ທຫລ ສຳມະນາວຽກຊຳລະເງື່ອນໄຂ ແລະສິ່ງທ້າທາຍໂຄວິດ

  ໃນວັນທີ 4 ມີນາ 2021, ທະນາຄານແຫ່ງ ສປປ ລາວ (ທຫລ) ຈັດກອງປະຊຸມວິຊາການຫົວຂໍ້ “ວຽກງານລະບົບການຊຳລະໃນເງື່ອນໄຂ ແລະສິ່ງທ້າທາຍຂອງພະຍາດໂຄວິດ-19 ແລະກົນໄກການຄົ້ນຄວ້າອອກອະນຸຍາດ” ຂຶ້ນທີ່ຫ້ອງປະຊຸມຂອງຕົນພາຍໃຕ້ການເປັນປະທານຂອງທ່ານ ສຸລິສັກ ທຳນຸວົງ ຫົວໜ້າກົມຄຸ້ມຄອງລະບົບຊຳລະສະສາງ,ມີບັນດາຫົວໜ້າກົມ,ຮອງກົມຄະນະອຳນວຍການທະນາຄານທຸລະກິດ ແລະນິຕິບຸກຄົນທີ່ໃຫ້ບໍລິການຊຳລະ, ຄະນະພະແນກ ແລະພະນັກງານວິຊາການພາຍໃນ ທຫລ ເຂົ້າຮ່ວມ.

  ທ່ານ ສຸລິສັກ ທຳນຸວົງ ກ່າວວ່າ: ກອງປະຊຸມຄັ້ງນີ້ຈັດຂຶ້ນເພື່ອຊົມເຊີຍຜົນສຳເລັດຂອງກອງປະຊຸມໃຫຍ່ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ຂອງລັດ ແລະເປັນການສະເຫຼີມສະຫຼອງ“ວັນແມ່ຍິງສາກົນ” ວັນທີ 8 ມີນາ ຄົບຮອບ 111 ປີ ຊຶ່ງມີປະຫວັດການກຳເນີດຂຶ້ນຈາກປີ 1907 ແມ່ຍິງເຮັດວຽກໃນໂຮງງານຜະລິດແຜ່ນແພຊິຄາໂກສະຫະລັດອາເມລິກາບໍ່ສາມາດທົນຕໍ່ການຂົ່ມເຫັງ, ການກົດຂີ່, ການລ່ວງລະເມີດຂອງນາຍຈ້າງທີ່ໃຊ້ພວກເຂົາຄືຂ້າທາດເນື່ອງຈາກວ່າແມ່ຍິງເຫຼົ່ານີ້ເຮັດວຽກໜັກເຖິງມື້ລະ 16-17 ຊົ່ວໂມງຕໍ່ມື້ໂດຍບໍ່ມີວັນຢຸດພັກບໍ່ມີການປະກັນໄພແຮງງານແຕ່ໄດ້ຮັບຄ່າຈ້າງພຽງເລັກນ້ອຍ ແລະຖ້າຖືພາໄດ້ຖືກໄລ່ອອກ, ໃນວັນທີ 8 ມີນາ 1908 ພະນັກງານຍິງຫຼາຍກວ່າ 15.000 ຄົນໄດ້ເດີນທາງໄປທົ່ວນະຄອນນິວຢອກເພື່ອຮຽກຮ້ອງສິດຂອງຕົນຈົນມາຮອດວັນທີ 8 ມີນາ 1910, ຄວາມພະຍາຍາມຂອງແມ່ຍິງໄດ້ຮັບຜົນສໍາເລັດເມື່ອມີຜູ້ຕາງໜ້າແມ່ຍິງຈາກ 17 ບັນດາປະເທດໄດ້ເຂົ້າຮ່ວມກອງປະຊຸມສະມາຄົມສະຕີສັງຄົມນິຍົມຄັ້ງທີ 2 ຢູ່ Copenhagen ປະເທດເດນມາກໃນທີ່ປະຊຸມໄດ້ປະກາດຄວາມຕ້ອງການຂອງຜູ້ເຮັດວຽກຂອງແມ່ຍິງ 3 ດ້ານຄື: ຕ້ອງອະນຸຍາດໃຫ້ຫຼຸດເວລາເຮັດວຽກໃຫ້ເຫຼືອ 8 ຊົ່ວໂມງຕໍ່ມື້, ມີເວລາສຳລັບການສຶກສາ ຫຼືການພັດທະນາຄວາມສາມາດຂອງຕົນເອງ 8 ຊົ່ວໂມງ ແລະ 8 ຊົ່ວໂມງສໍາລັບການພັກຜ່ອນ. ພ້ອມກັນນີ້ກໍ່ໄດ້ປັບເງິນຄ່າແຮງງານຂອງແມ່ຍິງໃນລະດັບດຽວກັບແຮງງານຊາຍ ແລະຍັງຮຽກຮ້ອງໃຫ້ມີສະຫວັດດີການສໍາລັບແມ່ຍິງ ແລະແຮງງານເດັກ.

ສະນັ້ນ, ເພື່ອເປັນການຕ້ອນຮັບວັນສຳຄັນດັ່ງກ່າວກົມຄຸ້ມຄອງລະບົບຊຳລະສະສາງຈຶ່ງໄດ້ຈັດກອງປະຊຸມສຳມະນາຂຶ້ນເພື່ອເປັນເວທີໃຫ້ເອື້ອຍນ້ອງຍິງທີ່ລົງເລິກເຮັດວຽກຕົວຈິງກ່ຽວກັບວຽກງານການຄົ້ນຄວ້າອອກອະນຸຍາດກ່ຽວກັບລະບົບການຊຳລະໃນເງື່ອນໄຂ ແລະສິ່ງທ້າທາຍຂອງການແຜ່ລະບາດຂອງພະຍາດ Covid-19 ໄດ້ສະ ແດງຄວາມຮູ້ຄວາມສາມາດທີ່ຍາມໃດແມ່ຍິງລາວເຮົາກໍ່ມີຄວາມເທົ່າທຽມ ແລະສະເໝີພາບກັບເພດຊາຍ, ນອກຈາກນີ້ເອື້ອຍນ້ອງຍິງກໍ່ຖືວ່າເປັນກຳລັງແຮງຕົ້ນຕໍທີ່ເຮັດວຽກຄຽງບ່າຄຽງໄຫຼ່ກັບເພດຊາຍໃນການຄົ້ນຄວ້າສ້າງ ແລະ ພັດທະນາການຄຸ້ມຄອງລະບົບການຊຳລະທັງ 3 ດ້ານຄື: ດ້ານນິຕິກຳ ແລະ ລະບຽບການ, ການຄຸ້ມຄອງຕິດຕາມ-ກວດກາ ແລະການພັດທະນາລະບົບການຊຳລະນັບແຕ່ມື້ສ້າງຕັ້ງກົມເປັນຕົ້ນມາ.

  ພ້ອມດຽວກັນນີ້, ຍັງເປັນການສ້າງຄວາມເຂົ້າໃຈກ່ຽວກັບວຽກງານຄົ້ນຄວ້າອອກອະນຸຍາດລະບົບການຊຳລະໃຫ້ແກ່ພະນັກງານທີ່ກົມຄຸ້ມຄອງລະບົບຊຳລະສະສາງຫາກໍ່ໄດ້ຮັບການບັນຈຸໃນໄລຍະປີ 2020 ແລະ ພາກສ່ວນກ່ຽວຂ້ອງໄດ້ມີຄວາມເຂົ້າໃຈຢ່າງເລິກເຊິ່ງຕໍ່ວຽກງານດັ່ງກ່າວເນື່ອງຈາກຜ່ານການຈັດຕັ້ງປະຕິບັດຕົວຈິງໃຈໄລຍະຜ່ານມາເຫັນວ່າຫຼາຍພາກສ່ວນໂດຍສະເພາະແມ່ນຜູ້ໃຫ້ບໍລິການ ຫຼືຜູ້ທີ່ມີຈຸດປະສົງໃຫ້ບໍລິການການຊຳລະຍັງບໍ່ທັນເຂົ້າໃຈຢ່າງເລິກເຊິ່ງຕໍ່ຂະບວນການ, ກົນໄກ, ການກະກຽມເອກະສານ ແລະການຄົ້ນຄວ້າອອກອະນຸຍາດກ່ຽວກັບລະບົບການຊຳລະ.

แชร์