ກອງປະຊຸມໜ່ວຍງານວິຊາການວ່າດ້ວຍການຊ່ວຍເຫຼືອສຸກເສີນ

  ໃນວັນທີ 18 ກຸມພາ 2021 ທີ່ກະຊວງການຕ່າງປະເທດ, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ, ຫົວໜ້າເຈົ້າໜ້າທີ່ອາວຸໂສອາຊຽນແຫ່ງ ສປປ ລາວ ໄດ້ນໍາພາຄະນະຜູ້ແທນ ແຫ່ງ ສປປ ລາວ ເຂົ້າຮ່ວມກອງປະຊຸມໜ່ວຍງານວິຊາການສະພາປະສານງານອາຊຽນວ່າດ້ວຍການຊ່ວຍເຫຼືອສຸກ ເສີນດ້ານສາທາລະນະສຸກ ຄັ້ງທີ 6 ແບບທາງໄກ (6thMeeting of ASEAN Coordinating Council Working Group on Public Health Emergencies) ພາຍໃຕ້ການເປັນປະທານຂອງບຣູໄນໂດຍມີບັນດາເຈົ້າໜ້າທີ່ອາວຸໂສອາຊຽນ, ບັນດາເຈົ້າໜ້າທີ່ອາວຸໂສອາຊຽນເສົາຄໍ້າອື່ນທີ່ກ່ຽວຂ້ອງ (ວັດທະນະທໍາ-ສັງຄົມ, ເສດຖະກິດ, ສາທາລະນະສຸກ ແລະຂົນສົ່ງ); ຄະນະກໍາມະການຜູ້ຕາງໜ້າຖາວອນປະຈໍາອາຊຽນ, ບັນດາຫົວໜ້າກົມຮັບຜິດຊອບວຽກເຂົ້າ-ອອກເມືອງ ແລະກົງສູນ, ອົງການທ່ອງທ່ຽວແຫ່ງຊາດອາຊຽນ ແລະກອງເລຂາອາຊຽນເຂົ້າຮ່ວມ.

  ກອງປະຊຸມຄັ້ງນີ້ໄດ້ຕີລາຄາສູງຕໍ່ຜົນການຈັດຕັ້ງປະຕິບັດບັນດາໜ້າວຽກໃນການຮັບມື ແລະ ແກ້ໄຂການແຜ່ລະບາດຂອງພະຍາດໂຄວິດ-19 ໂດຍສະເພາະການຜັນຂະ ຫຍາຍຜົນກອງປະຊຸມສຸດຍອດອາຊຽນ ຄັ້ງທີ 37 ໃນເດືອນພະຈິກ 2020 ແລະກອງປະຊຸມວົງແຄບລັດຖະມົນຕີຕ່າງປະເທດອາ ຊຽນ ຄັ້ງວັນທີ 21 ມັງກອນ 2021 ຜ່ານມາ, ໃນນີ້ກອງປະຊຸມໄດ້ເຫັນດີຮັບຮອງເອົາການສ້າງຕັ້ງໜ່ວຍງານປະຈໍາກອງເລຂາອາຊຽນເພື່ອຕິດຕາມການຈັດຕັ້ງປະຕິບັດແຜນຟື້ນຟູຮອບດ້ານຂອງອາຊຽນ; ເຫັນດີເອົາງົບປະມານຈໍານວນ 10,5 ລ້ານໂດລາສະຫະລັດ ຈາກກອງທຶນອາຊຽນເພື່ອຮັບມືກັບພະຍາດໂຄວິດ-19 ເພື່ອຈັດຊື້ວັກແຊງຕ້ານພະຍາດໂຄວິດ-19 ໃຫ້ປະ ຊາຊົນອາຊຽນ (ໃນນີ້, 10  ລ້ານໂດລາສະຫະລັດແບ່ງປັນແຕ່ລະປະເທດສະມາຊິກອາຊຽນລວມທັງ ສປປ ລາວ ເທົ່າທຽມກັນປະເທດລະ 1 ລ້ານໂດລາ ແລະ 5 ແສນໂດລາສະຫະລັດສໍາລັບພະນັກງານກອງເລຂາອາຊຽນທີ່ຈາກາກຕາ) ແລະເຫັນດີສ້າງຕັ້ງໜ່ວຍງານສະເພາະກິດເພື່ອຮ່າງຂອບຂໍ້ຕົກລົງໃນການສ້າງແລວການເດີນທາງໃນອາຊຽນພ້ອມທັງໃຫ້ສືບຕໍ່ປຶກສາຫາລືຮ່າງພາລະບົດບາດຂອງໜ່ວຍງານດັ່ງກ່າວ, ພ້ອມນີ້, ກອງປະຊຸມຍັງໄດ້ຊຸກຍູ້ໃຫ້ເລັ່ງລັດສ້າງຄັງແຮຢາປົວພະຍາດ ແລະອຸປະກອນການແພດສໍາລັບພາວະສຸກເສີນດ້ານສາທາລະນະສຸກພາກພື້ນອາຊຽນໃຫ້ສໍາເລັດໂດຍໄວ ແລະໄດ້ເຫັນດີທາງດ້ານຫຼັກການໃນການສະເໜີສ້າງຄັງແຮຢາປົວພະຍາດ ແລະອຸປະກອນການແພດສໍາລັບພາວະສຸກເສີນດ້ານສາທາລະນະສຸກອາຊຽນບວກສາມໂດຍໃຫ້ສືບຕໍ່ປຶກສາຫາລືໃນລາຍລະອຽດຕື່ມ.

  ພິເສດ, ກອງປະຊຸມກໍໄດ້ປຶກສາຫາລື ແລະແລກປ່ຽນຄໍາຄິດເຫັນກ່ຽວກັບການຄັດເລືອກປະເທດເຈົ້າພາບ (host country) ຂອງສູນສາທາລະນະສຸກສຸກເສີນ ແລະພະຍາດລະບາດພາກພື້ນອາຊຽນ, ຊຶ່ງໄດ້ມອບໃຫ້ບັນດາເຈົ້າໜ້າທີ່ອາວຸໂສສາທາລະນະສຸກອາຊຽນສືບຕໍ່ປຶກສາຫາລືກັນໃນການຄັດເລືອກດັ່ງກ່າວ.

  ຜົນຂອງການປຶກສາຫາລືຄັ້ງນີ້ຈະນໍາສະເໜີລາຍງານຕໍ່ກອງປະຊຸມສະພາປະສານງານອາຊຽນຄັ້ງທີ 29(29th ASEAN Co ordinating Council Meet ing) ໃນເດືອນສິງຫາ 2021 ເພື່ອມີທິດຊີ້ນໍາຕໍ່ໄປ.

แชร์