ພິດໂຄວິດດຶງແຮງງານລາວກັບປະເທດແສນກວ່າຄົນ

ຂ່າວ: ຮສສ 

  ໃນວັນທີ 3 ມີນາ 2021, ທີ່ໂຮງແຮມເດີນິວໂຣສ, ນະຄອນຫຼວງວຽງຈັນ ໄດ້ມີກອງປະຊຸມສົນທະນາສາມຝ່າຍຮ່ວມກັບສູນບໍລິການຈັດຫາງານ ແລະບໍລິສັດຈັດຫາງານກ່ຽວກັບວຽກງານແຮງງານເຄື່ອນຍ້າຍໃນຊ່ວງການແຜ່ລະບາດຂອງພະຍາດໂຄວິດ-19 ພາຍໃຕ້ໂຄງການເຄື່ອນຍ້າຍແຮງງານແບບປອດໄພ ແລະມີຄວາມຍຸຕິທໍາ: ຄວາມເຂົ້າໃຈດ້ານສິດທິ ແລະກາລະໂອກາດຂອງແຮງງານເຄື່ອນຍ້າຍເພດຍິງໃນພາກພື້ນອາຊຽນໂດຍການເປັນປະທານຮວ່ມຂອງທ່ານ ນາງ ອານຸສອນ ຄຳສິງສະຫວັດ ຫົວໜ້າກົມພັດທະນາສີມືແຮງງານ ແລະ ຈັດຫາງານ ແລະ ທ່ານ ນາງ ເຂັມພອນ ເຜົ່າຄໍາແກ້ວ, ຜູ້ປະສານງານໂຄງການແຮງງານສາກົນປະຈໍາ ສປປ ລາວ; ຜູ້ຕາງ ໜ້າຈາກສູນກາງສະຫະພັນກຳມະບານລາວ, ສະພາການຄ້າ ແລະອຸດສາຫະກຳແຫ່ງຊາດລາວ, ສູນບໍລິການຈັດຫາງານ ແລະບໍລິສັດຈັດຫາງານເຂົ້າຮວ່ມ.

  ເພື່ອຕິດຕາມສະພາບທາງດ້ານນະໂຍບາຍຕໍ່ຜູ້ອອກແຮງງານເປັນໄລຍະ ແລະຮ່ວມກັບສູນບໍລິການຈັດຫາງານ, ບໍລິສັດຈັດຫາງານລວມທັງພະແນກແຮງງານ ແລະສະຫວັດດີການສັງຄົມແຂວງ ແລະນະຄອນຫຼວງວຽງຈັນເພື່ອຕິດຕາມ ແລະໃຫ້ການຊ່ວຍເຫຼືອຜູ້ອອກແຮງງານທີ່ເດີນທາງກັບຈາກປະເທດໄທໃນດ້ານຕ່າງໆທີ່ຈຳເປັນ.

  ກອງປະຊຸມດັ່ງກ່າວ,ທ່ານ ບຸນສວນ ໄຊຍະສິດ ຫົວໜ້າພະແນກສົ່ງເສີມການຈັດຫາງານກົມພຈງໄດ້ລາຍງານເຖິງສະພາບການແຮງງານລາວທີ່ກັບຄືນປະເທດ ແລະ ການໃຫ້ຄວາມຊວ່ຍເຫຼືອຄວາມຕ້ອງການແຮງງານ ແລະການສະໜອງເຂົ້າສູ່ຕໍາແໜ່ງງານວ່າງ; ການສ້າງຕັ້ງສະມາຄົມບໍລິສັດຈັດຫາງານ; ທິດທາງໃນຕໍ່ໜ້າທີ່ຕິດພັນກັບວຽກງານສົ່ງເສີມການຈັດຫາງານພາຍໃນ 1 ປີ (2021) ໃນຊ່ວງການແຜ່ລະບາດຂອງພະຍາດໂຄວິດ-19. ຈຳນວນແຮງງານລາວທີ່ກັບຈາກຕ່າງປະເທດ: ປະເທດໄທຈຳນວນ 147.000 ຄົນ, ປະເທດມາເລເຊຍ 456ຄົນ. ໂດຍອີງຕາມໂຕເລກຂຶ້ນທະບຽນແຕ່ເດືອນເມສາ 2020-ກຸມພາ 2021 ຈຳນວນແຮງງານລາວຍັງຄ້າງຢູ່ປະເທດໄທຈຳນວນ 115.993 ຄົນ, ໃນນີ້ແຮງງານຜ່ານການພິສູດສັນຊາດ 44.694 ຄົນ, ແຮງງານທີ່ຕົກຄ້າງ 13.182 ຄົນ, ແຮງງານຕາມ MOU ທີ່ສິ້ນສຸດສັນຍາ 4 ປີ ມີ 24.596 ຄົນ ແລະແຮງງານທີ່ຂໍຂຶ້ນທະບຽນຮອບໃໝ່ 33.521 ຄົນ; ແຮງງານລາວຢູ່ປະເທດຍີ່ປຸ່ນ 235 ຄົນ, ຢູ່ເກົາຫຼີ 320 ຄົນ ແລະ ຢູ່ປະເທດມາເລເຊຍ 1.544 ຄົນ. ກອງປະຊຸມຄັ້ງນີ້, ບັນດາຜູ້ເຂົ້າຮ່ວມ ແລະພາກສ່ວນທີ່ກ່ຽວຂ້ອງໄດ້ພ້ອມກັນປະກອບຄໍາຄິດເຫັນ, ສົນທະນາກັນ ແລະ ແລກປ່ຽນບົດຮຽນເພື່ອເຮັດໃຫ້ວຽກງານແຮງງານເຄື່ອນຍ້າຍຖືກຈັດຕັ້ງປະຕິບັດໃຫ້ສອດຄ່ອງກັບສະພາບ ແລະ ເງື່ອນໄຂປະຈຸບັນ ແລະ ຕອບສະໜອງກັບຈຸດປະສົງ ແລະລະດັບຄາດໝາຍທີ່ວາງໄວ.

แชร์