ບໍ່ແກ້ວ ຈັດເກັບລາຍຮັບບໍ່ບັນລຸຕາມແຜນ

   ກອງປະຊຸມສະຫຼຸບວຽກງານແຜນການ-ການເງິນປະຈຳປີ 2020 ແລະທິດທາງແຜນການປີ 2021 ໄດ້ຈັດຂຶ້ນໃນເມື່ອອາທິດຜ່ານມາໂດຍການເປັນປະທານຂອງທ່ານບົວຄົງ ນາມມະວົງ ເຈົ້າແຂວງບໍ່ແກ້ວ,ທ່ານ ເຄື່ອນເພັດ ວົງຈັນ ຮອງເຈົ້າແຂວງບໍ່ແກ້ວຜູ້ຊີ້ນຳຂົງເຂດເສດຖະກິດ,ມີຫົວໜ້າພະແນກ, ຮອງພະແນກ,ເຈົ້າເມືອງ, ຮອງເຈົ້າເມືອງ, ຫົວໜ້າຫ້ອງການການເງິນ 5 ເມືອງ ຕະຫຼອດຮອດພະນັກງານຫ້ອງການການເງິນບັນດາພະແນກການເງິນເຂົ້າຮ່ວມ.

  ທ່ານ ສົມດີ ອິນທະວົງ ຮອງຫົວໜ້າພະແນກການເງິນແຂວງໄດ້ສະຫຼຸບ ແລະຍົກໃຫ້ເຫັນຜົນສຳເລັດໃນການຈັດຕັ້ງປະຕິບັດແຜນງົບປະມານແຫ່ງລັດປີ 2020 ໃນ ນັ້ນວຽກງານກວດກາພາສີປະຈຳແຂວງສາມາດຈັດເກັບລາຍຮັບປະຈຳປີ 2020 ຕາມແຜນປີ 18,85 ຕື້ກີບປະຕິບັດໄດ້ 19 ຕື້ກວ່າກີບ ເທົ່າກັບ 101,19% ທຽບໃສ່ໄລຍະດຽວກັນເພີ່ມຂຶ້ນ 25,2%, ການຈັດຕັ້ງປະຕິບັດວຽກງານລາຍຮັບປີ 2020 ຂອງຂະແໜງການເງິນສາມາດສູ້ຊົນເກັບລາຍຮັບສູນກາງ ແລະ ທ້ອງຖິ່ນຕາມແຜນ 357,81 ຕື້ກີບ ປະຕິບັດໄດ້ 332 ຕື້ກວ່າກີບ ເທົ່າກັບ 92,80% ຂອງແຜນການດັດແກ້ທຽບໃສ່ໄລຍະດຽວກັນຂອງປີກ່ອນຫຼຸດລົງ 20,92%, ລາຍຮັບສູນ ກາງດັດແກ້ 231,99 ຕື້ກີບ ປະຕິບັດໄດ້ 205,72 ຕື້ກີບ ເທົ່າກັບ 88,67% ຂອງແຜນການດັດແກ້ທຽບໃສ່ໄລຍະດຽວກັນຫຼຸດລົງ 23,53%, ລາຍຮັບພາສີອາ ກອນ ແລະ ຊັບສິນແຜນດັດແກ້ 229,14 ຕື້ກີບ ປະຕິບັດໄດ້ 202 ຕື້ກວ່າກີບ ເທົ່າກັບ 88,13% ຂອງແຜນການດັດແກ້,ລາຍຮັບທ້ອງຖິ່ນແຜນການດັດແກ້ 125,81 ຕື້ກີບປະຕິບັດໄດ້ 126,31 ຕື້ກີບ ເທົ່າກັບ 100,40%ຂອງແຜນດັດແກ້ທຽບໃສ່ໄລຍະດຽວກັນຫຼຸດລົງ 16,27% ເນື່ອງຈາກວ່າການລະບາດຂອງໂຄວິດ-19 ເຮັດໃຫ້ນັກທຸລະກິດບໍ່ຄອງຕົວ, ບາງຫົວໜ່ວຍກໍ່ໂຈະການບໍລິການ, ການນໍາເຂົ້າສິນຄ້າສົ່ງອອກມີຄວາມຫຍຸ້ງຍາກ, ປະຕິບັດລາຍຈ່າຍທົ່ວແຂວງແຜນດັດແກ້ປີ 2020 ຈຳນວນ 335,36 ຕື້ກີບ ປະຕິບັດໄດ້ 324,77 ຕື້ກີບ ເທົ່າກັບ 96,84% ຂອງແຜນປີທຽບໃສ່ໄລຍະດຽວກັນເພີ່ມຂຶ້ນ 8,02%.

ໂອກາດນີ້ທ່ານເຈົ້າແຂວງບໍ່ແກ້ວໄດ້ມີຄຳເຫັນພົບປະໂອ້ລົມໃຫ້ທິດເຍືອງທາງທ່ານໄດ້ຮຽກຮ້ອງໃຫ້ສອງຂະແໜງການຄື: ສືບຕໍ່ປັບປຸງຖານລາຍຮັບຈາກຂໍ້ມູນທີ່ມີແລ້ວໃຫ້ເຂົ້າສູ່ລະບົບດ້ວຍການຈັດສັນຄືນໃໝ່ກຳນົດໃຫ້ຊັດເຈນໃນການແບ່ງປັນຄຸ້ມຄອງລະຫວ່າງແຂວງກັບເມືອງໃຫ້ລະອຽດ, ຄຸ້ມຄອງການຈັດຕັ້ງວຽກງານຈັດເກັບລາຍຮັບໄປສູ່ລະບົບທີ່ທັນສະໄໝໂດຍການນຳໃຊ້ເຕັກໂນໂລຊີເຂົ້າໃນການຈັດເກັບລາຍຮັບ, ຍົກສູງຄວາມເປັນເຈົ້າການໃນການຄຸ້ມຄອງພັດທະນາ ແລະ ປັບປຸງລະບົບຂໍ້ມູນຂ່າວ ສານການເງິນຂັ້ນແຂວງຂັ້ນເມືອງໃຫ້ມີຄວາມສະດວກວ່ອງໄວ ແລະ ຮັບປະກັນຄວາມປອດໄພ, ການປະຕິບັດລາຍຈ່າຍຕ້ອງປະຕິບັດຕາມກະຊວງແບ່ງປັນ, ມີຄວາມ ເຂັ້ມງວດ, ມາດຕະການຫຼຸດຜ່ອນລາຍຈ່າຍ, ເພີ່ມລາຍຮັບຂອງທຸກຂະແໜງການນັບມື້ສູງຂຶ້ນ, ການຂຶ້ນແຜນງານ, ແຜນວຽກ, ໂຄງການຕ້ອງມີການໄດ້ບຽດບູລິມະ ສິດມີຈຸດສຸມຢ່າງຈະແຈ້ງແນໃສ່ຮັບປະກັນໃນການຂຶ້ນແຜນນຳໃຊ້ງົບປະມານໃຫ້ຖືກຕ້ອງຕາມເປົ້າໝາຍລາຍຈ່າຍຢ່າງມີປະສິດທິພາບສູງ.

แชร์