ນາຍົກ ເນັ້ນໃຫ້ຂະແໜງສາທາສືບຕໍ່ແກ້ໄຂຫຼາຍບັນຫາ

   ກອງປະຊຸມສະຫຼຸບການຈັດຕັ້ງປະຕິບັດວຽກງານສາທາລະນະສຸກທົ່ວປະເທດປະຈຳປີ 2018 ແລະທິດທາງແຜນການສຳລັບປີ 2019 ໄດ້ສຳເລັດລົງໃນວັນທີ 28 ກຸມພານີ້, ທີ່ຫໍປະຊຸມແຫ່ງຊາດ, ໂດຍການເປັນປະທານຂອງທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ, ໃຫ້ກຽດເຂົ້າຮ່ວມຂອງທ່ານ ທອງລຸນ ສີສຸລິດ ນາຍົກລັດຖະມົນຕີ, ມີບັນດາຮອງລັດຖະມົນຕີ, ຮອງເຈົ້າແຂວງ, ຮອງເຈົ້າຄອງນະຄອນຫຼວງ, ຫົວໜ້າກົມ, ຮອງກົມ, ຫົວໜ້າພະແນກຈາກສູນກາງ-ແຂວງເຂົ້າຮ່ວມ.

   ໃນໂອກາດເຂົ້າຮ່ວມກອງປະຊຸມດັ່ງກ່າວ ທ່ານ ທອງລຸນ ສີສຸລິດໄດ້ໃຫ້ກຽດໂອ້ລົມກ່ອນອື່ນທ່ານໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຂະແໜງສາທາລະນະສຸກສາມາດຍາດໄດ້ໃນໄລຍະທີ່ຜ່ານມາ ພ້ອມດຽວກັນນັ້ນໄດ້ເນັ້ນໜັກໃຫ້ຂະແໜງສາທາລະນະສຸກເອົາໃຈໃສ່ປັບປຸງພື້ນຖານໂຄງລ່າງ, ອຸປະກອນການແພດ ແລະການບໍລິການຂອງໂຮງໝໍສູນກາງ, ໂຮງໝໍແຂວງ ແລະສາທາລະນະສຸກຈຳນວນໜຶ່ງໃຫ້ມີຄຸນນະພາບ ແລະທັນສະໃໝຂຶ້ນກວ່າເກົ່າ, ເອົາໃຈໃສ່ປ້ອງກັນ ແລະ ຄວບຄຸມພະຍາດທີ່ຮ້າຍແຮງເຊັ່ນ, ໄຂ້ ຍຸງລາຍ, ຖອກທ້ອງ ແລະອັກເສບລະບົບຫາຍໃຈຮຸນແຮງ ແລະພະຍາດຕິດຕໍ່ອື່ນໆ, ຂະຫຍາຍຕາໜ່າງການບໍລິການສາທາລະນະສຸກຮອດທ້ອງຖິ່ນຮາກຖານຊົນນະບົດ ແລະຫ່າງໄກສອກຫຼີກ, ໄດ້ປະຕິບັດນະໂຍບາຍ 5 ດີ, 1 ພໍໃຈ ( 5 ດີ. ສະດວກດີ, ຮັບຕ້ອນດີ, ສະອາດດີ, ບົ່ງມະຕິດີ, ປິ່ນປົວດີ ແລະ 1 ພໍໃຈຜູ້ມາຮັບບໍລິການພໍໃຈຢ່າງມີປະສິດທິຜົນ, ເຮັດໃຫ້ສາມາດແກ້ໄຂບັນຫາຫາງສຽງສັງຄົມໃຫ້ຫຼຸດລົງ, ເອົາໃຈໃສ່ຈັດຕັ້ງປະຕິບັດຍຸດທະສາດແມ່ ແລະເດັກແບບເຊື່ອມສານ ແລະປະຕິບັດນະໂຍບາຍເກີດລູກ, ປິ່ນ ປົວເດັກນ້ອຍລຸ່ມ 5 ປີບໍ່ເສຍຄ່າເຮັດ ໃຫ້ອັດຕາການຕາຍຂອງແມ່, ເດັກນ້ອຍລຸ່ມ 1 ປີຫຼຸດລົງ, ອັດຕາການນຳໃຊ້ນໍ້າສະອາດເພີ່ມຂຶ້ນ 83,9% ແລະວິດຖ່າຍເພີ່ມຂຶ້ນ 73%, ອັດຕາເດັກຂາດສານອາຫານຊໍາເຮື້ອຫຼຸດລົງຍັງເຫຼືອ 33% ສະຫຼຸບແລ້ວ 10 ຄາດໝາຍທີ່ສະພາແຫ່ງຊາດຮັບຮອງກໍ່ໄດ້ຮັບການເອົາໃຈໃສ່ຈັດຕັ້ງປະຕິບັດເປັນຢ່າງດີ ແລະ ຫຼາຍຄາດໝາຍກໍ່ໄດ້ບັນລຸ, ນີ້ເປັນພຽງສ່ວນໜຶ່ງຂອງຜົນງານທີ່ພວກສະຫາຍຍາດມາໄດ້ ຊຶ່ງພັກ ແລະລັດຖະບານໄດ້ຕີລາຄາສູງຕໍ່ຜົນສຳເລັດດັ່ງກ່າວ, ແຕ່ຍັງມີຫຼາຍບັນຫາທ້າທາຍທີ່ຕ້ອງໄດ້ພ້ອມກັນແກ້ໄຂເປັນຕົ້ນອັດຕາການຕາຍຂອງແມ່ ແລະເດັກນ້ອຍຖືວ່າຫຼຸດລົງຫຼາຍຖ້າສົມທຽບໃສ່ 10 ປີຜ່ານມາ,

   ທ່ານນາຍົກລັດຖະມົນຕີກ່າວຕື່ມອີກວ່າ: ຕ້ອງເອົາໃຈໃສ່ຕື່ມສິ່ງທີ່ຄົງຄ້າງຜ່ານມາເພື່ອພ້ອມກັນແກ້ໄຂ 10 ຕົວຊີ້ວັດທີ່ຍັງເຫັນວ່າເຮັດບໍ່ທັນໄດ້, ສຸຂະພາບເຂັ້ມແຂງແມ່ນຄວາມຕ້ອງການທີ່ທຸກຄົນປາຖະໜາຢາກໄດ້ຢາກມີເໜືອສິ່ງອື່ນໃດ, ສຳລັບການຂະຫຍາຍຕາໜ່າງຂອງຂະແໜງສາທາລະນະສຸກແມ່ນໃຫ້ ເອົາມາດຕະການປ້ອງກັນໄປກ່ອນ ແລະເອົາການປິ່ນປົວຮັກສາໄປນໍາຖືເປັນການຍົກລະດັບຄວາມຮູ້-ຄວາມສາມາດໃຫ້ພະນັກງານແພດໝໍ ເພື່ອເປັນການສ້າງຄົນ, ສ້າງນາຍແພດ, ສ້າງພະຍາບານໃຫ້ດີຂຶ້ນນີ້ແມ່ນຄວາມຈໍາເປັນ, ຢາກປ້ອງກັນໄດ້ອີກອັນໜຶ່ງຕ້ອງອົບຮົມຄວາມຮູ້ໃຫ້ແກ່ປະຊາຊົນໃຫ້ເຂົ້າໃຈເລື່ອງສຸຂະພາບໃຫ້ເລິກເຊິ່ງກວ້າງຂວາງ ນອກຈາກນັ້ນພວກເຮົາຕ້ອງຍາດແຍ່ງ ເອົາຄວາມຮູ້-ບົດຮຽນ, ເອົາການຊ່ວຍເຫຼືອຈາກຕ່າງປະເທດໃຫ້ຫຼາຍ, ຢາກໃຫ້ມີການກວດກາຄືນ 5 ດີເຮົາສາມາດ ເຮັດໄດ້ຈັກຂໍ້ແລ້ວ, ເຮົາຈະປັບປຸງສຸກສາ ລາ, ໂຮງໝໍເມືອງ-ແຂວງເຮົາແນວໃດ ເພື່ອເຮັດໜ້າທີ່ບໍລິການປິ່ນປົວໃຫ້ມັນດີຂຶ້ນ, ສ້າງຈັນຍາບັນ, ຈັນຍາທຳໃຫ້ພະນັກງານແພດໝໍໃຫ້ດີຂຶ້ນ ແລະເປັນ ທີ່ຍອມຮັບຂອງປະຊາຊົນ ໃຫ້ເອົາໃຈໃສ່ ແທ້ເລື່ອງການອົບຮົມຈັນຍາບັນ-ຈັນຍາທຳຂອງພະນັກງານແພດໝໍໃຫ້ດີຂຶ້ນເພື່ອຫຼຸດຜ່ອນການໄປປິ່ນປົວຢູ່ຕ່າງປະເທດ, ກວດກາຄືນການປິ່ນປົວໂດຍບໍ່ເສຍຄ່າບັນດາໂຮງໝໍລັດ, ພ້ອມນັ້ນສືບຕໍ່ສ້າງໃຫ້ຕົນເອງກຸ້ມຕົນເອງເພີ່ງຕົນເອງເທື່ອລະກ້າວເພື່ອບັນລຸເປົ້າໝາຍທີ່ວາງໄວ້.

 

ນສພ ເສດຖະກິດສັງຄົມ

 

แชร์