6,5 ພັນເຮັກຕາ ເນື້ອທີ່ປ່າສະຫງວນແຫ່ງຊາດນໍ້າກະດິງຖືກບຸກລຸກ

  ເພື່ອເປັນການປະເມີນຜົນສະພາບການນຳໃຊ້ທີ່ດິນ-ປ່າໄມ້ ແລະການວາງແຜນຄຸ້ມຄອງທີ່ດິນປ່າສະຫງວນແຫ່ງຊາດນໍ້າກະດິງ ຄັ້ງທີ 2 ໄດ້ຈັດກອງປະຊຸມດັ່ງກ່າວຂຶ້ນເມື່ອບໍ່ດົນຜ່ານມາທີ່ບໍລິຄຳໄຊພະແນກກະສິກຳ ແລະປ່າໄມ້ແຂວງເຂົ້າຮ່ວມໂດຍມີທ່ານ ບຸນເສັງ ປະທຳມະວົງ ຮອງເຈົ້າແຂວງບໍລິຄຳໄຊ,ອົງການອະນຸລັກສັດປ່າ, ພະ ແນກການ, ເມືອງ, ຂະແໜງການ, ຫ້ອງການ ແລະພາກສ່ວນກ່ຽວຂ້ອງເຂົ້າຮ່ວມ.

  ກອງປະຊຸມໄດ້ລາຍງານຜົນການປະເມີນສະພາບການນຳໃຊ້ທີ່ດິນ-ປ່າໄມ້ ແລະຜົນການເກັບກຳຂໍ້ມູນເສດຖະກິດ-ສັງຄົມຂອງ 13 ບ້ານເປົ້າໝາຍໂຄງການຢູ່ເຂດປ່າສະຫງວນແຫ່ງຊາດນໍ້າກະດິງເຫັນວ່າໄລຍະຜ່ານມາບັນດາພະແນກການ ແລະພາກສ່ວນກ່ຽວຂ້ອງໄດ້ມີການສຶກສາຂໍ້ມູນເບື້ອງຕົ້ນການນຳໃຊ້ທີ່ດິນ-ປ່າໄມ້, ໜ້າວຽກສໍາຄັນຕ່າງໆເຫັນວ່າໃນ 13 ບ້ານ ມີທັງໝົດ 2.851 ຄອບຄົວ, 15.134 ຄົນ ຍິງ7.411 ຄົນ ແລະມີຄອບຄົວທຸກຍາກ 77 ຄອບຄົວ.

ຜ່ານການປະເມີນຜົນຂອງຄະນະຮັບຜິດຊອບຍັງໄດ້ພົບຫຼາຍບັນຫາທີ່ຕ້ອງໄດ້ເລັ່ງປັບປຸງແກ້ໄຂເປັນຕົ້ນແມ່ນແຜນການຈັດສັນການຄຸ້ມຄອງນໍາໃຊ້ທີ່ດິນ-ປ່າໄມ້ຂອງບ້ານບໍ່ທັນລະອຽດ ແລະຂາດການຕິດຕາມ, ການນຳໃຊ້ດິນຂອງແຕ່ລະບ້ານປະມານ 60% ແມ່ນບໍ່ໄດ້ເສຍພາສີທີ່ດິນ, ເນື້ອທີ່ປ່າສະຫງວນແຫ່ງຊາດຫຼາຍກວ່າ 6.500 ເຮັກຕາ ໄດ້ຖືກບຸກລຸກນຳໃຊ້ໂດຍບໍ່ໄດ້ຮັບອະນຸຍາດ, ການອອກເອກະສານນຳໃຊ້ທີ່ດິນບາງຕອນແມ່ນມີການສັບຊ້ອນ ແລະອື່ນໆ.

ປ່າສະຫງວນນໍ້າກະດິງກວມເອົາແຂວງບໍລິຄຳໄຊ 4 ເມືອງ ເນື້ອທີ່ 163.525 ເຮັກຕາ,ແຂວງຄຳມ່ວນ 1 ເມືອງ 5.475 ເຮັກຕາ,ລວມເນື້ອທີ່ທັງໝົດ169.000 ເຮັກຕາ, ສັດປ່າຊະນິດທີ່ສຳຄັນມີເສືອ, ຊ້າງ, ທະນີ, ຂ່າງ, ນົກກົກຄຳ ແລະອື່ນໆໂດຍການຄຸ້ມຄອງທີ່ດິນປ່າສະຫງວນກຳນົດເປັນ 2 ເຂດຄື:ເຂດຫວງຫ້າມເດັດຂາດກວມເອົາ 67% ແລະເຂດຄຸ້ມຄອງການນຳໃຊ້ 33%.

ຂ່າວ: ວຽງສະຫວັນ

ຮູບພາບ: ໜັງສືພິມເສດຖະກິດສັງຄົມ

แชร์