ອາກອນວຽງຈັນລາຍຮັບລື່ນແຜນ

   ໃນວັນທີ 25-26 ກຸມພາ 2021 ສ່ວຍສາອາກອນປະຈຳແຂວງວຽງຈັນໄດ້ຈັດກອງປະຊຸມສະຫຼຸບຕີລາຄາການຈັດຕັ້ງປະຕິບັດວຽກງານສ່ວຍສາອາກອນປະຈຳປີ 2020 ແລະ ວາງທິດທາງແຜນການປີ 2021 ໂດຍການເປັນປະທານຂອງທ່ານ ຂັນທອງ ພະລະຄອນ ຫົວໜ້າສ່ວຍສາອາກອນປະຈຳແຂວງວຽງຈັນ, ມີບັນດາຫົວ ໜ້າສ່ວຍສາອາກອນ ປະຈຳ 11 ເມືອງທົ່ວແຂວງ, ພ້ອມດ້ວຍພະນັກງານສ່ວຍສາອາກອນປະຈຳແຂວງເຂົ້າຮ່ວມ.

  ທ່ານ ບຸນທະວີ ຈັນທະມາລາ ຮອງຫົວໜ້າສ່ວຍສາອາກອນປະຈຳ ແຂວງວຽງຈັນ ໄດ້ສະຫຼຸບລາຍງານຕໍ່ກອງປະຊຸມບາງຕອນວ່າ: ຫົວໜ່ວຍວິສາຫະກິດທົ່ວແຂວງມີທັງໝົດ 8.292 ຫົວໜ່ວຍ; ໃນນີ້: ຫົວໜ່ວຍການຜະລິດມີ 574 ຫົວໜ່ວຍ, ການຄ້າມີ 4.703 ຫົວໜ່ວຍ ແລະການບໍລິການມີ 3.015 ຫົວໜ່ວຍ. ຈໍານວນຫົວໜ່ວຍທີ່ອອກໃບຢັ້ງຢືນມອບອາກອນມີ 2.203 ຫົວໜ່ວຍ ແລະ ອອກບັດມີ 3.327 ຫົວໜ່ວຍ, ຖືບັນຊີແບບທຳມະດາ 845 ຫົວໜ່ວຍ, ປະຖົມພື້ນຖານເສຍອາກອນແບບມອບເໝົາມີ 8 ຫົວໜ່ວຍ, ຫົວໜ່ວຍສູນກາງຄຸ້ມຄອງແຕ່ມີສາຂາຕັ້ງຢູ່ແຂວງ ແລະພາກສ່ວນອື່ນມາເຄື່ອນໄຫວມີ 20 ຫົວໜ່ວຍ. ສ່ວຍສາອາກອນປະ ຈຳແຂວງຄຸ້ມຄອງມີ 630 ຫົວໜ່ວຍ. ສ່ວຍສາອາກອນປະຈຳເມືອງຄຸ້ມຄອງ 2.852 ຫົວໜ່ວຍ, ຂັ້ນບ້ານຄຸ້ມຄອງມີທັງໝົດ 4.801 ຫົວໜ່ວຍ, ຫົວໜ່ວຍທີ່ມີລາຍຮັບຕໍ່າກ່ວາ 50 ລ້ານກີບ ລົງມາມີ 5.013 ຫົວໜ່ວຍ.

  ທົ່ວແຂວງວຽງຈັນມີດິນປຸກສ້າງທັງໝົດ 81 ພັນກວ່າຕອນ, ມີເນື້ອທີ່ດິນທັງໝົດ 60,9 ລ້ານຕາແມັດ, ຄິດໄລ່ເປັນຈຳນວນເງິນ 2,9 ຕື້ກີບ, ທົ່ວແຂວງມີດິນກະສິກໍາ ທັງໝົດ 1,1 ແສນຕອນ, ມີເນື້ອທີ່ດິນທັງໝົດ 163,2 ລ້ານເຮັກຕາ ຄິດໄລ່ເປັນຈຳນວນເງິນ 5,6 ຕື້ກີບ. ການເກັບລາຍຮັບສ່ວຍສາອາກອນໝົດປີ 2020 ໄດ້ທັງໝົດ 186 ຕື້ກວ່າກີບ. ໃນນັ້ນໄດ້ຈາກອາກອນປົກກະຕິ149 ຕື້ກວ່າກີບ, ໄດ້ຈາກຄ່າທຳນຽມຕ່າງໆ 4 ຕື້ກວ່າກີບ,ລາຍຮັບວິຊາການ 18 ຕື້ກວ່າກີບ,ລາຍຮັບຈາກທີ່ດິນ 12 ຕື້ກວ່າກີບ.

  ທ່ານ ບຸນທະວີ ຈັນທະມາລາ ຮອງຫົວໜ້າສ່ວຍສາອາກອນປະຈຳແຂວງວຽງຈັນໄດ້ກ່າວຕື່ມອີກວ່າ: ສຳລັບປີ2021 ຈະສູ້ຊົນເກັບລາຍຮັບສ່ວຍສາອາກອນທົ່ວແຂວງໃຫ້ໄດ້ທັງໝົດ 200 ຕື້ກີບ. ໃນນັ້ນລາຍຮັບອາກອນປົກກະຕິຈະໃຫ້ໄດ້ 161 ຕື້ກວ່າກີບ, ຈາກຄ່າທຳນຽມຕ່າງໆຈະໃຫ້ໄດ້ 8 ຕື້ກວ່າກີບ, ລາຍຮັບວິຊາການຈະໃຫ້ໄດ້ 15 ຕື້ກວ່າກີບແລະລາຍຮັບຈາກທີ່ດິນຈະໃຫ້ໄດ້ 14 ຕື້ກວ່າກີບ. 

ຂ່າວ: ບຸນມາ ແກ້ວບຸດດາ

ຮູບພາບ: ໜັງສືພິມເສດຖະກິດ-ສັງຄົມ

แชร์