ຕາດຄອນແກ້ວ ແຫຼ່ງທ່ອງທ່ຽວເມືອງຫີນບູນ

  ຄໍາມ່ວນ ເປັນແຂວງໜຶ່ງຊຶ່ງຕັ້ງຢູ່ທາງພາກກາງຂອງລາວທີ່ມີສະຖານທີ່ທ່ອງທ່ຽວຫຼາຍໆ ແຫ່ງທີ່ມີຄວາມສວຍງາມ ແລະເປັນທີ່ໜ້າຄົ້ນຫາ ແລະມີຊື່ສຽງດ້ານການທ່ອງທ່ຽວບໍ່ວ່າຈະເປັນການທ່ອງທ່ຽວທຳມະຊາດປະຫວັດສາດ ແລະວັດທະນະທຳແຕ່ລະເມືອງລ້ວນແຕ່ມີທ່າແຮງໃນດ້ານການທ່ອງທ່ຽວ ແລະໂດດເດັ່ນຂອງແຂວງທີ່ຫຼາກຫຼາຍສຳຄັນຍັງມີສະຖານທີ່ຄອຍໃຫ້ນັກທ່ອງທ່ຽວໄດ້ທ່ຽວຊົມບໍ່ວ່າຈະເປັນທາງທຳມະຊາດ ແລະປະຫວັດສາດອັນເປັນທີ່ນີຍົມຂອງຜູ້ຄົນທາງພາຍໃນ ແລະຕ່າງປະ ເທດ.

   ຕາດຄອນແກ້ວແມ່ນໜຶ່ງໃນບັນດາແຫຼ່ງທ່ອງທ່ຽວທີ່ມີຊື່ສຽງຂອງເມືອງຫີນບູນ ແຂວງຄໍາມ່ວນ ຕັ້ງຢູ່ບ້ານຄອນແກ້ວ, ເມືອງຫີນບູນຫ່າງຈາກຕົວເມືອງ 18 ກິໂລ ແມັດ ເໝາະສຳລັບກິນເຂົ້າປ່າ ແລະຫຼິ້ນນໍ້າທີ່ມີຄວາມມ່ວນຊື່ນນິຍົມຊົມຊອບໃນການລອຍຫຼິ້ນເປັນວັງນໍ້າເລິກ 5 ແມັດ, ຕາດຄອນແກ້ວເປັນສະຖານທີ່ທ່ອງທ່ຽວທາງທຳມະຊາດເມື່ອບັນດາທ່ານໄດ້ໄປສຳພັດຕົວຈິງຈະມີຄວາມຮູ້ສຶກໂລດວ່າເຕັມອີ່ມກັບສະພາບແວດລ້ອມທີ່ສວຍງາມ ແລະມີໂງ້ນຫີນເກາະກ່າຍນັ້ນ, ນໍ້າໃສເຢັນໆໄຫຼຜ່ານຕະຫຼອດໃນຊ່ວງລະດູຝົນ, ອ້ອມສອງຝາກຕາດຈະເຕັມໄປດ້ວຍຕົ້ນໄມ້ໃຫຍ່ນ້ອຍຕັ້ງຢັ້ງຢາຍຢູ່ເປັນແຖວກໍວ່າໄດ້.

  ຕາດຄອນແກ້ວ ຫຼືບ້ານຄອນແກ້ວເອີ້ນຕາມຕຳນານນິທານວ່າ: ໄກ່ແກ້ວຂອງພະຍາມານອນຄອນຢູ່ບໍລິເວນນັ້ນ, ດັ່ງນັ້ນຈະເອີ້ນໃຫ້ຖືກຕາມຕຳນານດັ່ງກ່າວກໍ່ແມ່ນ ວ່າ: ບ້ານຄອນໄກ່ແກ້ວ, ຕາດຄອນແກ້ວນໍ້າຄອນແກ້ວ.

แชร์