ໄຊຍະຫາລືແກ້ປະຕິບັດຄໍາຕັດສິນຄະດີແກ່ຍາວ

 ກອງປະຊຸມວຽກງານປະຕິບັດຄໍາຕັດສິນຂອງສານຄະດີທີ່ຫຍຸ້ງຍາກໄດ້ຈັດຂຶ້ນໃນວັນທີ 24 ກຸມພາ 2021 ນີ້ທີ່ຫ້ອງປະຊຸມພະແນກຍຸຕິທໍາແຂວງໄຊຍະບູລີ, ໃຫ້ກຽດເຂົ້າຮ່ວມມີທ່ານ ເພັດພິໄຊ ສູນວິໄລ ຮອງເຈົ້າແຂວງໄຊຍະບູລີ, ມີຫົວໜ້າ, ຮອງຫົວໜ້າພະແນກການທີ່ກ່ຽວຂ້ອງ, ມີຫົວໜ້າ, ຮອງຫົວໜ້າຂະແໜງປະຕິບັດຄໍາຕັດ ສິນຂອງສານ 4 ເມືອງຄື: ເມືອງປາກລາຍ,ເມືອງພຽງ, ໄຊຍະບູລີ ແລະເມືອງຫົງສາພ້ອມດ້ວຍຫົວໜ້າ, ຮອງຫົວໜ້າຂະແໜງການພະແນກຍຸຕິທໍາແຂວງເຂົ້າຮ່ວມ.

  ໃນກອງປະຊຸມພາຍຫຼັງທ່ານ ກາວີ ເກດດົມລິ ໄດ້ກ່າວເປີດກອງປະຊຸມຢ່າງເປັນທາງການແລ້ວ ທ່ານ ທອງເສັງ ຟອງປະດິດ ຮອງຂະແໜງຈັດຕັ້ງປະຕິບັດຄໍາຕັດສິນຂອງສານໄດ້ຂຶ້ນລາຍງານການຈັດຕັ້ງປະຕິບັດຄໍາຕັດສິນຂອງສານໃນປີຜ່ານມາໄດ້ໃຫ້ຮູ້ວ່າ: ໃນໜຶ່ງປີຜ່ານມາມີຄະດີຄ້າງມາທັງໝົດ 2.274 ເລື່ອງ, ແພ່ງ 510 ເລື່ອງ, ອາຍາ 1.764 ເລື່ອງ, ຄະດີເຂົ້າໃໝ່ທັງໝົດ 654 ເລື່ອງ, ແພ່ງ 135 ເລື່ອງ, ອາຍາ 519 ເລື່ອງ ປະຕິບັດສໍາເລັດ 182 ເລື່ອງ, ແພ່ງ 56 ເລື່ອງ, ອາ ຍາ 126 ເລື່ອງ,ສົ່ງໃຫ້ເມືອງ 30 ເລື່ອງ,ໄລຍະການທວງຄະດີທັງໝົດ 8 ເລື່ອງ, ແພ່ງ 7 ເລື່ອງ, ອາຍາ 1 ເລື່ອງ, ປະຕິບັດບໍ່ໄດ້ 199 ເລື່ອງ, ແພ່ງ 39 ເລື່ອງ, ອາຍາ 160 ເລື່ອງ, ໃນນີ້ຢູ່ພາຍ ໃນແຂວງທັງໝົດ 164 ເລື່ອງ, ແພ່ງ 33 ເລື່ອງ, ອາຍາ 131 ເລື່ອງ;

  ມາເຖິງປະຈຸບັນລວມຄະດີທັງໝົດ 2.708 ເລື່ອງ, ແພ່ງ 575 ເລື່ອງ, ອາຍາ 2.133 ເລື່ອງ ພວມຈັດຕັ້ງປະຕິບັດ 2.509 ເລື່ອງ, ແພ່ງ 536 ເລື່ອງ, ອາຍາ 1.973 ເລື່ອງ, ໄດ້ອອກຄໍາສັ່ງພາຕົວ 22 ສະບັບ, ໄດ້ອອກຄໍາສັ່ງຍົກຍ້າຍ 1 ສະບັບ, ໄດ້ອອກຄໍາສັ່ງລຶບລ້າງໃບຕາດິນ 3 ສະບັບ, ໄດ້ເກັບເງິນທາງແພ່ງມອບໃຫ້ຄູ່ຄວາມໄດ້ທັງໝົດ 1,73 ຕື້ກີບ, 5,8 ລ້ານບາດ, 250 ໂດລາ, ເກັບເງິນປັບໃໝມອບເຂົ້າລັດ 277 ລ້ານກວ່າກີບ, ໄດ້ມອບເງິນຮິບໂຮມຈໍານວນ 62 ລ້ານກວ່າກີບ, 7 ພັນກວ່າບາດ, ໄດ້ຮິບພາຫະນະຈໍານວນ 99 ຄັນ, ລົດໃຫຍ່ 2 ຄັນ, ລົດຈັກ 97 ຄັນ.

  ໃນໄລຍະຜ່ານມາເຖິງວ່າພວກເຮົາຈະໄດ້ເອົາໃຈໃສ່ໃນການປະຕິບັດຄໍາຕັດສິນທີ່ຜ່ານມາໄດ້ດີແລ້ວກໍ່ຕາມແຕ່ມີພະນັກງານສະມາຊິກພັກຈໍານວນໜຶ່ງຍັງຂາດຈັນຍາທໍາ ຈັນຍາບັນ ແລະ ສະຕິຕໍ່ການຈັດຕັ້ງ; ອີກດ້ານໜຶ່ງການຈັດຕັ້ງປະຕິບັດຄໍາຕັດສິນຂອງສານບາງຄະດີແມ່ນລໍໃຫ້ຄູ່ຄວາມສະເໜີມາທວງແລ້ວຄົ້ນຄວ້າຈັດຕັ້ງປະຕິບັດຊຶ່ງເຮັດໃຫ້ຄະດີຄ້າງເປັນຈໍານວນຫຼວງຫຼາຍ, ຂາດກົນໄກປະສານງານການຈັດຕັ້ງປະຕິບັດວຽກວິຊາສະເພາະເຮັດຊັກຊ້າແກ່ຍາວບໍ່ເດັດຂາດຈຶ່ງເຮັດໃຫ້ຄະດີການອັ່ງອໍ.

  ຈາກນັ້ນບັນດາຜູ້ເຂົ້າຮ່ວມໄດ້ພ້ອມກັນປະກອບຄໍາຄິດຄໍາເຫັນເພື່ອປັບປຸງແກ້ໄຂຂອດທີ່ຍັງຄົງຄ້າງ, ບັນຫາການປະຕິບັດຄໍາຕັດສິນຂອງສານທີ່ເປັນສິ່ງທີ່ອຸດຕັນເຮັດໃຫ້ວຽກງານດັ່ງກ່າວຫຼ້າຊ້າແກ່ຍາວຈົນເກີດມີການຈົ່ມວ່າຫາງສຽງຈາກສັງຄົມທັງໝົດນັ້ນກໍ່ເພື່ອເຮັດໃຫ້ວຽກງານປະຕິບັດຄໍາຕັດສິນຂອງສານໄດ້ມີການພັດທະນາຂຶ້ນເປັນກ້າວໆ.

ຂ່າວ: ບຸນທີ

ຮູບພາບ: ໜັງສືພິມເສດຖະກິດ-ສັງຄົມ

แชร์