ຮສສ ປະກາດການຈັດຕັ້ງ ແລະຮັບນະໂຍບາຍອຸດໜູນບຳນານ

  ໃນວັນທີ 23 ກຸມພາ 2021, ທີ່ກະຊວງແຮງງານ ແລະສະຫວັດດີການສັງຄົມ,ໄດ້ມີພິທີປະກາດການຈັດຕັ້ງ ແລະປະກາດຮັບນະໂຍບາຍອຸດໜູນບຳນານ,ເປັນກຽດເຂົ້າຮ່ວມຂອງທ່ານ ຄຳແພງ ໄຊສົມແພງ ລັດຖະມົນຕີກະຊວງ ຮສສ, ທ່ານນາງ ໃບຄຳ ຂັດທິຍະ ຮອງລັດຖະມົນຕີ,ມີບັນດາທ່ານຫົວໜ້າກົມ,ຮອງຫົວໜ້າກົມ, ຫ້ອງ ການ, ອົງການ, ສະຖາບັນ, ສູນ ແລະບັນພະນັກງານ-ລັດຖະກອນຫຼັກແຫຼ່ງຂອງກະຊວງເຂົ້າຮ່ວມ.

 ເພື່ອເປັນການປະຕິບັດຕາມກົດໝາຍວ່າດ້ວຍພະນັກງານ-ລັດຖະກອນ,ພະນັກງານ-ລັດຖະກອນຮອດອາຍຸພັກການ-ຮັບອຸດໜູນບຳນານໃນຄັ້ງນີ້ມີ 2 ທ່ານ ຄື: ທ່ານ ຄໍາຂານ ພິນສະຫວັນ ອະດີດຄະນະປະຈໍາ, ຄະນະພັກກະຊວງ, ຫົວໜ້າກົມຈັດຕັ້ງ ແລະ ພະນັກງານ, ອະດີດຫົວໜ້າຫ້ອງການກະຊວງ, ອະດີດຮອງຫົວໜ້າກົມ ແລະອີກຫຼາຍໜ້າທີ່ຕໍາແໜ່ງທີ່ສຳຄັນນັບແຕ່ໄລຍະເລີ່ມກໍ່ຕັ້ງກະຊວງ ແລະທ່ານ ຄໍາປິງ ແສງຕານນະລາດ ອະດີດຄະນະພັກກະຊວງ 3 ສະໄໝ, ອະດີດຫົວໜ້າກົມນະໂຍບາຍຜູ້ມີຜົນງານ, ຄົນພິການ ແລະຜູ້ອາຍຸສູງ, ອະດີດຫົວໜ້າກົມກວດກາ ແລະອີກຫຼາຍໜ້າທີ່ຕໍາແໜ່ງທີ່ສຳຄັນນັບວ່າເປັນພະນັກງານ-ລັດຖະກອນຫຼັກແຫຼ່ງທີ່ກິ້ງເກືອກລີເລືອໃນວຽກງານຂອງກະຊວງໃນຫຼາຍສະໄໝທີ່ຜ່ານມາ, ທັງ 2 ທ່ານ ທີ່ພັການ-ຮັບອຸດໜູນບຳນານໃນຄັ້ງນີ້ແມ່ນລ້ວນແລ້ວແຕ່ເປັນພະນັກງານນຳພາ-ຄຸ້ມຄອງຫຼັກແຫຼ່ງຂອງພັກ-ລັດ ແລະຂອງກະຊວງແຮງງານ ແລະສະຫວັດດີການສັງຄົມພວກເຮົາມາຢ່າງຍາວນານລວມປີການໄດ້ 46 ປີ.

  ພ້ອມດຽວກັນນັ້ນອີງໃສ່ຄວາມຮຽກຮ້ອງຕ້ອງການຂອງໜ້າທີ່ວຽກງານໃຫ້ສືບຕໍ່ພາລະກິດຈັດຕັ້ງປະຕິບັດວຽກງານຂະແໜງແຮງງານ ແລະສະຫວັດດີການສັງຄົມ ຈຶ່ງໄດ້ປະກາດແຕ່ງຕັ້ງໃໝ່ເປັນຫົວໜ້າກົມຄື: ທ່ານ ຄຳໄຊ ເຊ່ຍຍິ້ງຢ່າງ ຂຶ້ນເປັນຫົວໜ້າກົມຈັດຕັ້ງ ແລະ ພະນັກງານ ແລະ ທ່ານ ສີສະຫວາດ ກົມພົນ ຂຶ້ນເປັນຫົວ ໜ້າກົມນະໂຍບາຍຜູ້ມີຜົນງານ, ຄົນພິການ ແລະຜູ້ອາຍຸສູງ.

  ໂອກາດອັນມີຄວາມໝາຍ, ຄວາມສຳຄັນນີ້ ທ່ານ ຄຳແພງ ໄຊສົມແພງ ກໍາມະການສູນກາງພັກ, ລັດຖະມົນຕີກະຊວງ ຮສສ ຍັງໃຫ້ກຽດໂອລົມພະນັກງານພັກຜ່ອນບຳນານ ແລະຜູ້ຖືກແຕ່ງຕັ້ງເປັນຫົວໜ້າກົມຄົນໃໝ່ວ່າ: ຕາງໜ້າ ໃຫ້ສູນກາງພັກ-ລັດຖະບານ, ຄະນະພັກ, ຄະນະນຳກະຊວງຂໍສະແດງຄວາມຮູ້ບຸນຄຸນມາຍັງ 2 ທ່ານທີ່ພັກການ-ຮັບອຸດໜູນບຳນານ ແລະຂໍຂອບໃຈຢ່າງຈິງໃຈທີ່ທ່ານໄດ້ອຸທິດສະຕິປັນຍາ, ຄວາມຮູ້, ຄວາມສາມາດເຂົ້າໃນການປົກປັກຮັກສາ ແລະພັດທະນາປະເທດ ຊາດ.

  ສຳລັບ 2 ທ່ານ ທີ່ໄດ້ຮັບການແຕ່ງຕັ້ງໃໝ່ເປັນຫົວໜ້າກົມຄື: ກົມຈັດຕັ້ງ ແລະພະນັກງານ, ກົມນະໂຍບາຍຜູ້ມີຜົນງານ, ຄົນພິການ ແລະຜູ້ອາຍຸສູງກໍໃຫ້ເອົາໃຈໃສ່ຢ່າງຕັ້ງໜ້າເຂົ້າໃນການນໍາພາ, ຊີ້ນຳວຽກງານ, ການເຮັດວຽກຕົວຈິງຕາມພາລະບົດບາດຂອງຕົນດ້ວຍຄວາມຮັບຜິດຊອບສູງ,ສຳຄັນເອົາໃຈໃສ່ສຶກສາອົບຮົມການເມືອງແນວຄິດຂອງພະນັກງານ-ລັດຖະກອນ ໃຫ້ມີຄຸນທາດການເມືອງ, ມີຄຸນສົມບັດສິນທຳປະຕິວັດ, ມີຄວາມສາມັກຄີ, ມີຄວາມຮັບຜິດຊອບ ແລະເຮັດສຳເລັດທຸກໜ້າທີ່ວຽກງານທີ່ ຮັບມອບໝາຍ; ເອົາໃຈໃສ່ປັບປຸງກົງຈັກການຈັດຕັ້ງຕາມທິດກະທັດຮັດເຄື່ອນໄຫວຢ່າງມີຄຸນນະພາບ,ຄົ້ນຄວ້າໜ້າທີ່,ພາລະບົດບາດໃຫ້ຈະແຈ້ງ, ຊັດເຈນ, ເອົາໃຈໃສ່ຍຶດໝັ້ນແບບແຜນນໍາພາ ແລະວິທີເຮັດວຽກຕາມຫຼັກການລວມສູນປະຊາທິປະໄຕຢ່າງເຂັ້ມງວດ,ມີການແບ່ງວຽກແບ່ງຄວາມຮັບຜິດຊອບໃຫ້ຄະນະຢ່າງເໝາະ ສົມ ແລະພ້ອມກັນຈັດຕັ້ງປະຕິບັດວຽກງານຮອບດ້ານໃຫ້ປາກົດຜົນເປັນຈິງ; ເອົາໃຈໃສ່ບໍາລຸງ-ກໍ່ສ້າງພະນັກງານໃຫ້ມີຄວາມຮູ້ຄວາມສາມາດໃຫ້ສູງຂຶ້ນເລື້ອຍໆສົມຄູ່ກັບໜ້າທີ່ການເມືອງໄລຍະໃໝ່ຂອງວຽກງານ ຮສສ.

ສະໜັບສະໜູນໂດຍ: HONDA

ຂ່າວ: ຮສສ

แชร์