ມຈ ສຳເລັດປະຊຸມວິຊາການໄຟຟ້າ

  ສໍາເລັດໄປດ້ວຍໝາກຜົນທີ່ຈົບງາມສໍາລັບການຈັດກອງປະຊຸມວິຊາການກ່ຽວກັບການພັດທະນາ ແລະການແກ້ໄຂບັນຫາດ້ານພະລັງງານໄຟຟ້າຂອງມະຫາວິທະຍາໄລຈໍາປາສັກຫຼັງທີ່ມີການດໍາເນີນມາເປັນເວລາ 2 ວັນໂດຍມີເປົ້າໝາຍເພື່ອສ້າງໂອກາດໃຫ້ແຕ່ລະພາກສ່ວນທີ່ກ່ຽວພັນໄດ້ສະເໜີຮູບແບບການພັດທະນາ ແລະບັນຫາດ້ານລະບົບໄຟຟ້າໃຫ້ສາມາດກໍານົດໄປເປັນອັນລວມ ແລະ ເພື່ອເປັນເວທີທີ່ລິເລີ່ມໃນການລະດົມແນວຄວາມຄິດຂອງບັນດານັກຊ່ຽວຊານນັກວິໄຈຄູ-ອາຈານ ແລະ ນັກຮຽນຮູ້ ປັນຍາຊົນມີສ່ວນຮ່ວມເຂົ້າໃນການວາງແຜນ.

  ທ່ານ ບຸນມີ ພອນສະຫວັນ ອະທິການບໍດີມະຫາວິທະຍາໄລຈໍາປາສັກໄດ້ກ່າວວ່າ: ມະຫາວິທະຍາໄລຈໍາປາສັກຍຶດໝັ້ນໃນແນວທາງນະໂຍບາຍຂອງພັກ ແລະລັດຖະ ບານ, ແນໃສ່ສ້າງບຸກຄະລາກອນໃຫ້ເປັນພົນລະເມືອງດີຂອງຊາດເປັນເຈົ້າຕົນເອງປະກອບດ້ວຍຄວາມຮູ້, ຄວາມສາມາດດ້ານວິຊາສະເພາະກຽມພ້ອມປະກອບສ່ວນພັດທະນາສັງຄົມດ້ວຍກໍາລັງແຮງແຫ່ງຄວາມສາມັກຄີເປັນນໍ້າໜຶ່ງໃຈດຽວຂອງພະນັກງານ-ຄູ-ອາຈານ ແລະ ນັກສຶກສາ, ໂດຍສົມທົບກັບການຮ່ວມມື ແລະ ສະໜັບ ສະໜູນຈາກສັງຄົມທັງພາຍໃນ ແລະຕ່າງປະເທດ,ພວກຂ້າພະເຈົ້າຈະສູ້ຊົນພັດທະນາມະຫາວິທະຍາໄລຈໍາປາສັກໃຫ້ກາຍເປັນສູນກາງການສຶກສາຢູ່ພາກໃຕ້ ສປປ ລາວ, ອະນຸພາກພື້ນ ແລະສາກົນ.

   ທ່ານກ່າວຕື່ມວ່າ: ເສດຖະກິດດ້ານພະລັງງານໄຟຟ້າແມ່ນໜຶ່ງໃນເປົ້າໝາຍໜຶ່ງຂອງວຽກຈຸດສຸມຂອງແຜນພັດທະນາເສດຖະກິດ-ສັງຄົມ ແຫ່ງຊາດ ຄັ້ງທີ VIII (2016-2020 ) ໂດຍມີທິດທາງສຸມໃສ່ພັດທະນາການຜະລິດກໍາລັງໄຟຟ້າຈາກພະລັງງານແບບຢືນຍົງເຊັ່ນ: ໄຟຟ້າພະລັງງານນໍ້າ, ແສງອາທິດ ແລະ ພະລັງງານຈາກພືດອຸດສາຫະກໍາ (ໄບໂອລິເຊວ) ເພື່ອກາຍເປັນຂະແໜງການທີ່ສ້າງລາຍຮັບທີ່ມີຄວາມຍືນຍົງ, ຊຸກຍູ້ການຜະລິກ ແລະການແກ້ໄຂຄວາມຫຍຸ້ງຍາກຂອງປະຊາຊົນ, ດັ່ງນັ້ນມະຫາວິທະຍາໄລຈິ່ງເຫັນຄວາມສໍາຄັນກ່ຽວກັບບັນຫາດັ່ງກ່າວຈິ່ງມີຈຸດປະສົ່ງເປີດກອງປະຊຸມຄັ້ງນີ້ຂຶ້ນເພື່ອສ້າງໂອກາດໃຫ້ທຸກພາກສ່ວນມີສ່ວນຮ່ວມໃນການພັດ ທະນາ ແລະແກ້ໄຂຮ່ວມກັນ.

  ກອງປະຊຸມດັ່ງກ່າວໄດ້ຈັດຂຶ້ນໃນວັນທີ 1 ມີນາຜ່ານມານີ້ທີ່ໂຮງແຮມຈໍາປ່າສັກແກຣນ ນະຄອນປາກເຊ ແຂວງຈໍາປາສັກ, ໂດຍການເປັນປະທານຂອງທ່ານ ປອ. ບຸນມີ ພອນສະຫວັນ ອະທິການບໍດີມະຫາວິທະຍາໄລຈໍາປາສັກ,ມີການນໍາຂັ້ນສູງຈາກສູງການ,ຂັ້ນແຂວງ,ບັນດານັກຊ່ຽວຊານຈາກຕ່າງປະເທດ ແລະບັນດາທ່ານທີ່ກ່ຽວຂ້ອງ, ນັກຮຽນ, ນັກສຶກສາ ແລະຄູ-ອາຈານເຂົ້າຮ່ວມເປັນຈໍານວນຫຼາຍ.

ຂ່າວ: ໂພທິລາດ 

แชร์