8 ແຂວງພາກເໜືອຫາລື ເພື່ອຊຸກຍູ້ສົ່ງເສີມທຸລະກິດຂະໜາດນ້ອຍ ແລະກາງ

  ວັນທີ 1 ມີນາ 2019 ນີ້ທີ່ນະຄອນຫຼວງພະບາງສະພາການຄ້າ ແລະ ອຸດສາຫະກຳແຫ່ງຊາດລາວໄດ້ຈັດກອງປະຊຸມປຶກສາຫາລືເພື່ອຊຸກຍູ້ສົ່ງເສີມຫົວໜ່ວຍທຸລະກິດຂະໜາດນ້ອຍ ແລະ ກາງ 8 ແຂວງພາກເໜືອໂດຍການເປັນປະທານຂອງ ທ່ານ ອຸເດດ ສຸວັນນະວົງ ປະທານສະພາການຄ້າ ແລະອຸດສາຫະກຳແຫ່ງ ຊາດລາວ, ມີປະທານ-ຮອງ ປະທານສະພາການຄ້າ ແລະອຸດສາຫະກຳ ແຂວງໄຊຍະບູລີ, ຫຼວງພະບາງ, ອຸດົມໄຊ, ຫຼວງນໍ້າທາ, ບໍ່ແກ້ວ, ຫົວພັນ, ຊຽງຂວາງ, ຜົ້ງສາລີ ພ້ອມດ້ວຍຫົວໜ່ວຍທຸລະກິດພາຍໃນ ແຂວງຫຼວງພະບາງເຂົ້າຮ່ວມ.

  ກອງປະຊຸມຄັ້ງນີ້ບັນດາແຂວງໄດ້ລາຍງານສະພາບການຈັດຕັ້ງເຄື່ອນໄຫວວຽກງານຂອງສະພາການຄ້າ ແລະ ອຸດສາຫະກຳໃຫ້ກັນໄດ້ຮັບຮູ້ເຖິງຜົນງານດ້ານດີ, ດ້ານອ່ອນ ແລະ ຂໍ້ຄົງຄ້າງທີ່ຈະຕ້ອງໄດ້ປຶກສາຫາລືຮ່ວມມືກັນແກ້ໄຂໃນອານະຄົດໂດຍສະເພາະສາເຫດທີ່ເຮັດໃຫ້ການຫຼຸດລົງຂອງຫົວໜ່ວຍທຸລະກິດຂະ ໜາດນ້ອຍ ແລະກາງ. ການແກ້ໄຂບັນຫາປາກົດການຫຍໍ້ທໍ້, ສິ່ງອັດຕັນ, ຜົນກະທົບຕໍ່ການພັດທະນາ ແລະ ຂະຫຍາຍຕົວຂອງຫົວໜ່ວຍທຸລະກິດຢູ່ໃນລາວ ກໍ່ຄື 8 ແຂວງພາກເໜືອ. ເພື່ອພ້ອມກັນສືບຕໍ່ເພີ່ມທະວີໃນການຮ່ວມມືເພື່ອຊອກຫາທາງອອກ ແລະ ວາງມາດຕະການແກ້ໄຂແນໃສ່ສ້າງທຸກເງື່ອນໄຂເຮັດໃຫ້ການເຕີບໂຕຂອງຫົວໜ່ວຍທຸລະກິດຂະໜາດນ້ອຍ ແລະ ກາງນັບມື້ມີຄວາມເຂັ້ມແຂງປະກອບສ່ວນຢ່າງຕັ້ງໜ້າເຂົ້າໃນການພັດທະນາເສດຖະກິດແຫ່ງ ຊາດ.

  ຕອນທ້າຍ ທ່ານ ອຸເດດ ສຸວັນນະວົງ ປະທານສະພາການຄ້າ ແລະອຸດສາຫະກຳແຫ່ງຊາດລາວໄດ້ມີຄໍາເຫັນຊີ້ນໍາໂດຍເນັ້ນໃຫ້ແຕ່ລະແຂວງສືບຕໍ່ເອົາໃຈໃສ່ຊຸກຍູ້ສົ່ງເສີມ ແລະການພັດທະນາວຽກງານສະພາການຄ້າ ແລະອຸດສາຫະກຳຂອງແຕ່ລະແຂວງໃຫ້ມີຄວາມເຂັ້ມແຂງ, ເປັນເຈົ້າການສ້າງສະມາຄົມ-ກຸ່ມທຸລະ ກິດ, ສ້າງສະມາຊິກໃຫ້ຫຼາຍຕິດພັນກັບການປັບປຸງນິຕິກໍາເພື່ອຍົກສູງພາລະບົດບາດໃນການຊີ້ນຳນຳພາວຽກງານດັ່ງກ່າວຂອງແຕ່ລະແຂວງໃຫ້ມີການເຕີບໃຫຍ່ຂະຫຍາຍ ແລະເຂັ້ມແຂງຂຶ້ນເປັນກ້າວໆ.

ຂ່າວ: ເພັດສາຄອນ-ນສພ ເສດຖະກິດ-ສັງຄົມ

• 05/03/2019