ຊີອາໄອ ມອບລາງວັນໃຫ້ຜູ້ໂຊກດີ

 ໃນວັນທີ 1 ມີນາຜ່ານມານີ້, ວິທະຍຸສາກົນແຫ່ງປະເທດຈີນ CRI ປະຈໍາລາວ ໄດ້ຈັດກິດຈະກໍາມອບໂຊກໃຫ້ແຟນລາຍການໃນໂຄງການ “ກິດຈະກຳຮູ້ ຮອບໂລກຊີງໂຊກ 3 ຊັ້ນປະຈໍາປີ 2018” ເພື່ອໃຫ້ແຟນລາຍການທີ່ຟັງຄື້ນ FM 93.0 MHZ ໄດ້ຄວາມຮູ້, ໄດ້ສາລະ ແລະໃກ້ຊິດກັບ CRI ຫຼາຍຂຶ້ນ, ໂດຍການເຂົ້າຮ່ວມ ແລະ ມອບຂອງທ່ານ ນາງ ສຸດທິດາ ຫົວໜ້າວິທະຍຸສາກົນແຫ່ງປະເທດຈີນປະຈໍາລາວ, ພ້ອມດ້ວຍຕາງໜ້າຜູ້ໃຫ້ການສະໜັບສະໜູນ, ແຟນລາຍການຜູ້ໂຊກດີຈາກກິດຈະກໍາຮູ້ຮອບໂລກຊີງໂຊກ 3 ຊັ້ນ ແລະບັນດາສື່ມວນຊົນທຸກຂະແໜງການເຂົ້າຮ່ວມ.

  ທ່ານ ນາງ ສຸດທິດາ ກ່າວວ່າ: ການຈັດກິດຈະກຳຮູ້ຮອບໂລກຊີງໂຊກ 3 ຊັ້ນ ແມ່ນກິດຈະກຳໜຶ່ງຂອງຄື້ນວິທະຍຸສາກົນແຫ່ງປະເທດຈີນປະຈຳລາວ (CRI) ເພື່ອເປັນການສ້າງຄວາມຮູ້ ແລະຄວາມສາມັກຄີລະຫວ່າງ CRI ກັບ ທ່ານຜູ້ຟັງ ແລະຕອບແທນນ້ຳໃຈໃຫ້ຜູ້ຟັງ ທີ່ໄດ້ຕິດຕາມຮັບຟັງຄື້ນ CRI FM 93.0 MHZ ມາໂດຍຕະຫຼອດ, ໂດຍນອກ ຈາກຈະໄດ້ຄວາມຮູ້, ຄວາມເບີກບານ ມ່ວນຊື່ນແລ້ວຍັງໄດ້ຮັບລາງວັນຈາກ ການຟັງນຳອີກ, ການຈັດກິດຈະກໍາ “ຮູ້ ຮອບໂລກ ຊີງໂຊກ 3  ຊັ້ນ” ຄັ້ງນີ້ເປັນຄັ້ງ ທີ 5 (ປີ 2012, 2013, ປີ 2016, 2017 ແລະປີ 2018), ສະເພາະກິດຈະກຳ “ຮູ້ຮອບໂລກຊີງໂຊກ 3 ຊັ້ນປະຈໍາປີ 2018” ທີ່ຈັດຂຶ້ນໂດຍທີມງານ CRI FM 93.0 MHZ ຄັ້ງນີ້ ໄດ້ແບ່ງອອກເປັນ 3 ຊັ້ນຄື: ຊັ້ນທີ 1 ລາງວັນປະຈໍາອາທິດ ແຈກເສື້ອອາທິດລະ 5 ລາງວັນ, ຊັ້ນທີ 2 ລາງວັນປະຈໍາເດືອນແຈກເດືອນລະ 2 ລາງວັນ ແລະຊັ້ນທີ 3 ຄືລາງວັນໃຫຍ່ທ້າຍປີ 2018, ຊຶ່ງຜູ້ເຂົ້າຮ່ວມກິດຈະກໍາຈະຕອບຄໍາຖາມອາທິດລະໜຶ່ງ ຄໍາຖາມ ໂດຍມີສອງຄໍາຕອບໃຫ້ເລືອກ ແລະສົ່ງຄໍາຕອບຜ່ານເຄືອຂ່າຍ 2930 ແລະ 5930 ລວມທັງໝົດເກືອບ 50 ພັນຂໍ້ຄວາມ, ພ້ອມດຽວກັນນັ້ນ ໃນປີ 2019 CRI FM 93.0 MHZ ຈະປັບ ປຸງກິດຈະກໍາໃຫ້ມີສີສັນກວ່າເກົ່າ, ເພື່ອໃຫ້ແຟນລາຍການໄດ້ຮັບຄວາມຮູ້, ແລະຄວາມສຸກຈາກ CRI FM 93.0 MHZ ຫຼາຍຂຶ້ນ.

  ສໍາລັບການມອບໂຊກຄັ້ງນີ້ເປັນລາງວັນໃຫຍ່ທີ່ໄດ້ເລີ່ມມາແຕ່ຕົ້ນປີ 2018 ຮອດວັນທີ 31 ທັນວາ 2018 ມີແຟນລາຍ ການຕອບຄໍາຖາມດ້ວຍຂໍ້ຄວາມສັ້ນລວມທັງໝົດ 46,29 ພັນຂໍ້ຄວາມ, ໂດຍຜູ້ໂຊກດີໄດ້ຮັບລາງວັນທີ 1 ສາຍຄໍຄໍາ ນໍ້າໜັກ 2 ບາດມີ 1 ລາງວັນແມ່ນທ່ານ ບຸນຫຼາຍ ຫວັງປະເສີດ, ລາງ ວັນທີ 2 ສາຍຄໍຄຳນໍ້າໜັກ 1 ບາດ 2 ລາງວັນ ຜູ້ທີ່ ໄດ້ທ່ານ ແສງເພັດ ແລະທ່ານນາງ ແສງ ເງິນ ພົມມຸນີວົງ, ລາງວັນທີ 3 ພັດລົມ ອາຍນ້ຳ 3 ລາງວັນແມ່ນທ່ານ ບຸນທະວີ ນ້ອຍວົງ, ທ່ານ ຄຳພຸດ ດາວວິຈິດ ແລະ ທ່ານ ບຸນຄົງ ອ່ອນສີຍົມ, ນອກນີ້ ຍັງມີ ລາງວັນຊົມເຊີຍໝໍ້ໄຟຟ້າ 3 ລາງວັນ.

ນສພ ເສດຖະກິດ-ສັງຄົມ

แชร์