ສະຫຼຸບວຽກໂພຊະນາການ

  ຄະນະກຳມະການດ້ານໂພຊະນາການຂັ້ນແຂວງໆຫຼວງພະບາງໄດ້ຈັດກອງປະຊຸມສະຫຼຸບວຽກງານປະຈໍາປີ 2020 ຂຶ້ນໃນວັນທີ 24 ກຸມພາ 2021 ທີ່ຫ້ອງປະຊຸມຂອງພະແນກກະສີກຳ ແລະປ່າໄມ້ ແຂວງຫຼວງພະບາງ ໂດຍການເປັນປະທານຂອງທ່ານ ບຸນເລື່ອມ ມະນີວົງ ຮອງເຈົ້າແຂວງຫຼວງພະບາງ, ທ່ານ ນິພອນ ສີມພາລີ ຮອງຫົວໜ້າພະແນກສາທາລະນະສຸກແຂວງ, ມີຄະນະກໍາມະການກອງເລຂາດ້ານໂພຊະນາການຂັ້ນແຂວງ,ຂັ້ນເມືອງ 7 ເມືອງ,ອົງການຈັດຕັ້ງສາກົນທີ່ບໍ່ສັງກັດລັດ, ອົງການຈັດຕັ້ງທາງສັງຄົມ-ສະມາຄົມທີ່ບໍ່ຫວັງຜົນກຳໄລພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

  ທ່ານ ບຸນເລື່ອມ ມະນີວົງ ຮອງເຈົ້າແຂວງຫຼວງພະບາງໃນນາມປະທານກ່າວເປີດກອງປະຊຸມໄດ້ກ່າວວ່າ: ກອງປະຊຸມຂອງຄະນະກໍາມະການດ້ານໂພຊະນາການຄັ້ງນີ້ແມ່ນມີຄວາມໝາຍສໍາຄັນຫຼາຍຊຶ່ງຄະນະກໍາມະການຂັ້ນແຂວງ ແລະຂັ້ນເມືອງລວມເຖິງໜ່ວຍງານທີ່ກ່ຽວຂ້ອງຈະໄດ້ທົບທວນຄືນແຜນຍຸດທະສາດດ້ານໂພສະນາການແຫ່ງຊາດແຕ່ປີ 2016-2025 ແລະຮັບຟັງການສະຫຼຸບວຽກງານການຈັດຕັ້ງປະຕິບັດ 22 ມາດຕະການບຸລິມະສິດທີ 1 ຂອງແຜນຍຸດທະສາດດ້ານໂພຊະນາການປີ 2020 ແລະທິດທາງແຜນການປີ 2021, ໂດຍຈະເລັ່ງໃສ່ 10 ມາດຕະການຂອງສາທາ ແລະ4 ມາດຕະການຂອງຫຼາຍຂະແໜງການ, 4 ມາດຕະການຂອງກະສິກໍາ ແລະປ່າໄມ້, 4 ມາດຕະການຂອງສຶກສາທິການ ແລະກີລາ.

ພ້ອມນີ້ຜູ້ເຂົ້າຮ່ວມຍັງຈະໄດ້ປະກອບຄໍາຄິດເຫັນຕໍ່ບົດສະຫຼຸບ ແລະທິດທາງແຜນການ ແລະຮັບຟັງບົດຄວາມໝາຍໝັ້ນຂອງທ່ານຮອງເຈົ້າແຂວງໃນການຈັດຕັ້ງປະຕິບັດສົນທິສັນຍາວ່າດ້ວຍສິດທິເດັກ, ການນໍາສະເໜີແລກປ່ຽນບາງເນື້ອໃນຂໍ້ຄວາມສໍາຄັນຈາກກອງປະຊຸມເຜີຍແຜ່ປະຈໍາປີຄັ້ງທີ 2 ໂຄງການສ້າງຂໍ້ມູນຂ່າວສານແຫ່ງຊາດດ້ານໂພຊະນາການຕື່ມອີກ.

  ສະພາບລວມຂອງການຈັດຕັ້ງປະຕິບັດຕາມມາດຕະການ ແລະການສະໜອງອາຫານໃນໂຮງຮຽນເພື່ອລົງຕິດຕາມ ແລະເຂົ້າຮ່ວມກອງປະຊຸມຝືກອົບຮົມວຽກງານໂພຊະນາການ, ຕິດຕາມການສະໜອງອາຫານໃນໂຮງຮຽນຂອງອົງການອາຫານໂລກຢູ່ເມືອງງອຍ ແລະເມືອງໂພທອງ, ການສົ່ງເສີມພືດສວນຄົວໃນໂຮງຮຽນ ແລະສ້າງສວນຄົວໃນໂຮງຮຽນທົ່ວແຂວງ 113 ແຫ່ງ, ກວມເອົາ 10,96% ຈຳນວນໂຮງຮຽນທັງໝົດ, ຖ້າທຽບໃສ່ປີຜ່ານມາເພີ່ມຂຶ້ນ 4,85%, ມາດຕະການເຊື່ອມສານວຽກງານໂພຊະນາການເຂົ້າໃນຫຼັກສູດການຮຽນການສອນໃນການກຳນົດໂຄງການຫຼັກສູດແຕ່ລະຊັ້ນຮຽນຂອງກະຊ່ວງສຶກສາທິການ ແລະກີລາວາງອອກ, ໃຫ້ສາມາດປະຕິບັດໄດ້ 1.031 ໂຮງຮຽນ,ກວມເອົາ 100%,ລົງຊີ້ນຳວຽກງານໂພຊະນາການຕາມແຕ່ລະຂັ້ນ,ການຜັນຂະຫຍາຍລົງສູ່ຊຸມຊົນບ້ານຫ່າງໄກສອກຫຼີກໃນການເຝົ້າລະວັງເດັກທີ່ຂາດສານອາຫານເພື່ອແກ້ໄຂມາດຕະການໃນຕໍ່ໜ້າໃນການສົມທົບກັບຄະນະຮັບຜິດຊອບວຽກງານໂພຊະນາການທຸກຂັ້ນປຸກລະດົມຊຸມຊົນ, ພໍ່ແມ່-ຜູ້ປົກ ຄອງນັກຮຽນໃຫ້ມີສ່ວນຮ່ວມເພື່ອເຮັດໃຫ້ແຜນງານບັນລຸຕາມຈຸດປະສົງລະດັບຄາດໝາຍທີ່ວາງໄວ້.

ຂ່າວ: ສີສຸວັນ

แชร์