ໂຄງການອະນຸລັກລະບົບນິເວດປ່າໂຄກ ໂອງ-ມັ່ງ ສະຫຼຸບວຽກງານຜ່ານມາ

ກອງປະຊຸມສະຫຼຸບການຈັດຕັ້ງປະຕິບັດກິດຈະກຳຂອງໂຄງການຄຸ້ມຄອງທີ່ດິນ ແລະປ່າໄມ້ແບບຍືນຍົງຢູ່ໃນລະບົບນິເວດປ່າໂຄກພາກໃຕ້ ສປປ ລາວ ປີ 2020 ແລະວາງທິດທາງແຜນການປີ 2021 ມີຂຶ້ນໃນວັນທີ 11 ກຸມພາ 2021 ທີ່ສະໂມສອນເມືອງຊົນນະບູລີ ແຂວງສະຫວັນນະເຂດ, ໂດຍການເປັນປະທານຮ່ວມຂອງ ທ່ານ ວຽງ ທະວີສອນ ເທບພະຈັນ ຮອງເຈົ້າແຂວງສະຫວັນນະເຂດທັງເປັນປະທານຊີ້ນຳໂຄງການຂັ້ນແຂວງ, ທ່ານ ທອງພັດ ວົງມະນີ ຮອງລັດຖະມົນຕີກະຊວງກະສິກຳ ແລະປ່າ ໄມ້ ແລະທ່ານ ນາງ ແຄັດເທີຣີນ ເຟືອງ ຮອງຫົວໜ້າອົງການສະຫະປະຊາຊາດເພື່ອການພັດທະນາປະຈຳ ສປປ ລາວ, ມີບັນດາຫົວໜ້າ-ຮອງຫົວໜ້າຫ້ອງການກະ ຊວງ, ຫົວໜ້າກົມ-ຮອງກົມ, ຫົວໜ້າ-ຮອງຫົວໜ້າພະແນກການອ້ອມຂ້າງແຂວງ, ເຈົ້າເມືອງ-ຮອງເຈົ້າເມືອງ 5 ເມືອງເຂດໂຄງການ, ຄະນະຫ້ອງການອ້ອມຂ້າງເມືອງ ແລະອົງການສະຫະປະຊາຊາດເພື່ອການພັດທະນາປະຈຳລາວເຂົ້າຮ່ວມ.

  ທ່ານ ວຽງທະວີສອນ ເທບພະຈັນ ຮອງເຈົ້າແຂວງສະຫວັນນະເຂດຍົກໃຫ້ເຫັນວ່າ: ໂຄງການຄຸ້ມຄອງທີ່ດິນ ແລະປ່າໄມ້ແບບຍືນຍົງຢູ່ໃນລະບົບນິເວດປ່າໂຄກພາກໃຕ້ ສປປ ລາວ ໄດ້ຮັບທຶນຈາກກອງທຶນສິ່ງແວດລ້ອມໂລກ ແລະອົງການສະຫະປະຊາຊາດເພື່ອການພັດທະນາ (UNDP), ຈຸດປະສົງເພື່ອສາທິດການຄຸ້ມຄອງທີ່ດິນ ແລະ ປ່າໄມ້ແບບຍືນຍົງໃນຂອບເຂດພື້ນທີ່ຂອງແຂວງສະຫວັນນະເຂດແນໃສ່ຮັກສາຖິ່ນທີ່ຢູ່ອາໄສຂອງສັດປ່າທີ່ສຳຄັນ ແລະສ້າງຄວາມເຂັ້ມແຂງໃນການຄຸ້ມຄອງຊັບພະຍາກອນທຳມະຊາດພ້ອມກັບການພັດທະນາການທ່ອງທ່ຽວເພື່ອສ້າງລາຍຮັບແກ່ທ້ອງຖິ່ນ ແລະການປັບປຸງຊີວິດການເປັນຢູ່ຂອງປະຊາຊົນບັນດາເຜົ່າ; ມີໄລຍະຈັດຕັ້ງປະຕິບັດ 6 ປີ, ເລີ່ມແຕ່ປີ 2016 ຫາ 2022, ຜ່ານການຈັດຕັ້ງປະ ບັດເຫັນວ່າມີຫຼາຍກິດຈະກຳທີ່ໄດ້ຮັບຜົນສໍາເລັດແຕ່ກໍປາສະຈາກບໍ່ໄດ້ເຖິງຂໍ້ຄົງຄ້າງທີ່ຕ້ອງໄດ້ນຳມາປຶກສາຫາລືເພື່ອວາງທິດທາງແຜນການແກ້ໄຂໃນສົກປີ 2021, ເຂດປ່າໂຄກອະນຸລັກໂອງ-ມັ່ງ ແມ່ນເປັນແຫ່ງໜຶ່ງແຫ່ງດຽວໃນ ສປປ ລາວ ທີ່ຍັງມີຄວາມອຸດົມສົມບູນໄປດ້ວຍຊັບພະຍາກອນທຳມະຊາດຊີວະນາໆພັນແລະໃນນັ້ນຍັງເປັນບ່ອນຢູ່ອາໄສຂອງສັດປ່າທີ່ໃກ້ຈະສູນຫາຍໄປຈາກປະເທດລາວ.

   ໂຄງການຄຸ້ມຄອງທີ່ດິນ ແລະປ່າໄມ້ແບບຍືນຍົງຢູ່ໃນລະບົບນິເວດປ່າໂຄກພາກໃຕ້ ສປປ ລາວ ໄດ້ກວມເອົາໃນ 5 ເມືອງເປົ້າໝາຍຄື: ເມືອງຊົນນະບູລີ, ທ່າປາງທອງ, ສອງຄອນ,ພະລານໄຊແລ ເມືອງພີນ; ໃນປີ 2020 ໄດ້ສຳເລັດການຈັດກອງປະຊຸມປຶກສາຫາລືຮ່ວມກັບ 5 ເມືອງເປົ້າໝາຍເພື່ອວາງແຜນສ້າງບັນຊີສົ່ງເສີມການລົງ ທຶນແບບເປັນມິດຕໍ່ສິ່ງແວດລ້ອມໃນເຂດອ້ອມຮອບເຂດອະນຸລັກປ່າໂຄກ ໂອງ-ມັ່ງ ແຫ່ງຊາດ, ກອງປະຊຸມປຶກສາຫາລືກ່ຽວກັບລະບົບສະໜັບສະໜູນການເຊື່ອມສານ ແລະການວິເຄາະຂໍ້ມູນ-ຂ່າວສານ ເພື່ອ ເປັນບ່ອນອີງໃຫ້ແກ່ການວາງແຜນ ແລະການຕັດສິນບັນຫາ ເພື່ອເລືອກ ເຟັ້ນເອົາຂົງເຂດບູລິມະສິດທາງດ້ານການພັດທະນາ, ວຽກກວດກາລາດຕະເວນ ແລະວຽກງານຟື້ນຟູປ່າ ແລະກ້າເບ້ຍ ຊຶ່ງໄດ້ກວດກາລາດຕະເວນຮ່ວມກັບກຸ່ມອະນຸລັກຂັ້ນບ້ານ 16 ບ້ານ ເປົ້າໝາຍໃນ 5 ເມືອງ, ມີການໂຄສະນາເຜີຍແຜ່ລະບຽບການ ແລະຫຼັກການຕ່າງໆໃຫ້ປະຊາຊົນໄດ້ຮັບຮູ້ເຊື່ອມຊຶມ, ເກັບກຳຂໍ້ມູນເນື້ອທີ່ປູກປ່າ, ສຳເລັດການປຶກສາຫາລືວຽກງານທ່ອງທ່ຽວ 4 ຄັ້ງ, ຝຶກອົບຮົມພະ ນັກງານນຳທ່ຽວ, ພາຍໃນປີ 2020 ເລີ່ມແຕ່ເດືອນມິຖຸນາຈົນຮອດປະ ຈຸບັນມີນັກທ່ອງທ່ຽວ, ອົງການ ຈັດຕັ້ງຕ່າງໆເຂົ້າໄປໃຊ້ບໍລິການໃນເຂດອະນຸລັກປ່າໂຄກໂອງ-ມັ່ງ ແຫ່ງຊາດ ແລະເຂົ້າໄປທ່ຽວໃນເຂດ ດັ່ງກ່າວຈຳນວນ 685 ເທື່ອຄົນ, ໃນນັ້ນມີແຂກທີ່ເຂົ້າມາຮ່ວມໃນພິທີປະກາດເຂດອະນຸລັກປ່າໂຄກໂອງ-ມັ່ງຂຶ້ນເປັນລະດັບຊາດຈຳນວນ 460 ເທື່ອຄົນ, ນອກນັ້ນມີແຂກເຂົ້າໄປທ່ຽວ ແລະພະນັກງານວິຊາການທາງພາກລັດລົງໄປປະຕິບັດວຽກງານທີ່ມີການໃຊ້ຈ່າຍໃນສູນປ່າໂຄກ ຊຶ່ງເປັນລາຍຮັບທັງໝົດປະມານ 41 ລ້ານກວ່າກີບ, ພ້ອມນັ້ນກໍມີຫຼາຍໜ້າວຽກທີ່ໄດ້ຮັບຜົນສຳເລັດຕາມຄາດໝາຍ.

  ຂ່າວແຈ້ງຕື່ມວ່າ: ໃນຕອນເຊົ້າຂອງວັນດຽວກັນກໍ່ໄດ້ມີພິທີມອບ-ຮັບຮູບປັ້ນໂອງ-ມັ່ງ ຢູ່ບໍລິເວນວົງວຽນໃນເທສະບານເມືອງຊົນນະບູລີ, ຊຶ່ງໂຄງການນີ້ໄດ້ເກີດຂຶ້ນພາຍ ໃຕ້ການຮ່ວມມືລະຫວ່າງອຳນາດການປົກຄອງແຂວງສະຫວັນນະເຂດ ແລະ ອົງການສະຫະປະຊາຊາດເພື່ອການພັດທະນາ, ໂຄງການໄດ້ເລີ່ມກໍ່ສ້າງແຕ່ວັນທີ 7 ກັນ ຍາ 2020 ແລະມາຮອດປະຈຸບັນແມ່ນໄດ້ສຳເລັດ 100% ໂດຍບໍລິສັດນວນຕາກໍ່ສ້າງເຄຫະສະຖານເປັນຜູ້ຮັບເໝົາກໍ່ສ້າງໃນມູນຄ່າ 451 ລ້ານກວ່າກີບ.

ສະໜັບສະໜູນໂດຍ: HONDA

ຂ່າວ: ສະຫວັນ

แชร์