ສສງ ຫົວແຊຈະເລີນຈະສ້າງເງື່ອນໄຂສະດວກແກ່ສະມາຊິກເຂົ້າເຖີງແຫຼ່ງທຶນ

  ສະຫະກອນສິນເຊື່ອ ແລະເງິນຝາກປະຢັດຫົວແຊຈະເລີນ ແຂວງຈໍາປາສັກ ເປີດເຜີຍຂ່າວດີເຖິງລູກຄ້າຜູ້ທີ່ຕ້ອງການຝາກ ແລະກູ້ຢຶມເພື່ອໄປປະກອບກິດຈະການຂະ ໜາດນ້ອຍຫາກາງປີນີ້ຈະເປີດເງື່ອນໄຂທີ່ອໍານວຍຄວາມສະດວກວ່ອງໄວ ແລະສາມາດເຂົ້າເຖິງແຫຼ່ງທຶນໄດ້ງ່າຍຂຶ້ນພິເສດຈະຫຼຸດອັດຕາດອກເບ້ຍເງິນກູ້ພ້ອມຂະຫຍາຍໜ່ວຍບໍລິການໃຫ້ກວ້າງຂວາງອອກກວ່າເກົ່າເພື່ອຫວັງເຮັດໃຫ້ສະຫະກອນມີບົດບາດຍິ່ງຂຶ້ນໃນສັງຄົມ.

 ຖືວ່າເປັນຂ່າວດີຫຼາຍສໍາລັບພໍ່ແມ່ປະຊາຊົນຊາວແຂວງຈໍາປາສັກໂດຍສະເພາະແມ່ນຊາວກະສີກໍາປູກຝັງ ແລະລ້ຽງສັດເພື່ອເຮັດທຸລະກິດຄອບຄົວຂະໜາດນ້ອຍຫາກາງ, ເນື່ອງຈາກວ່າຜ່ານມາອາດມີຄວາມຫຍຸ້ງຍາກໃນການເຂົ້າເຖິງແຫຼ່ງທຶນເງິນກູ້ໂດຍທີ່ເງື່ອນໄຂບໍ່ສະດວກເຮັດໃຫ້ຫຼາຍຄົນອາດມີຄວາມຜິດຫວັງບໍ່ໜ້ອຍສະຫະກອນສິນເຊື່ອ ແລະເງິນຝາກປະຢັດ (ສສງ ຫົວແຊຈະເລີນ) ໄດ້ສານຕໍ່ທິດທາງ ແລະນະໂຍບາຍຂອງລັດຖະບານໃນການລົບລ້າງຄວາມທຸກຍາກຂອງປະຊາຊົນ, ໂດຍການຫັນທິດທາງນໍາແຫຼ່ງທຶນລົງສູ່ຮາກຖານເຂດຫ່າງໄກສອກຫຼີກ, ບ້ານ ແລະເມືອງທີ່ມີອັດຕາຄວາມທຸກຍາກສູງ, ເຂດທີ່ມີຄວາມອຸດົມສົມບູນທາງທໍາມະຊາດແຕ່ຂາດດ້ານປັດ ໃຈທີ່ຈະເອື້ອອຳນາຍສ້າງໃຫ້ຄວາມປາດຖະໜາຂອງປະຊາຊົນເປັນຈິງຄືການສາມາດຜະລິດສິນຄ້າທີ່ເປັນແຮງສ້າງລາຍຮັບທີ່ດີໃຫ້ກັບເຂົາເຈົ້າໃນຍົກການພັດທະນາປະ ເທດ.

 ທ່ານ ໄຊຍະ ທໍາມະວົງແສງ ຜູ້ອໍານວຍການສະຫະກອນສິນເຊື່ອ ແລະເງິນຝາກປະຢັດຫົວແຊຈະເລີນ ແຂວງຈໍາປາສັກ, ໄດ້ເປີດເຜີຍຕໍ່ນັກຂ່າວໜັງສືພິມເສດຖະກິດ-ສັງຄົມ ເມື່ອບໍ່ດົນມານີ້ໃຫ້ຮູ້ວ່າ: ເພື່ອເຮັດໃຫ້ການບໍລິຫານຈັດການຂອງສະຫະກອນມີປະສິດທິພາບ ແລະປະສິດທິຜົນຫຼາຍຂຶ້ນໃນສົກປີ 2021 ນີ້ທາງສະພາບໍລິຫານໄດ້ອະນຸມັດຂະຫຍາຍໜ່ວຍບໍລິການຢູ່ເມືອງປະທຸມພອນເພື່ອອໍານວຍຄວາມສະດວກໃຫ້ລູກຄ້າ ແລະພວກເຮົາກໍ່ຍັງໄດ່ເນັ້ນໜັກການບໍລິການເຖິງທີ່ຄືໃຫ້ພະນັກງານລົງໃຫ້ບໍລິການເຖິງບ້ານເຖິງເຮືອນເພື່ອປ່ອຍເງິນກູ້ໃຫ້ແກ່ສະມາຊິກ, ຮັບເງິນຝາກ ແລະລົງເກັບດອກເບ້ຍ, ຊຶ່ງສ່ວນໃຫຍ່ແມ່ນຈະເນັ້ນໃສ່ຊາວສວນທີ່ເຮັດກະສີກໍາເປັນຫຼັກເຊັ່ນ: ເຮັດນາ,ເຮັດສວນມັນຕົ້ນ,ກາເຟ ແລະພືດຜັກຕາມທ່າແຮງຂອງແຕ່ລະທ້ອງຖິ່ນ,ໃນນີ້ພວກເຮົາຈະຫຼຸດນະໂຍບາຍດ້ວຍການຫຼຸດອັດຕາດອກເບ້ຍເງິນກູ້ລົງ, ຫຼຸດຂັ້ນຕອນຄວາມຫຍຸ້ງຍາກໃນການເຂົ້າເຖິງແຫຼ່ງທຶນງ່າຍຂຶ້ນ.

  ທ່ານຜູ້ອໍານວຍການໃຫ້ຮູ້ຕື່ມວ່າ: ປະຈຸບັນພວກເຮົາມີທ່າແຮງສະສົມທາງດ້ານສະມາຊິກ ແລະທຶນຮອນມີສູງ, ບຸກຄະລາກອນມີຄວາມພ້ອມທາງດ້ານຄວາມຮູ້ຄວາມສາມາດ ແລະກໍາລັງມີແຜນຂະຫຍາຍໜ່ວຍບໍລິການອີກແຫ່ງໃນໄວ້ໆນີ້ໃນເມືອງໃກ້ຄຽງ,ຊຶ່ງຄາດວ່າໝົດປີສະມາຊິກຈະເພີ່ມຂຶ້ນຈາກ 3 ພັນຄົນ ເປັນ 4 ພັນຄົນ ແລະທຸລະກິດກໍ່ຈະຂະຫຍາຍຕົວໃນລະດັບ 25-30% ແລະມີຄວາມໝັ້ນໃຈທຸລະກິດຈະມີຜົນກໍາໄລຢ່າງຕໍ່າ 2 ຕື້ກວ່າກີບໃນປີ 2021.

ໂດຍ: ໂພທິລາດ

แชร์