ຄໍາມ່ວນປະເມີນຜົນວຽກງານສາມສ້າງ

 ເພື່ອເປັນການຕີລາຄາຄືນກ່ຽວກັບການຈັດຕັ້ງປະຕິບັດວຽກງານປະເມີນຜົນສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະສ້າງບ້ານເປັນຫົວໜ່ວຍພັດທະນາ (3 ສ້າງ) ກໍ່ຄືຕາມມະຕິຄໍາສັ່ງເລກທີ 03 ຂອງກົມການເມືອງສູນກາງພັກໄດ້ວາງອອກ, ດັ່ງນັ້ນໃນວັນທີ 18 ກຸມພາ 2021 ແຂວງຄໍາມ່ວນໄດ້ຈັດກອງປະຊຸມປະເມີນຜົນວຽກງານສາມສ້າງຂຶ້ນຢູ່ທີ່ຫ້ອງວ່າການແຂວງໂດຍການເປັນປະທານຂອງທ່ານ ວົງເພັດ ຈິດປັນຍາ ຮອງເລຂາພັກແຂວງ, ເຂົ້າຮ່ວມມີບັນດາທ່ານເຈົ້າເມືອງຈາກ 10 ຕົວເມືອງພາຍໃນແຂວງ, ຫົວໜ້າ, ຮອງຫົວໜ້າພະແນກການຕະຫຼອດເຖິງພະນັກງານວິຊາການເຂົ້າຮ່ວມ .

 ໃນພິທີທ່ານ ວົງເພັດ ຈິດປັນຍາ ຮອງເລຂາພັກແຂວງໄດ້ກ່າວໄຂກອງປະຊຸມຢ່າງເປັນທາງການພ້ອມທັງມີຄໍາຖາມເຈາະຈີ້ມເພື່ອເປັນທິດໃນການຄົ້ນຄວ້າປະກອບຄໍາຄິດເຫັນໃນກອງປະຊຸມ, ຈາກນັ້ນ ທ່ານ ແກ້ວວິໄລ ໄຊຍະບຸດ ຫົວໜ້າພະແນກພາຍໃນແຂວງຄໍາມ່ວນໄດ້ຜ່ານຮ່າງບົດລາຍງານໂດຍຫຍໍ້ກ່ຽວກັບການຈັດຕັ້ງປະຕິບັດວຽກ ງານປະເມີນຜົນສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະສ້າງບ້ານເປັນຫົວໜ່ວຍພັດທະນາຊຶ່ງທ່ານໄດ້ກ່າວວ່າ: ພາຍຫຼັງສໍາເລັດການເຮັດທົດລອງວຽກງານສາມສ້າງແຂວງຄໍາມ່ວນໄດ້ສືບຕໍ່ຜັນຂະຫຍາຍ-ຈັດຕັ້ງປະຕິບັດໃຫ້ເລິກເຊິ່ງກວ້າງຂວາງ, ຫັນລົງສູ່ 10 ຕົວເມືອງ ແລະທຸກບ້ານໃນທົ່ວແຂວງເພື່ອສ້າງໃຫ້ເມືອງມີຄວາມເຂັ້ມແຂງຮອບດ້ານ ແລະສ້າງບ້ານເປັນຫົວໜ່ວຍພັດທະນາ, ແຂວງໄດ້ອອກຂໍ້ຕົກ ລົງເລກທີ 1776 /ຈຂ.ຄມ, ລົງວັນທີ 31 ສິງຫາ 2017 ວ່າດ້ວຍການສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະສ້າງບ້ານເປັນຫົວໜ່ວຍພັດທະນາ, ໂດຍທົ່ວໄປແລ້ວໄດ້ກໍານົດເອົາ 10 ຕົວເມືອງສ້າງເປັນເມືອງເຂັ້ມແຂງຮອບດ້ານ,ໃນນັ້ນໄດ້ສຸມໃສ່ສ້າງເມືອງໃຫ້ຄົບຕາມເນື້ອໃນ 5 ດ້ານ ຊຶ່ງມີ 3 ເມືອງຄື: ເມືອງທ່າແຂກ, ເມືອງໜອງບົກ ແລະເມືອງຄູນຄໍາ, ສ້າງບ້ານເປັນຫົວໜ່ວຍພັດທະນາໃຫ້ໄດ້ທັງໝົດ 569 ບ້ານ ແລະສ້າງໃຫ້ໄດ້ບ້ານແບບຢ່າງຕາມເນື້ອໃນ 4 ດ້ານມີ 57 ບ້ານ ຊຶ່ງຕິດພັນກັບຂະບວນການແຂ່ງຂັນ “ຮັກຊາດ ແລະ ພັດທະນາ” ໂດຍມີການຊີ້ນໍາບັນຊາຢ່າງເປັນລະບົບຕໍ່ເນື່ອງຈາກຂັ້ນແຂວງລົງຮອດຂັ້ນເມືອງ ແລະ ບ້ານ, ຖືເປັນວຽກປົກ ກະຕິຂອງພະແນກການ, ອົງການທຽບເທົ່າພະແນກ, ເມືອງ, ຮາກຖານບ້ານຊຶ່ງສາມາດຕີລາຄາຜົນໄດ້ຮັບໃນແຕ່ລະດ້ານເຊັ່ນ: ຜົນໄດ້ຮັບປະເມີນແຂວງເປັນຫົວໜ່ວຍຍຸດທະສາດນັບແຕ່ປີ 2016 -2020 ເຫັນວ່າພະແນກການ, ອົງການທຽບເທົ່າພະແນກໄດ້ປະເມີນຜົນຕໍ່ການຈັດຕັ້ງຜັນຂະຫຍາຍວຽກງານສາມສ້າງຕາມມາດຖານເງື່ອນໄຂ, ສ້າງແຂວງເປັນຫົວໜ່ວຍຍຸດທະສາດໃນ 7 ດ້ານ ມີ 66 ຕົວຊີ້ບອກ, ການປະເມີນຕົວຈິງໃນມາດຖານທີ 1–6 ແມ່ນບໍ່ບັນລຸ, ສ່ວນມາດຖານເງື່ອນໄຂບັນລຸ 80% ຂຶ້ນໄປມີ 1 ດ້ານຄື: ດ້ານທີ 7 ກວດເອົາ 85%ຖືວ່າບັນລຸຕາມເງື່ອນໄຂໃນການສ້າງແຂວງເປັນຫົວໜ່ວຍຍຸດທະສາດ 7 ດ້ານ,ສໍາລັບດ້ານທີ່ບໍ່ບັນລຸມີ 6 ດ້ານຕ້ອງໄດ້ສືບຕໍ່ຈັດຕັ້ງປະຕິບັດໃນຂັ້ນຕໍ່ໄປ .

   ຜົນໄດ້ຮັບປະເມີນຂັ້ນເມືອງທັງ 5 ດ້ານ ຈໍານວນ 47 ຕົວຊີ້ບອກ, ໃນນີ້ດ້ານທີ 1 ມີຈໍານວນ 8 ຕົວ ຊີ້ບອກສາມາດບັນລຸ 80% ຂຶ້ນໄປມີ 3 ເມືອງ, ບໍ່ບັນລຸມີ 7 ເມືອງ;ດ້ານທີ 2 ມີຈໍານວນ 4 ຕົວຊີ້ບອກສາມາດບັນລຸ 80% ຂຶ້ນໄປມີ1 ເມືອງ,ບໍ່ບັນລຸມີ 9 ເມືອງ; ດ້ານທີ 3 ມີຈໍານວນ 18 ຕົວຊີ້ບອກສາມາດບັນລຸ 80% ຂຶ້ນໄປມີ 2 ເມືອງ, ບໍ່ບັນລຸມີ 8 ເມືອງ; ດ້ານ ທີ 4 ມີຈໍານວນ 11 ຕົວຊີ້ບອກສາມາດບັນລຸ 80% ຂຶ້ນໄປມີ 5 ເມືອງ, ບໍ່ບັນລຸມີ 5 ເມືອງ; ດ້ານທີ 5 ມີຈໍານວນ 6 ຕົວຊີ້ບອກສາມາດບັນລຸ 80% ຂຶ້ນໄປມີ 2 ເມືອງ, ບໍ່ບັນລຸມີ 8 ເມືອງ, ສັງລວມຜົນການປະເມີນການສ້າງເມືອງເປັນຫົວໜ່ວຍເຂັ້ມແຂງຮອບດ້ານຕາມທິດນໍາສ້າງແມ່ນສາມາດສ້າງເປັນເມືອງເຂັ້ມແຂງຮອບດ້ານ 3 ເມືອງຄື: ທ່າແຂກ, ໜອງບົກ ແລະຄູນຄໍາ(ສໍາລັບລາຍຮັບແມ່ນບໍ່ສາມາດກຸ້ມລາຍຈ່າຍ ) ແຕ່ໃນມາດຖານອື່ນໆຖືວ່າບັນລຸ 80% ຂຶ້ນໄປໃນ 5 ດ້ານ ແລະ 47 ຕົວຊີ້ບອກ, ສ່ວນວ່າ 7 ເມືອງຄື: ເຊບັ້ງໄຟ, ມະຫາໄຊ, ຍົມມະລາດ, ໄຊບົວທອງ, ນາກາຍ, ບົວລະພາ ແລະຫີນບູນແມ່ນບໍ່ສາ ມາດສ້າງເປັນເມືອງເຂັ້ມແຂງຮອບດ້ານໄດ້ຍ້ອນວ່າບໍ່ບັນລຸຕາມເງື່ອນໄຂໃນ 5 ດ້ານ ແລະ 47 ຕົວຊີ້ບອກ (ສາເຫດຍ້ອນມີບາງດ້ານຕົວຊີ້ບອກມາດຕະຖານສູງ).

  ສໍາລັບຂັ້ນບ້ານການປະເມີນບ້ານໃນ 569 ບ້ານ ສາມາດສ້າງເປັນບ້ານຫົວໜ່ວຍພັດທະນາໄດ້ມີຈໍານວນ 261 ບ້ານເທົ່າກັບ 45,8% ຍັງບໍ່ບັນລຸ 308 ບ້ານ ເທົ່າ ກັບ 54,3% (ຈໍານວນ 10 ເມືອງຄື: ທ່າແຂກ 51 ບ້ານ, ໜອງບົກ 53 ບ້ານ, ເຊັ້ງໄຟ24 ບ້ານ, ຫີນບູນ 78 ບ້ານ,ມະຫາໄຊ 6 ບ້ານ, ໄຊບົວທອງ 21 ບ້ານ, ນາກາຍ 9 ບ້ານ, ບົວລະພາ 7 ບ້ານ ແລະຄຸນຄໍາ 22 ບ້ານ), ສໍາລັບເມືອງຍົມມະລາດ (ບໍ່ໄດ້ປະເມີນ).

  ທ່ານ ແກ້ວວິໄລ ໄຊຍະບຸດ ຫົວໜ້າພະແນກພາຍໃນແຂວງຍັງໄດ້ຍົກໃຫ້ເຫັນເຖິງສາເຫດທີ່ພາໃຫ້ບໍ່ບັນລຸຕະຫຼອດເຖິງຂໍ້ຄົງຄ້າງ, ບົດຮຽນທີ່ຖອດຖອນໄດ້,ວິທີແກ້ໄຂ ແລະມາດຕະການຈັດຕັ້ງປະຕິບັດໃນຕໍ່ໜ້າ,ນອກຈາກນັ້ນບັນດາທ່ານເຈົ້າເມືອງ ແລະບັນດາຫົວໜ້າພະແນກການອ້ອມຂ້າງແຂວງກໍ່ໄດ້ຜັດປ່ຽນກັນປະກອບຄໍາຄິດເຫັນເພື່ອເປັນການປັບປຸງຮ່າງບົດປະເມີນຜົນໃຫ້ມີຄວາມຖືກຕ້ອງ, ສອດຄ່ອງກັບສະພາບຄວາມເປັນຈິງ.

ຂ່າວ: ແດງສະຫວັດ  

แชร์