ກຽມພົບຕາດໝາໄນແຫຼ່ງທ່ອງທ່ຽວໃໝ່ທ່າແຕງ

ຂ່າວ: ສັນຍາ 

 ສະຫວັນຊັ້ນເຈັດຕາດໝາໄນຖືເປັນອີກແຫຼ່ງທ່ອງທ່ຽວທາງທໍາມະຊາດທີ່ສວຍງາມຕັ້ງຢູ່ບ້ານໂກງຕາຢູນ ເມືອງທ່າແຕງ ແຂວງເຊກອງ ຊຶ່ງໄດ້ຮັບການປັບປຸງ ແລະພັດ ທະນາມາແຕ່ເດືອນກໍລະກົດ (7) ປີ 2020 ຜ່ານມາຮອດປະຈຸບັນເຫັນວ່າມີຄວາມຄືບໜ້າຫຼາຍສົມຄວນແລ້ວ,ຄາດຈະເລີ່ມເປີດໃຫ້ບໍລິການຢ່າງເປັນທາງການແກ່ນັກທ່ອງທ່ຽວໃນອີກບໍ່ດົນ, ທັງນີ້ກໍເພື່ອດຶງດູດບັນດານັກທ່ອງທ່ຽວຈາກທົ່ວສາລະທິດເຂົ້າມາທ່ຽວຊົມພາກໃຕ້ໂດຍສະເພາະແມ່ນເມືອງທ່າແຕງແຂວງເຊກອງໃຫ້ນັບມື້ຫຼາຍຂຶ້ນ.

  ທ່ານ ນາງ ແກ້ວລາວັນ ແກ້ວລາດຊະວົງໄຊ ອໍານວຍການບໍລິສັດ ແກ້ວທະວີຊັບ ກໍ່ສ້າງຂົວທາງ, ຜູ້ພັດທະນາແຫຼ່ງທ່ອງທ່ຽວສະຫວັນຊັ້ນເຈັດນໍ້າຕົກຕາດໝາໄນໃຫ້ສໍາພາດຕໍ່ນັກຂ່າວວ່າ: ສະຫວັນຊັ້ນເຈັດນໍ້າຕົກຕາດໝາໄນຕັ້ງຢູ່ບ້ານໂກງຕາຢູນ ເມືອງທ່າແຕງ ແຂວງເຊກອງ ຫ່າງຈາກເທສະບານເມືອງປະມານ 2 ກິໂລແມັດ ໂດຍຄວາມໝາຍຂອງສະຫວັນຊັ້ນເຈັດຄື: ຊັ້ນທີໜຶ່ງ-ຊັ້ນທີສອງເປັນສະຖານທີ່ຈອດລົດສໍາລັບນັກທ່ອງທ່ຽວ, ຊັ້ນທີສາມສວນດອກໄມ້ ຫຼືສວນ 4 ທິດ, ຊັ້ນທີສີ່ແມ່ນສວນກຸຫຼາບ, ຊັ້ນທີຫ້າໜອງສະລອຍນໍ້າສໍາເດັກນ້ອຍ-ຜູ້ໃຫຍ່, ຊັ້ນທີຫົກແມ່ນຮ້ານອາຫານ-ຈຸດຊົມວິວ, ຊັ້ນທີເຈັດແມ່ນຈະມີກະຕ່າລອຍຟ້າ ແລະສະໄລເດີ້ນໍ້າ-ສະໄລເດີ້ບົກ ຫຼືເອີ້ນອີກແບບໜຶ່ງວ່າຕະລູດນໍ້າ-ຕະລູດບົກລົງຫາຊັ້ນທີຫ້າ.

  ການພັດທະນາແຫຼ່ງທ່ອງທ່ຽວສະຫວັນຊັ້ນເຈັດນໍ້າຕົກຕາດໝາໄນແມ່ນເລີ່ມລົງມືມາແຕ່ເດືອນກໍລະກົດ (7) ປີ 2020 ມາຮອດປະຈຸບັນແມ່ນມີຄວາມຄືບໜ້າຫຼາຍພໍສົມຄວນເປັນຕົ້ນແມ່ນສໍາເລັດການທະລຸເສັ້ນທາງ,ໂຮມສະເຕ (ເຮືອນພັກ), ສວນນໍ້າ, ສວນດອກໄມ້ ແລະ ເຮືອນຕົ້ນໄມ້, ຄາດຈະເລີ່ມເປີດໃຫ້ບໍລິການຢ່າງເປັນທາງ ການແກ່ນັກທ່ອງທ່ຽວໃນອີກບໍ່ດົນ ແລະຜົນສໍາເລັດທັງໝົດນັ້ນແມ່ນໄດ້ຮັບຄວາມຮ່ວມໄມ້ຮ່ວມມືຈາກທຸກຂະແໜງການຂອງລັດກໍຄືປະຊາຊົນໃນທ້ອງຖິ່ນ ແລະຢືນຢັນວ່າໂຄງການນີ້ເກີດຂຶ້ນຢ່າງແນ່ນອນແຕ່ທັງນີ້ທັງນັ້ນຈໍາເປັນຈະຕ້ອງໄດ້ຮັບການສືບຕໍ່ເອື້ອອໍານວຍຄວາມສະດວກດ້ານຕ່າງໆ ຈາກພາກສ່ວນລັດ ແລະປະຊາຊົນໃນທ້ອງ ຖິ່ນ.

 ໂອກາດວັນແມ່ຍິງສາກົນ (ວັນທີ 8 ເດືອນ 3 ປີ 2021) ຄົບຮອບ 111 ປີ, ທ່ານ ນາງ ແກ້ວລາວັນ ແກ້ວລາດຊະວົງໄຊ ໄດ້ອວຍພອນມາຍັງການນໍາພັກ ແລະລັດ, ຄະນະພັກ-ອໍານາດການປົກຄອງແຂວງເຊກອງກໍຄືເມືອງທ່າແຕງຕະຫຼອດຮອດເອື້ອຍ-ນ້ອງແມ່ຍິງໃນທົ່ວປະເທດຈົ່ງມີສຸຂະພາບເຂັ້ມແຂງ, ພາລານະໄມສົມບູນ, ພ້ອມ ກັນປົກປັກຮັກສາ ແລະສ້າງສາພັດທະນາປະເທດຊາດໃຫ້ຈະເລີນ, ຮຸ່ງເຮືອງ ແລະສີວິໄລກ້າວຂຶ້ນ.

แชร์