ກຽມສືບຕໍ່ສ້າງດ່ານສາກົນວັງເຕົ່າທັນສະໄໝ

 ວັນທີ 24 ກຸມພາ 2021, ທີ່ຫ້ອງວ່າການແຂວງຈຳປາສັກ, ມີກອງປະຊຸມປຶກສາຫາລືແຜນທີ່ຈະສືບຕໍ່ການຈັດຕັ້ງປະຕິບັດໂຄງການກໍ່ສ້າງດ່ານສາກົນວັງເຕົ່າ ເມືອງໂພນທອງ ແຂວງຈຳປາສັກໃຫ້ເປັນດ່ານສາກົນທີ່ທັນສະໄໝ,ປະຈຸບັນປະຕິບັດສຳເລັດ 82.96%,ໂດຍການເປັນປະທານຮ່ວມຂອງທ່ານ ວິໄລວົງ ບຸດດາຄຳ ເຈົ້າແຂວງໆຈຳປາສັກ,ທ່ານ ວຽງສະຫວັດ ສີພັນດອນ ລັດຖະມົນຕີກະຊວງໂຍທາທິການ ແລະຂົນສົ່ງ,ມີຜູ້ຕາງໜ້າຈາກກະຊວງແຜນການ ແລະການລົງທຶນ,ກະຊວງການເງິນ, ຫົວໜ້າພະແນກການທີ່ກ່ຽວຂ້ອງຂອງແຂວງ, ທ່ານເຈົ້າເມືອງໂພນທອງ, ຫົວໜ້າດ່ານສາກົນວັງເຕົ່າແລະບໍລິສັດພົງຊັບທະວີຜູ້ຮັບເໝົາກໍ່ສ້າງເຂົ້າຮ່ວມ.

  ໂຄງການກໍ່ສ້າງດ່ານສາກົນວັງເຕົ່າ ເມືອງໂພນທອງ ແຂວງຈຳປາສັກ ໃຫ້ເປັນດ່ານສາກົນທີ່ທັນສະໄໝ,ໄດ້ຮັບການຈັດຕັ້ງປະຕິບັດມາແຕ່ຕົ້ນປີ 2013, ມູນຄ່າກໍ່ສ້າງໂຄງການ 98.3 ຕື້ກີບ ໂດຍແມ່ນພະແນກໂຍທາທິການ ແລະຂົນສົ່ງແຂວງຈຳປາສັກເປັນເຈົ້າຂອງໂຄງການ ແລະບໍລິສັດ ພົງຊັບທະວີ ເປັນຜູ້ຮັບ ເໝົາກໍ່ສ້າງໃນສັນຍາ 36 ເດືອນ ປະກອບມີ 7 ໜ້າວຽກໃຫຍ່ຄື: ວຽກກໍ່ສ້າງອາຄານດ່ານ; ວຽກກໍ່ສ້າງອາຄານຫໍພັກ; ວຽກກໍ່ສ້າງທາງເບຕົງ; ວຽກກໍ່ສ້າງຫ້ອງ ນໍ້າວຽກກໍ່ສ້າງອາຄານສີດພົ່ນ-ຂ້າເຊື້ອ; ເຄື່ອງເຟີນິເຈີຄົບຊຸດ, ກ້ອງວົງຈອນ ແລະລະບົບ IT ແລະລະບົບດັບເພີງ ແລະນໍ້າປະປາຮັບໃຊ້ດ່ານ, ດຳເນີນຈົນມາຮອດ ປີ 2018, ຈາກການກວດກາປະເມີນຄວາມຄືບໜ້າຂອງໂຄງການລ່າສຸດປະຕິບັດສຳເລັດ 82.96%, ຍ້ອນພົບຄວາມຫຍຸ້ງຍາກດ້ານງົບປະມານປະຈຸບັນຈຶ່ງ ເຮັດໃຫ້ໂຄງການກໍ່ສ້າງດັ່ງກ່າວໄດ້ຢຸດ

ຕິການກໍ່ສ້າງ, ເພື່ອສືບຕໍ່ປະຕິບັດໂຄງການກໍ່ສ້າງດ່ານສາກົນວັງເຕົ່າໃຫ້ເປັນດ່ານສາກົນທີ່ທັນສະໄໝໃຫ້ສຳເລັດກອງປະຊຸມຈຶ່ງໄດ້ມີການຄົ້ນຄວ້າແລກປ່ຽນຄຳຄິດຄຳເຫັນກັບຜູ້ຕາງໜ້າຈາກກະຊວງ, ພະແນກການ ແລະພາກສ່ວນທີ່ກ່ຽວຂ້ອງຕົກລົງເຫັນດີໃຫ້ມີການກວດກາ, ປະເມີນຄືນໃໝ່ຄວາມຄືບໜ້າຂອງໂຄງການ ແລະເປັນ ການຊຸກຍູ້ໃຫ້ໂຄງການໄດ້ສຳເລັດຕາມແຜນການກໍຄືການຊອກແຫຼ່ງທຶນຈາກບ້ວງໃດໜຶ່ງ, ຈັດສັນງົບປະມານຊ່ວຍໃນການຊຳລະສະສາງໂຄງການໃຫ້ເໝາະສົມກັບໜ້າວຽກທີ່ປະຕິບັດສຳເລັດຕາມແຜນການປະກອບສ່ວນເຂົ້າໃນແຜນພັດທະນາພື້ນຖານໂຄງລ່າງຂອງ ແຂວງຈຳປາສັກ, ຍຸດທະສາດການພັດທະນາພື້ນຖານໂຄງລ່າງໂຍທາທິການ ແລະຂົນສົ່ງເພື່ອການເຊື່ອມໂຍງ ແລະເຊື່ອມຈອດເປັນສູນກາງທາງຜ່ານຂອງບັນດາປະເທດໃນພາກພື້ນ ແລະ ສາກົນເປັນທ່າແຮງສຳຄັນຕໍ່ການເຊື່ອມໂຍງດ້ານການຄ້າ, ການລົງທຶນ ແລະການທ່ອງທ່ຽວ.

ຂ່າວ: ທັດຊະນະ

ຮູບພາບ: ໜັງສືພິມເສດຖະກິດສັງຄົມ

แชร์