ຫຼວງພະບາງ ແລະເມືອງທາຄະຢະມະຫາລືດ້ານທ່ອງທ່ຽວ

  ກອງປະຊຸມປຶກສາຫາລືແລກປ່ຽນຍຸດທະສາດດ້ານການທ່ອງທ່ຽວລະຫວ່າງພະແນກຖະແຫຼງຂ່າວວັດທະນະທຳ ແລະທ່ອງທ່ຽວແຂວງຫຼວງພະບາງກັບເມືອງທາຄະ ຢະມະປະເທດຍີ່ປຸ່ນທາງໄກໄດ້ຈັດຂຶ້ນໃນວັນທີ 18 ກຸມພາ ຜ່ານມາທີ່ໂຮງແຮມຫຼວງພະບາງ ວີວ ໂດຍເປັນປະທານຂອງທ່ານນາງ ສຸດາພອນ ຄົມທະວົງ ຫົວໜ້າພະແນກຖະ ແຫຼງຂ່າວ, ວັດທະນະທຳ ແລະທ່ອງທ່ຽວແຂວງ, ທ່ານ ອາກີລາ ທານາກະ ຫົວໜ້າພະແນກຍຸດທະສາດການທ່ອງທ່ຽວສາກົນເມືອງທາຄະຢະມະ, ມີຕາງ ໜ້າພະແນກການຂອງແຂວງຫຼວງພະບາງ, ຫົວໜ້າທຸລະກິດການທ່ອງທ່ຽວ, ຊ່ຽວຊານພ້ອມດ້ວຍພະນັກງານທັງສອງຝ່າຍເຂົ້າຮ່ວມ.

 ທ່ານ ນາງ ສຸດາພອນ ຄົມທະວົງ ກ່າວວ່າ: ການຫາລືວຽກງານຮ່ວມກັນຂອງສອງເມືອງລາວ-ຍີ່ປຸ່ນ ຜ່ານທາງໄກຄັ້ງນີ້ຊຶ່ງເປັນຂີດໝາຍອັນສຳຄັນໃນການຮ່ວມຂອງສອງຝ່າຍເພື່ອປຶກສາຫາລືແລກປ່ຽນບົດຮຽນທາງດ້ານຍຸດທະສາດການທ່ອງທ່ຽວໃນໄລຍະການແຜ່ລະບາດຂອງພະຍາດໂຄວິດ19 ແລະສິ່ງທ້າທາຍຕ່າງໆ ຕໍ່ກັບການທ່ອງທ່ຽວລະຫວ່າງ ເມືອງທາຄະຢະມະ ແລະ ນະຄອນຫຼວງພະບາງ. ຊຶ່ງປະຈຸບັນທົ່ວໂລກໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ-19 ອັນໄດ້ສົ່ງຜົນກະທົບຢ່າງໃຫຍ່ຫຼວງຕໍ່ການພັດທະນາເສດຖະກິດ-ສັງຄົມ, ເວົ້າລວມເວົ້າສະເພາະ ສປປ ລາວ ກໍ່ຄືແຂວງຫຼວງພະບາງກໍ່ໄດ້ຮັບຜົນກະທົບເຊັ່ນດຽວກັນອັນໄດ້ສ້າງເງື່ອນໄຂເຮັດໃຫ້ອຸດສາຫະກຳການທ່ອງທຽວຢຸດສະຫງັກບໍ່ມີການເຄື່ອນໄຫວເນື່ອງການແຜ່ລະບາດຂອງພະຍາດດັ່ງກ່າວ ແລະ ໄດ້ເຮັດໃຫ້ບັນດາຫົວໜ່ວຍທຸລະກິດມີການຢຸດການບໍລິການ ແລະປິດຕົວລົງຊຶ່ງໄດ້ສົ່ງຜົນກະທົບໂດຍກົງຕໍ່ຜູ້ປະກອບການອາຊີບເຮັດທຸລະກິດການທ່ອງທ່ຽວລວມເຖິງການລົງທຶນທັງພາຍໃນ ແລະຕ່າງປະເທດມີທ່ວງທ່າຫຼຸດລົງ ແລະເຊື່ອວ່າກອງປະຊຸມຄັ້ງນີ້ຈະເປັນບາດກ້າວໃນການວາງແຜນການຕະຫຼາດດ້ານການທ່ອງ ທ່ຽວລວມເຖິງເປັນການສ້າງ ຄວາມເຂັ້ມແຂງໃຫ້ແກ່ພາກລັດ ແລະພາກທຸລະກິດໂດຍສະເພາະແມ່ນຂະແໜງການທ່ອງທ່ຽວແລະການປັບປຸງປົກປັກຮັກສາເມືອງມໍລະດົກໂລກ ແລະການຜະລິດສິນຄ້າດ້ານຫັດຖະກຳ ແລະກະສິກຳເພື່ອການທ່ອງທ່ຽວ.

  ສະນັ້ນຜູ້ເຂົ້າຮ່ວມທັງສອງຝ່າຍຈະໄດ້ປຶກສາຫາລືແລກປ່ຽນບົດຮຽນນຳກັນເພື່ອຊອກຫາທາງອອກ ແລະວາງທິດທາງແຜນການແກ້ໄຂບັນຫາທີ່ຍັງຄົງຄ້າງໃນຕໍ່ໜ້າໃຫ້ສອດຄອງແນ່ໃສ່ຮັບປະກັນ ແລະສ້າງທຸກເງື່ອນໄຂເຮັດໃຫ້ວຽກງານທ່ອງທ່ຽວໄດ້ຮັບການພັດທະນາ ແລະປັບປຸງດີຂຶ້ນຫັນໄປຕາມທິດປ່ຽນແປງໃໝ່ໃນໄລຍະທີ່ມີການແຜ່ລະ ບາດຂອງພະຍາດໂຄວິດ-19 ແລະຈະກາຍເປັນນິມິດໝາຍອັນສຳຄັນໃນການຮັດແໜ້ນຄວາມສາມັກຄີການຮ່ວມມືລະຫວ່າງຂະແໜງການທ່ອງທ່ຽວຂອງແຂວງຫຼວງພະບາງ ກັບ ເມືອງທາຄະຢະມະປະເທດຍີ່ປຸ່ນ.

ຂ່າວ: ສີສຸວັນ

แชร์