ໃຊ້ເຮືອນມົ້ວສຸມຢາບ້າຖືກຈັບດຳເນີນຄະດີ

  ເວລາ 11 ໂມງ ຂອງວັນທີ 10 ກຸມພາ 2021, ເຈົ້າໜ້າທີ່ ປກສ ເມືອງບໍລິຄັນ ແຂວງບໍລິຄຳໄຊ ໄດ້ຮັບແຈ້ງຄວາມຈາກພົນລະເມືອງດີວ່າ: ມີການມົ້ວສຸມຄ້າ-ຂາຍຢາເສບຕິດ (ຢາບ້າ) ຢູ່ເຮືອນຫຼັງໜຶ່ງທີ່ບ້ານວັດທາດ ເມືອງບໍລິຄັນ ແຂວງບໍລິຄຳໄຊ, ດັ່ງນັ້ນທາງເຈົ້າໜ້າທີ່ວິຊາສະເພາະຈຶ່ງໄດ້ຕິດຕາມເປົ້າໝາຍເຫັນວ່າມີມູນຄວາມຈິງຈຶ່ງໄດ້ຈັດວາງກໍາລັງເຂົ້າກັກຕົວຜູ້ຖືກຫາໄດ້ 2 ຄົນຄື: ທ້າວ ເພ້ຍວ່າງ, ອາຍຸ 30 ປີ,ເຈົ້າຂອງເຮືອນ ແລະ ທ້າວ ອາຕົງ ອາຍຸ 43 ປີ, ປະຊາຊົນບ້ານ, ນາຍາງ, ເມືອງວຽງທອງແຂວງບໍລິຄຳໄຊພ້ອມດ້ວຍຂອງກາງຢາບ້າຈຳນວນ 49 ເມັດ.

  ຜ່ານການສຶບສວນ-ສອບສວນຂອງເຈົ້າໜ້າທີ່ວິຊາສະເພາະທ້າວ ເພ້ຍວ່າງ ໄດ້ໃຫ້ການຕໍ່ເຈົ້າໜ້າທີ່ວ່າຜູ້ກ່ຽວເລີ່ມພົວພັນຄ້າຂາຍຢາເສບຕິດມາແຕ່ເດືອນມັງກອນ ປີ 2020, ຢາບ້າທີ່ນຳມາຂາຍທຸກຄັ້ງແມ່ນເອົາມາຈາກທ້າວ ອາຕົງ ປະຊາຊົນບ້ານນາຍາງເມືອງວຽງທອງນຳມາສົ່ງໃຫ້ຈຳນວນ 8 ຄັ້ງ,ຄັ້ງລະ 1 ຖົງ ໃນລາຄາ 6 ແສນກີບ, ແລ້ວຜູ້ກ່ຽວກໍ່ເອົາມາຂາຍໃຫ້ໄວໜຸ່ມຢູ່ບ້ານວັດທາດ ເມືອງບໍລິຄັນ ໃນລາຄາ 2 ເມັດຕໍ່ 15 ພັນກີບ, ໃນການ ຊື້ຂາຍແຕ່ລະຄັ້ງແມ່ນຜູ້ກ່ຽວຈະໂທນັດ ທ້າວ ອາຕົງ ມາສົ່ງໃຫ້ຢູ່ເຮືອນຂອງນ້ອງຊາຍຜູ້ກ່ຽວຢູ່ບ້ານວັດທາດເມືອງບໍລິຄັນ, ມາຮອດເດືອນມັງກອນປີ 2021  ຕົນຍັງໄດ້ໄປຊື້ຢາບ້ານຳທ້າວ ກໍ(ນາມ ສົມມຸດ) ປະຊາຊົນບ້ານສີສະຫວາດ ເມືອງບໍລິຄັນ ຈຳນວນ 4 ຄັ້ງ, ຄັ້ງລະ 100 ເມັດ, ເປັນຈຳນວນ 3 ແສນກີບ, ເມື່ອໄດ້ຢາບ້າມາແລ້ວກໍ່ນຳມາຂາຍໃຫ້ ໄວໜຸ່ມພາຍໃນບ້ານໃນລາຄາ 2 ເມັດຕໍ່ 15 ພັນກີບ, ຕົກມາຮອດວັນທີ 9 ກຸມພາ 2021 ຕົນໄດ້ໂທລະສັບຫາທ້າວ ອາຕົງ ເພື່ອນໍາເອົາຢາບ້າມາສົ່ງໃຫ້ຈໍານວນ 100 ເມັດ, ໃນລາຄາ 3 ແສນກີບ, ແຕ່ມີຕົກລົງກັນວ່າ: ຖ້າຂາຍຢາບ້າໝົດແລ້ວຈຶ່ງເອົາເງິນພາຍຫຼັງ,ວັນທີ 10 ກຸມພາ 2021 ທ້າວ ເພ້ຍວ່າງ ໄດ້ໂທລະສັບຫາ ທ້າວ ອາຕົງ ເອົາຢາບ້າມາສົ່ງໃຫ້ອີກຈຳນວນ 200 ເມັດໃນລາຄາ 6 ແສນກີບ, ແຕ່ຂໍຈ່າຍເງິນກ່ອນໃນຈຳນວນ 2 ແສນກີບ, ສ່ວນເງິນທີ່ຍັງ ເຫຼືອຈໍານວນ 4 ແສນກີບ ແມ່ນຂາຍຢາບ້າໝົດແລ້ວຈຶ່ງຈະຈ່າຍໃຫ້, ພາຍຫຼັງໄດ້ຢາບ້າມາແລ້ວທ້າວ ເພ້ຍວ່າງ ກໍ່ໄດ້ຂາຍຢາໃຫ້ທ້າວ ຂໍ (ໃນນາມສົມມຸດ ) ປະຊາຊົນບ້ານຫາດຢື້ນ ຈຳນວນ 200 ເມັດ ໃນລາຄາ 6,5 ແສນກີບ, ເມື່ອຂາຍຢາບ້າໃຫ້ທ້າວ ຂໍ ແລ້ວທ້າວ ເພ້ຍ ວ່າງ ກໍ່ຊວນທ້າວ ອາຕົງ ຫຼິ້ນໄພ້ຢູ່ຕູບນ້ອຍຂ້າງເຮືອນ, ບໍ່ດົນກໍ່ມີເຈົ້າໜ້າທີ່ຕຳຫຼວດເຂົ້າມາກັກຕົວຕົນເອງ ແລະທ້າວ ອາຕົງ ພ້ອມຂອງກາງຢາບ້າຈຳນວນ 49 ເມັດ.

 ຈາກນັ້ນທາງເຈົ້າໜ້າທີ່ວິຊາສະເພາະກໍ່ໄດ້ທຳການສືບສວນ-ສອບສວນຂະຫຍາຍຜົນຫາພັກພວກກຸ່ມແກ້ງຮ່ວມຂະບວນການດຽວກັນຊຶ່ງທ້າວ ອາຕົງ ໄດ້ຮັບສາລະພາບອີກວ່າ: ຕົນກັບເມຍ ຊື່ນາງ ເຕີມົວ ໄດ້ມາເຊົ່າຫ້ອງພັກຢູ່ເຮືອນພັກແຫ່ງໜຶ່ງຂອງບ້ານສີສະຫວາດ ເມືອງບໍລິຄັນ ແຂວງບໍລິຄຳໄຊ,ເມື່ອເຈົ້າໜ້າທີ່ວິຊາສະເພາະໄດ້ຂໍ້ມູນອັນລະອຽດຈາກທ້າວ ອາຕົງ ແລ້ວພໍຮອດເວລາ 14 ໂມງ ຂອງວັນດຽວກັນຈຶ່ງໄດ້ນຳຄຳສັ່ງກວດຄົ້ນເຄຫະສະຖານຂອງໄອຍະການເຂດ 1ສະບັບເລກທີ 8/ ອຍກ.ຂ1,  ນຳກຳລັງເຂົ້າກວດຄົ້ນຫ້ອງພັກດັ່ງກ່າວຈຶ່ງໄດ້ພົບເຫັນຂອງກາງຢາບ້າຈຳນວນ 6 ຖົງ ກັບ 6 ເມັດ ແລະ ໄດ້ກັກຕົວນາງ ເຕີມົວ ອາຍຸ 38 ປີ ປະຊາຊົນບ້ານນາຍາງ ເມືອງວຽງທອງ ທີ່ເປັນເມຍຂອງ ທ້າວ ອາຕົງ ກັບ ທ້າວ ປໍເຮີ ອາຍຸ 35 ປີ ປະຊາຊົນບ້ານສີສະຫວາດ ເມືອງບໍລິຄັນ ມາດໍາເນີນຄະດີຕາມລະບຽບກົດໝາຍ.  

 ເຈົ້າໜ້າທີ່ ປກສ ເມືອງບໍລິຄັນໄດ້ໃຫ້ຮູ້ຕື່ມອີກວ່າ: ການມ້າງລາຍຄະດີໃນຄັ້ງນີ້ສາມາດກັກຕົວຜູ້ຖືກຫາໄດ້ທັງໝົດ 4 ຄົນ,ຍິງ 1 ຄົນ,ຢຶດຂອງກາງຢາບ້າໄດ້ 1.276 ເມັດ, ເງິນກີບທະນາຄານ 1,08 ລ້ານກີບ, ໂທລະສັບ 1 ເຄື່ອງ,  ລົດຈັກເວບ 2 ຄັນແລະສາຍຄໍສະແຕນເລດ 1 ເສັ້ນ, ຜ່ານການສຶບສວນ-ສອບສວນຂອງເຈົ້າໜ້າທີ່ວິຊາສະເພາະເຫັນວ່າພວກກ່ຽວທັງ 4 ຄົນ, ແມ່ນມີເຈດຕະນາເຄື່ອນໄຫວຄ້າ-ຂາຍ ແລະເສບຢາເສບຕິດຢ່າງແທ້ຈິງ, ການກະທຳດັ່ງກ່າວແມ່ນຜິດໃນມາດຕາ 315 ແລະ 320 ຂອງປະມວນກົດໝາຍອາຍາແຫ່ງ ສປປ ລາວ ປີ 2017 ເຫັນສົມຄວນດໍາເນີນຄະດີຕໍ່ພວກກ່ຽວຕາມລະບຽບກົດໝາຍຢ່າງເຂັ້ມງວດ.

แชร์