ສູນສາທິດ ແລະບໍລິການເຕັກນິກກະສິກຳຮ່ວມມືລາວ-ຈີນ ເນັ້ນຜະລິດແນວພັນພຶດ-ສັດຄຸນນະພາບ

>> ຂ່າວ: ແສງອາທິດ:

  ສູນສາທິດ ແລະບໍລິການ ເຕັກນິກກະສິກຳຮ່ວມມືລາວ-ຈີນ ໄດ້ດຳເນີນການກໍ່ສ້າງເລີ່ມແຕ່ເດືອນທັນວາ 2009 ແລະມີມູນຄ່າການກໍ່ສ້າງທັງໝົດ 41,9 ລ້ານຢວນ ຫຼືປະມານ 6,3 ລ້ານໂດລາສະຫະລັດ ໄດ້ເປີດນໍາໃຊ້ເປັນທາງການແຕ່ວັນທີ 14 ສິງຫາ 2013 ສູນແມ່ນຊຶ່ງເອີ້ນໄດ້ວ່າແມ່ນສັນຍາລັກການຮ່ວມມືລາວ-ຈີນແມ່ນ ຂອງຂວັນອັນລໍ້າຄ່າຂອງອະດີດສະຫາຍປະທານປະເທດ ສປ ຈີນ ມອບໃຫ້ປະທານປະເທດ ສປປ ລາວ ເຮົາ, ທີ່ມີເປົ້າໝາຍແນໃສ່ຍົກສູງສາຍພົວພັນຮ່ວມມືກັບປະເທດຄູ່ຮ່ວມຊະຕາກໍາສອງຊາດລາວ-ຈີນ ເເລະຜັນຂະຫຍາຍຍຸດທະສາດະສິກໍາຮອດປີ 2025 ແລະວິໄສທັດຮອດປີ 2010 ໂດຍສະເພາະການພັດທະນາການປູກຝັງ ແລະລ້ຽງສັດເພື່ອເປັນສິນຄ້າ, ຢູ່ໃນ10 ແຂວງພາກເໜືອ ແລະພາກກາງທີ່ສູນມີພາລະບົດບາດໃນການລົງຊຸກຍູ້ສົ່ງເສີມໃຫ້ປາກົດຜົນເປັນຈິງ.

  ທ່ານ ພັນທະວົງ ວົງສຳພັນ ຫົວໜ້າສູນສາທິດ ແລະບໍລິການເຕັກນິກກະສິກຳຮ່ວມມືລາວ-ຈີນ ໄດ້ລາຍງານໃຫ້ຮູ້ວ່າ: ສູນດັ່ງກ່າວແມ່ນມີເນື້ອທີ່ກ້ວາງຂວາງມີໂຄງ ລ່າງພື້ນຖານ, ພາຫະນະ ແລະເຄື່ອງມືອຸປະກອນທີ່ຮັບໃຊ້ການຜະລິດຈໍານວນໜຶ່ງ, ນອກຈາກນີ້ຍັງມີຫ້ອງປະຊຸມສຳລັບການຈັດສຳມະນາ, ຝຶກອົບຮົມ, ມີຫໍພັກນັກສໍາມະນາກອນ ແລະສະຖານທີ່ລົງຝຶກຫັດໂຕຈິງຕື່ມອີກ.

  ການພັດທະນາສູນໃນໄລຍະຜ່ານມາແມ່ນພົບບັນຫາຫຼາຍດ້ານທີ່ເປັນສີ່ງທ້າທາຍ ແລະ ເປັນສີ່ງທີ່ຄະນະນຳຂອງສູນຈະຕ້ອງໄດ້ສຸມໃສ່ແກ້ໄຂໂດຍສະເພາະແມ່ນບັນຫາທີ່ທົ່ວໂລກພວມປະເຊີນໜ້າຢູ່ນັ້ນກໍ່ຄືພະຍາດໂຄວິດ-19 ທີ່ເຮັດໃຫ້ວຽກງານການຮ່ວມມືກັບ ສປ ຈີນ ຖືກຜົນກະທົບການເດີນທາງເຂົ້າມາເຮັດວຽກຂອງຊ່ຽວຊານຈີນ ແລະນຳເຂົ້າເຄື່ອງມືອຸປະກອນຖືກຢຸດຊະງັກໄປແຕ່ຢ່າງໃດກໍ່ຕາມໃນໄລຍະ 1 ປີ2020 ຜ່ານມາພາຍໃຕ້ການຊີ້ນຳ-ນຳພາຢ່າງໃກ້ຊິດຮອບດ້ານຂອງການນຳກະຊວງ, ກົມປູກຝັງ ແລະການສະໜັບສະໜູນອູ້ມຊູຂອງການນໍາແຂວງ, ຂອງພະແນກກະສິກຳ ແລະປ່າໄມ້ແຂວງອຸດົມໄຊໄດ້ເຮັດໃຫ້ຄະນະສູນ ແລະພະນັກງານວິຊາການສູ້ຊົນຕັ້ງໜ້າ ແລະຍາດແຍ່ງໄດ້ 4 ວຽກຈຸດສຸມພັດທະນາທີ່ໄດ້ຮັບມອບໝາຍຈາກຂັ້ນເທິງ.

  ວຽກງານຜະລິດແລະຂະຫຍາຍແນວພັນພືດ-ແນວພັນສັດທີ່ດີມີຄຸນນະພາບຕິດພັນກັບຄວາມຕ້ອງການຂອງຕະຫຼາດເພື່ອສະໜອງໃຫ້ແກ່ຊາວກະສິກອນ, ການພັດ ທະນາ ແລະ ບໍລິການເຕັກນິກການຜະລິດກະສິກຳສ້າງສູນເປັນບ່ອນຮຽນຮູ້ດ້ານເຕັກນິກວິຊາການໃໝ່ທີ່ຢຶດຖືການຜະລິດໄປຕາມມາດຕະຖານການກະສິກຳສະອາດ ແລະກະສິກຳທີ່ດີ ແລະມາດຖານຟາມລ້ຽງສັດທີ່ດີເປັນສິນຄ້າ, ສ້າງ ແລະຂະຫຍາຍຕາໜ່າງການປູກ-ການລ້ຽງແບບຜູກພັນສອງສົ້ນກັບຊາວກະສິກອນ ແລະ ຜູ້ປະ ກອບການເພື່ອແນໃສ່ການຫຼຸດຜ່ອນຕົ້ນທຶນເພີ່ມມູນຄ່າການຜະລິດຕາມທິດທີ່ລັດຖະບານວາງອອກ ແລະ ຕອບສະໜອງການຈັດຝຶກອົບຮົມ, ທັດສະນະສຶກສາ ແລະເອື້ອອໍານວຍຄວາມສະດວກໃນການຈັດກອງປະຊຸມສຳມະນາດ້ານວິຊາການໃຫ້ແກ່ພາຍນອກ.

  ນອກຈາກ, ການສົ່ງເສີມການຜະລິດແນວພັນ ແລະບໍລິການດ້ານເຕັກນິກແລ້ວທາງສູນຍັງໄດ້ເນັ້ນໃນການສ້າງບຸກຄະລາກອນໂດຍສະເພາະແມ່ນການຮັບເອົານັກສຶກ ສາມາຝຶກງານເພື່ອຮຽນຮູ້ທິດສະດີພ້ອມທັງປະຕິບັດຕົວຈິງໄປພ້ອມເຊັ່ນ: ຈາກໂຮງຮຽນເຕັກນິກວິຊາຊີບແບບປະສົມແຂວງອຸດົມໄຊ, ແຂວງຫຼວງນໍ້າທາ ແລະໂຮງຮຽນ ວິທະຍາໄລກະສິກໍາ ແລະປ່າໄມ້ພາກເໜືອແຂວງຫຼວງພະບາງ, ນອກນີ້ກໍ່ຍັງໄດ້ຮ່ວມມືກັບໂຮງຮຽນວິຊາຊີບແຂວງອຸດົມໄຊໃນວຽກງານການສ້າງຄວາມເຂັ້ມແຂງໃຫ້ແກ່ນັກຮຽນ-ນັກສຶກສາ ໂດຍການຖືເອົາແຜນກິດຈະກຳການປູກ-ການລ້ຽງ ພາຍໃນສູນໃນ ແຕ່ລະເດືອນເປັນບ່ອນອີງເພື່ອໃຫ້ນັກສຶກສາພາກວິຊາປູກຝັງ ແລະລ້ຽງສັດລົງ ມາຈັດຕັ້ງປະຕິບັດໂຕຈິງເພື່ອເປັນການເພີ່ມທັກສະ ແລະຄວາມຊໍານານງານໃຫ້ແກ່ເຂົາເຈົ້າ.

   ການຈັດຕັ້ງປະຕິບັດວຽກງານຂອງສູນໃນໄລຍະຜ່ານມາແມ່ນມີຜົນສຳເລັດຫຼາຍດ້ານມີການພັດທະນາທີ່ດີຂຶ້ນ, ສາມາດເຮັດໃຫ້ສູນຫັນປ່ຽນເປັນບາດລ້ຽວໃໝ່ ແລະ ມີປັດໄຈໃໝ່ທີ່ຍອມຮັບຂອງຮາກຖານການຜະລິດໃນບັນດາແຂວງ, ເປັນທີ່ຍອມຮັບຂອງການນຳຂັ້ນຕ່າງໆໂດຍສະເພາະແມ່ນການນຳແຂວງອຸດົມໄຊມາຮອດປະຈຸບັນມີບັນດາໂຄງການບັນດາກົມກອງອ້ອມຂ້າງກະຊວງອົງການປົກຄອງທ້ອງຖິ່ນຕະຫຼອດຮອດຜູ້ປະກອບການໄດ້ຫັນໜ້າເຂົ້າມາຮ່ວມມືກັບສູນນັບມື້ນັບຫຼາຍຂຶ້ນ.

   ແລະເພື່ອໃຫ້ວຽກງານພາຍໃນສູນໄດ້ມີການພັດທະນາໃນຕໍ່ໜ້າຄະນະສູນແມ່ນໄດ້ຖືເອົາວຽກງານການສືກສາອົບຮົມການເມືອງແນວຄິດ, ສ້າງຄວາມເປັນແບບຢ່າງໃນການຊີ້ນໍາ-ນໍາພາ, ມີແບບແຜນວິທີເຮັດວຽກຕາມຫຼັກການລວມສູນປະຊາທິປະໄຕ, ຄົ້ນຄວ້າເຊື່ອມຊຶມແນວທາງນະໂຍບາຍ ແລະ ທິດທາງແຜນພັດທະນາສູນທີ່ຂັ້ນເທິງວາງອອກຢ່າງເລີກເຊິ່ງເຖິງຖອງແມ່ນສິ່ງຈຳເປັນ ແລະເປັນປັດໄຈຕັດສິນຜົນສຳເລັດໄປຕາມເປົ້າໝາຍທີ່ວາງໄວ້, ມາຮອດປະຈຸບັນສູນດັ່ງກ່າວມີຮ້ານຄ້າຈຳໜ່າຍຜົນຜະລິດທີ່ຜະລິດໄດ້ຈາກສູນໂດຍສະເພາະແມ່ນ ຜັກ, ປາ, ເປັດ, ໄກ່, ໄຂ່ໄກ່, ແລະພືດຊະນິດອື່ນໆ ຕາມລະດູການເພື່ອມາວາງຈຳໜ່າຍໃຫ້ແກ່ພໍ່ແມ່ນປະຊາຊົນໄດ້ບໍລິ ໂພກຢ່າງທົ່ວເຖິງ.

 

แชร์