການສ້າງບ້ານແບບຢ່າງສາທາລະນະສຸກ, ການອະນຸລັກຮັກສາຮິດຄອງປະເພນີ-ວັດທະນະທຳໂດຍການສ້າງບ້ານວັດທະນະທຳໃຫ້ເພີ່ມ; ເອົາໃຈໃສ່ຄຸ້ມຄອງແຮງງານພາຍໃນ ແລະ ຕ່າງປະເທດໃຫ້ຖືກລະບຽບ ກົດໝາຍ.

5. ການຄຸ້ມຄອງລັດ-ການຄຸ້ມຄອງສັງຄົມຢູ່ແຕ່ລະບ້ານຕ້ອງສ້າງລະບຽບບ້ານທີ່ບໍ່ຂັດກັບລະບຽບກົດໝາຍໃຫ້ເປັນເຄື່ອງມືໃຫ້ແກ່ອົງການປົກຄອງບ້ານ; ປັບປຸງລະບົບປະຈຳການບໍລິຫານບ້ານໃຫ້ດີເພື່ອເຮັດໃຫ້ປະຊາຊົນ ສາມາດເຂົ້າເຖິງການບໍລິການຂອງບ້ານໂດຍໃຫ້ມີການປະຈຳການເປັນ ປົກກະຕິ, ປັບປຸງພື້ນຖານໂຄງລ່າງໃຫ້ແກ່ບ້ານ, ເປັນຕົ້ນຕ້ອງມີຫ້ອງການບ້ານ, ຕ້ອງມີສະໂມສອນບ້ານ; ປັບປຸງບັນດາຂະແໜງການຕ່າງໆ ຂອງເມືອງໃຫ້ມີຄວາມເຂັ້ມແຂງສາມາດຮັບໃຊ້ໜ້າທີ່ການເມືອງທີ່ໄດ້ຮັບການມອບໝາຍ.

6. ການກໍສ້າງພັກ-ພະນັກງານ ໂດຍສະເພາະແມ່ນການສ້າງໜ່ວຍພັກປອດໃສ,ເຂັ້ມແຂງ ແລະໜັກແໜ້ນໃຫ້ມີຈຳນວນເພີາມຂຶ້ນຈາກ 16 ໜ່ວຍພັກເປັນ 23-24 ໜ່ວຍຕ້ອງໄດ້ສູ້ຊົນຂະຫຍາຍສະມາຊິກພັກໃຫ້ມີຄຸນທາດການເມືອງ, ຮັບປະກັນດ້ານຄຸນນະພາບ, ມີຄຸນສົມບັດສິນທຳປະຕິວັດຕິດພັນກັບການດຳເນີນຊີວິດການເມືອງຢູ່ແຕ່ລະໜ່ວຍພັກ, ແຕ່ລະຄະນະພັກຮາກຖານເປັນປົກກະຕິເຮັດໃຫ້ລະບົບການເມືອງຢູ່ແຕ່ລະຂັ້ນມີຄວາມເຂັ້ມແຂງ.

7 ການກໍ່ສ້າງ ແລະ ກຳນົດຕຳແໜ່ງງານຕ້ອງເໝາະສົມກັບສະພາບຄວາມເປັນຈິງໂດຍທົບກັນລະຫວ່າງສາຍຕັ້ງ ແລະ ສາຍຂວາງລະອຽດເພື່ອເຮັດໃຫ້ກົງຈັກກະທັດຮັດ, ມີຄຸນນະພາບ; ກໍ່ສ້າງບຳລຸງພະນັກງານຕ້ອງຮັບປະກັນໃຫ້ໄດ້ຜູ້ທີ່ມີຄວາມຮູ້, ມີຄວາມສາມາດ, ມີຄຸນສົມບັດສິນທໍາປະຕິວັດ, ມີຄຸນທາດການເມືອງ, ນອກນັ້ນຈະ ຕ້ອງໄດ້ຍົກສູງຄວາມຮູ້ຄວາມສາມາດ, ຍົກສູງທັງທິດສະດີການເມືອງຕ່າງໆ ໃຫ້ເຂົາເຈົ້າໄດ້ມີຄວາມພ້ອມ ແລະການຊັບຊ້ອນພະນັກງານໃຫ້ຖືກຕາມວິຊາສະເພາະຖືກຕາມຄວາມສາມາດໃຫ້ເໝາະສົມບໍ່ໃຫ້ຫຼາຍເກີນໄປບໍ່ໃຫ້ນ້ອຍເກີນໄປຖືກຕາມຄວາມຮຽກຮ້ອງຕ້ອງການຂອງໜ້າທີ່ວຽກງານຄຽງຄູ່ກັນນັ້ນກໍປະຕິບັດນະໂຍບາຍຕໍ່ພະນັດງານຜູ້ທີ່ມີຜົນງານ,ຜູ້ທີ່ມີຄວາມຫ້າວຫັນ, ມີຄວາມຮັບຜິດຊອບສູງກົງກັນຂ້າມຕ້ອງມີຄວາມເດັດດ່ຽວເຂັມງວດຕໍ່ພະນັກງານທີ່ເຮັດຜິດລະບຽບວິໄນ, ຕ້ອງກ້າຕັດ ສິນໃຈປະຕິບັດວິໄນລົງໂທດຕາມລະບຽບກົດໝາຍເພື່ອໃຫ້ອົງການຈັດຕັ້ງພັກ-ລັດປອດໃສສາມາດເປັນແກ່ນນຳໃນການນຳພາແກ້ໄຂໃຫ້ຊີວິດການເປັນຢູ່ຂອງປະຊາຊົນນັບມື້ນັບດີຂຶ້ນເມືອງໄດ້ຮັບການພັດທະນາໄປຕາມທິດທາງທີ່ວາງໄວ້.

ໂດຍ: ສິນທະວົງ ນາກກາລະສິນ

ຮູບພາບ: ໜັງສືພິມເສດຖະກິດ-ສັງຄົມ

แชร์