ຊານໄຊ ສະຫຼຸບວຽກງານການເງິນປີ 2020

ໂດຍ: ວຽງໄລມອນ

  ວັນທີ 26 ກຸມພາ 2021 ນີ້ ເມືອງຊານໄຊ ແຂວງອັດຕະປື ໄດ້ຈັດກອງປະຊຸມສະຫຼຸບວຽກງານການເງິນປະຈໍາປີ 2020 ແລະວາງທິດທາງປີ 20201 ຂຶ້ນທີ່ຫໍປະຊຸມໃຫ່ຍຂອງເມືອງໂດຍໃຫ້ກຽດເຂົ້າຮ່ວມຂອງທ່ານ ສຸວັນສີ ແກ້ວວິເສີດ ເຈົ້າເມືອງຊານໄຊ,ທ່ານນາງ ໃຍຄຳ ສີຊານົນ ຮອງຫົວໜ້າພະແນກການເງິນແຂວງອັດຕະປື, ມີຫ້ອງການອ້ອມຂ້າງເມືອງ, ນາຍບ້ານ ແລະພາກສ່ວນກ່ຽວຂ້ອງເຂົ້າຮ່ວມ.

  ທ່ານ ສົມພົງ ແຫວນວົງສົດ ຫົວໜ້າຫ້ອງການໆເງິນເມືອງຊານໄຊ ໄດ້ຍົກໃຫ້ເຫັນຜົນງານໃນ 1 ປີຜ່ານມາຊຶ່ງເມືອງຊານໄຊເກັບລາຍຮັບໄດ້ທັງໝົດ 1 ຕື້ກວ່າກີບ, ທຽບໃສ່ແຜນການເພີ່ມຂຶ້ນ 17%, ໃນນີ້ລາຍຮັບຈາກສ່ວຍສາອາກອນໄດ້ 919 ລ້ານກວ່າກີບ,ລື່ນແຜນການ 9%,ລາຍຮັບຄ່າທໍານຽມ ແລະຄ່າບໍລິການໄດ້ 46 ລ້ານກວ່າກີບ, ທຽບໃສ່ແຜນການປະຕິບັດໄດ້ 100%, ໂດຍເກັບໄດ້ຈາກຫົວໜ່ວຍທຸລະກິດ, ຫົວໜ່ວຍວິສາຫະກິດທັງໝົດທົ່ວເມືອງ 62 ຫົວໜ່ວຍໃນນັ້ນຂົງເຂດການຄ້າມີ 41 ຫົວໜ່ວຍ,ຂົງເຂດການຜະລິດມີ 7 ຫົວໜ່ວຍ,ຂົງເຂດການບໍລິການມີ 14 ຫົວໜ່ວຍ,ຫົວໜ່ວຍທຸລະກິດນໍ້າມັນເຊື້ອໄຟມີ 3 ຫົວໜ່ວຍ, ເກັບໄດ້ 2 ລ້ານກວ່າກີບ, ໄດ້ຈາກການຊຳລະຄ່າທຳນຽມທາງທັງໝົດ 70 ລ້ານກີບກວ່າກີບ, ລາຍຮັບຈາກການເກັບພາສີທີ່ດິນໃນ 39 ບ້ານ ໄດ້ 136 ລ້ານກວ່າກີບ, ສ່ວນລາຍຈ່າຍແມ່ນປະຕິບັດໄດ້ຕາມແຜນປະຈຳປີ.

  ກອງປະຊຸມບັນດາຜູ້ເຂົ້າຮ່ວມໄດ້ປະກອບຄໍາເຫັນໃສ່ບົດສະຫຼຸບ ແລະທິດທາງແຜນການພ້ອມທັງໄດ້ຮັບຟັງທິດຊີ້ນໍາຈາກຄະນະປະທານເພື່ອເຮັດໃຫ້ວຽກງານການເງິນໃນທົ່ວເມືອງຊານໄຊໃນປີ 2021 ໄດ້ຮັບການຈັດຕັ້ງປະຕິບັດຢ່າງມີຜົນສໍາເລັດ.

ຮູບພາບ: ໜັງສືພິມເສດຖະກິດ-ສັງຄົມ

แชร์