ກະຊວງສຶກສາຮັບອຸປະກອນການຮຽນ

   ກະຊວງສຶກສາທິການ ແລະກີລາ (ສສກ) ໄດ້ຮັບປຶ້ມຮຽນ, ປຶ້ມຄູ່ມືຄູ ແລະ ອຸປະກອນສຳລັບການຮຽນຮູ້ອື່ນໆ ມູນຄ່າ 3,6 ລ້ານກວ່າໂດລາ ຈາກອົງການຢູນີເຊັບປະຈຳລາວຊຶ່ງຄາດວ່າຈະປະກອບສ່ວນສຳຄັນຕໍ່ແຜນການຕອບໂຕ້ໂຄວິດ-19 ໃນຂະແໜງການສຶກສາ.

  ການມອບ-ຮັບເຄື່ອງດັ່ງກ່າວຈັດຂຶ້ນວັນທີ 22 ກຸມພາ ທີ່ກະຊວງ ສສກ ກ່າວມອບໂດຍທ່ານ ນາງ ເພຍ ເຣເບນ ໂລບຣິໂຕ ຜູ້ຕາງໜ້າອົງການຢູນີເຊັບປະຈຳລາວ ແລະກ່າວຮັບໂດຍທ່ານ ພຸດ ສິມມະລາວົງ ຮອງລັດຖະມົນຕີກະຊວງສຶກສາທິການ ແລະກີລາ ໂດຍມີທ່ານ ເອກອັກຄະລັດຖະທູດ ອົດສະຕຣາລີ ປະຈຳລາວ ເອກອັກຄະລັດຖະ ທູດສະຫະພາບເອີຣົບພ້ອມດ້ວຍຜູ້ຕາງໜ້າຈາກທະນາຄານໂລກປະຈຳລາວ, ຕາງໜ້າອົງການຊ່ວຍເຫຼືອເດັກໃນນາມຄູ່ຮ່ວມພັດທະນາ ແລະພາກສ່ວນກ່ຽວຂ້ອງເຂົ້າຮ່ວມ.

  ຈຸດປະສົງຂອງການມອບອຸປະກອນຄັ້ງນີ້ກໍເພື່ອຮັບປະກັນໃຫ້ນັກຮຽນແຕ່ລະຄົນມີປຶ້ມແບບຮຽນເປັນຂອງຕົນເອງໂດຍສະເພາະແມ່ນໂຮງຮຽນຫ່າງໄກສອກຫຼີກ, ເພື່ອຮັບ ປະກັນວ່ານັກຮຽນສາມາດນໍາເອົາອຸປະກອນຕ່າງໆກັບເມືອເຮືອນໄດ້ໃນກໍລະນີທີ່ຕ້ອງມີການຢຸດການຮຽນຍ້ອນເຫດສຸກເສີນຕ່າງໆ.

  ສຳລັບອຸປະກອນຕ້ານພະຍາດໂຄວິດ-19  ແມ່ນຈະນຳໄປແຈກຢາຍໃນທົ່ວປະເທດຕາມທີ່ໄດ້ກຳນົດໃນແຜນການຕອບໂຕ້ຂອງຂະແໜງການສຶກສາສຳລັບນັກຮຽນປະມານ 7,6 ແສນຄົນ ນັບແຕ່ຊັ້ນກຽມປະຖົມຈົນຮອດຊັ້ນມັດທະຍົມ ແລະ ສຳລັບຄູສອນ 35 ພັນກວ່າຄົນ ໃນທົ່ວປະເທດລວມມູນຄ່າທັງ ໝົດ 2,2 ລ້ານໂດລາ ນອກນັ້ນ, ນັກ ຮຽນເກືອບ 1 ລ້ານຄົນໃນໂຮງຮຽນອະນຸບານ,ໂຮງຮຽນກຽມປະຖົມ ແລະໂຮງຮຽນປະຖົມຈະໄດ້ຮັບສະບູ,ອຸປະກອນຮັກສາຄວາມສະອາດ ແລະອະນາໄມອື່ນໆ ເພື່ອສະໜັບສະໜູນມາດຕະການປ້ອງກັນພະຍາດໂຄວິດ-19 ໃນໂຮງຮຽນລວມມູນຄ່າ 1,4ລ້ານໂດລາ ໂດຍການຈັດຊື້ອຸປະກອນຕ່າງໆດັ່ງກ່າວ,ແມ່ນໄດ້ຮັບທຶນຊ່ວຍເຫຼືອຈາກອົງການຮ່ວມມືສາກົນເພື່ອການສຶກສາ (GPE).

  ທ່ານ ພຸດ ສິມມະລາວົງ ໄດ້ຕາງໜ້າກ່າວຂອບໃຈ ແລະຍ້ອງຍໍຊົມເຊີຍຕໍ່ອົງການດັ່ງກ່າວພ້ອມທັງຢືນຢັນວ່າຈະນຳໃຊ້ໃຫ້ເກີດປະໂຫຍດສູງສຸດ, “ດ້ວຍອຸປະກອນເພີ່ມເຕີມເຫຼົ່ານີ້, ຈະເຮັດໃຫ້ການພົວພັນລະຫວ່າງພະແນກ ແລະຫ້ອງການສຶກສາທິການ ແລະກີລາເມືອງເພື່ອຮັບປະກັນໃຫ້ນັກຮຽນແຕ່ລະຄົນມີປຶ້ມແບບຮຽນແລະອຸປະກອນການຮຽນເປັນຂອງຕົນເອງພ້ອມດ້ວຍຄຳແນະນຳກ່ຽວກັບວິທີການເບິ່ງແຍງຮັກສາປຶ້ມໃຫ້ດີ”.

 ທ່ານກ່າວຕື່ມວ່າ: ການຊ່ວຍເຫຼືອຄັ້ງນີ້,  ຍັງໄດ້ມີການພິມປຶ້ມແບບຮຽນຂັ້ນ ປ1 ແລະປ2 ເປັນອັກສອນນູນ (Braille) ສຳລັບເດັກພິການສາຍຕາຕື່ມນຳອີກຍ້ອນວ່າປຶ້ມແບບຮຽນສາມາດໃຊ້ໄດ້ກຸ້ມຮອດ 2-3 ສົກຮຽນ, ສະນັ້ນຈຶ່ງຄາດວ່ານັກຮຽນ ແລະຄູສອນຈະໄດ້ຮັບຜົນປະໂຫຍດຫຼາຍຂຶ້ນ.

ສະໜັບສະໜູນໂດຍ: HONDA

แชร์