ເຊັນບົດບັນທຶກສ້າງຄວາມເຂັ້ມແຂງໃຫ້ບຸກຄະລາກອນ

  ພິທີເຊັນບົດບັນທຶກຄວາມເຂົ້າໃຈ (MOU) ວ່າດ້ວຍການຮ່ວມມືເພື່ອສ້າງຄວາມເຂັ້ມແຂງໃຫ້ແກ່ບຸກຄະລາກອນໂດຍການນຳໃຊ້ອຸປະກອນທີ່ທັນສະໄໝເຂົ້າໃນການສຳ ຫຼວດ ແລະເກັບກຳຂໍ້ມູນຮັບໃຊ້ວຽກງານມໍລະດົກລະຫວ່າງພະແນກ ຖວທ ແຂວງສະຫວັນນະເຂດ ກັບບໍລິສັດ ຢູນິກເທັກ ຈຳກັດ ໄດຈັດຂຶ້ນໃນວັນທີ 23 ກຸມພາ ຜ່ານມາທີ່ແຂວງສະຫວັນນະເຂດໃຫ້ກຽດລົງນາມໃນບົດບັນທຶກຄວາມເຂົ້າໃຈສະບັບນີ້ໂດຍມີ ທ່ານ ມົງກຸດເພັດ ວົງພະຈັນ ຮອງຫົວໜ້າພະແນກ ຖວທ ແຂວງສະຫວັນນະເຂດ, ທ່ານ ບຸນເລີງ ອິນທິຈັກ ຮອງຫົວໜ້າຂະແໜງວັດທະນະທຳແຂວງ,ທ່ານ ຈັນທະວົງ ສຸດທິທຳ ອຳນວຍການບໍລິສັດຢູນິກເທັກ ແລະທ່ານ ນາງ ບຸດຕາວັນ ສຸວັນທອງ ຫົວໜ້າຝ່າຍເຕັກນິກບໍລິສັດຢູ່ນິກເທັກຈຳກັດໂດຍການເຂົ້າຮ່ວມຂອງບັນດາທ່ານຈາກພາກສ່ວນທີ່ກ່ຽວ ຂ້ອງ ແລະບັນດາຫົວໜ້າຫ້ອງການ ຖວທ ເມືອງຕ່າງໆກໍ່ໄດ້ເຂົ້າຮ່ວມ.

 ຈຸດປະສົງຂອງການເຊັນບົດບັນທຶກໃນຄັ້ງນີ້ກໍ່ເພື່ອສ້າງຄວາມເຂັ້ມແຂງໃຫ້ແກ່ບຸກຄະລາກອນຂອງກົມມໍລະດົກແລະກົມວິຊາການທີ່ກ່ຽວຂ້ອງໃນຂະແໜງຖະແຫຼງ,ຂ່າວວັດທະນະທຳ ແລະທ່ອງທ່ຽວໃນການນຳໃຊ້ອຸປະກອນທີ່ທັນສະໄໝ (ທາງບົກ, ທາງນໍ້າ, ທາງອາກາດ,ທາງໜ້າດິນ ແລະໃຕ້ດິນ) ເຂົ້າໃນການສຳຫຼວດ, ເກັບກຳຂໍ້ມູນ ແລະຄົ້ນຄວ້າວິໄຈພ້ອມທັງຂົນຂວາຍແຫຼ່ງທຶນໃດໜຶ່ງເຂົ້າໃນການຈັດຕັ້ງປະຕິບັດໂຄງການສຶກສາ-ສຳຫຼວດ ແລະເກັບກຳຂໍ້ມູນກ່ຽວກັບມໍລະດົກທາງດ້ານວັດທະນະທຳ, ປະຫວັດສາດ ແລະ ທຳມະຊາດ, ໃນນີ້ບໍລິສັດຢູນິກເທັກຈຳກັດຈະເປັນຜູ້ສະໜອງໃນການນຳໃຊ້ອຸປະກອນທີ່ທັນສະໄໝເຂົ້າໃນການຈັດຕັ້ງຝຶກອົບຮົມໃຫ້ແກ່ບຸກຄະລາກອນພະແນກ ຖວທ ແຂວງເຊັ່ນ: GNSS CHC Rtk, Drone, UAV, UDV, Cors, Lidar, Laser,  Scanner, GPR, ArcGIS ແລະ ອຸປະ ກອນອື່ນໆ.

ໂດຍ: ຂ່າວສະຫວັນ

แชร์